Ró Biblioteka MV Doulos Hope Nakloke Ba Públiku Halo Vizita

Imagen :Ró MV Doulos Hope ne’ebe atraka iha Portu Díli, 15/01/2026

SAPNewsTL, Díli : Ró MV Doulos Hope husi nasaun alemaña ne’ebé opera husi órganizasaun GBA Ship ho Misaun kona-ba edukasaun mundu atraka ona iha Portu Díli hafoin desloka husi nasaun Malázia.

Representante Ekipa Internasional hosi Ró MV Doulos Hope Ciquina de Sousa hateten nia parte sente impresionadu vizita Timor-Leste no husu públiku atu bele vizita durante sira-nia estadia iha Díli.

“Ami mai iha Díli, ami faan livru, loke kafe ba públiku, ami hamutuk 130 mak mai iha ne’e, ida ne’e sei nakloke ba públiku iha aban to’o remata”.

“Ami konvida ema hotu iha Díli atu mai vizita no enjoy ho produtu sira ne’ebe ami prepara iha ne’e, ami presiza imi hotu nia presença durante ami estádia iha ne’e, obrigadu barak ba Ministériu Turismu no Ambiente ne’ebe simu ami ho diak tebes”. Hateten Representante Ekipa Internasional hosi Ró MV Doulos Hope Ciquina de Sousa iha Portu Díli, 15/01/2026

Vizita Mv Doulos Hope mai Timor-Leste ne’e sei oferese livru oioin (literatura, edukasionál, labarik nian, nst.); habelar espíritu aprendizajen no esperansa liuhosi livru no interasaun ho tripulasaun ró nian hosi nasaun oioin; Simu vizitante sira, fornese esperiénsia úniku ida hodi haree biblioteka flutuante boot liu iha mundu.

Tuir planu Ro Biblioteka Mv Doulos Hope sei loke ba públiku hahú iha oras tuku 10;00 to’o 17;00 otl ho kada loron simu vijitante 300 pesoas no oferese ba públiku kuaze 2.000 títulu livru.

Ró MV Doulos Hope sei atraka durante loron 12 hahú iha loron 15 Fulan Janeiru to’o loron 26 Fulan Janeiru Tinan 2026.