Razaun Vise PM Rua ! Xanana : 2025, Fokus Ba Greater Sunrise & Fronteira Ho Indonésia
Imajem : Primeiru Ministru Kayrala Xanana Gusmão hamutuk ho Vise PM II Mariano Assanami Sabino iha PN, 13/11/2024. Foto : Media G-PM
SAPNewsTL, Dili : Durante debate ba Orsamentu Jeral Estadu (OJE) 2025, Primeiru Ministru (PM) Kayrala Xanana Gusmão klarifika katak razaun kria Vise Primeiru Ministru rua tanba nia parte atu fokus ba greater sunrise no fronteira ho indonésia.
PM Kayrala Xanana Gusmão hateten hili vise primeiru ministru rua mak Vise Primeiru Ministru Asuntu Sosiais no Vise Primeiru Ministru Asuntu Ekonómikus, fahe servisu hodi garante servisu membru governu sira nian, nune’e Primeiru Ministru bele foku ba asuntu importante estadu nian.
“Tansa mak iha vise primeiru ministru rua ? Tanba ha’u mesak la konsege haree ba buat hot-hotu, nune’e ha’u hili ida ba asuntu sosiais no ida ba ekonómiku, membru governu kontinua la’o nafatin, ha’u fokus ba asuntu ne’ebé importante liu ba estadu”.Tenik PM Kayrala Xanana Gusmão iha PN,13/11/2024
Xefe Governu afirma nia parte sei esforsa an hodi foku ba greater sunrise, fronteira marítima no terrestre ho Indonésia, no adezaun Timor-Leste ba Association of Southeast Asian Nations (ASEAN).
“Ha’u sei esforsu an iha tinan 2025-2026, prioridade nu’udar xefe guvernu mak greater sunrise no fronteira marítima ho indonézia, nune’e mós ASEAN ninian. Tan ne’e ami la’os fahe pozisaun ba malu maibé ho hanoin ida, tinan 2025 sei iha problema boot ba nasaun ida ne’e”. Deklara Xefe Governu
Fo hanoin fali katak, Timor-Leste sai ona membru observador ba ASEAN, tuir planu Timor-Leste sei adere ofisialmenta ba ASEAN iha Tinan 2025.
Assosiasaun ba Nasaun Sudeste Asiátiku iha membru estadu hamutuk sanulu Indonesia, Malaysia, Thailand, Vietnam, Philipina, Singapura, Myanmar, Laos, Brunei Darussalan, enkuantu Timor-Leste sei hamrik nu’udar estatutu observador.
Jornalista : Marciana da Conceição