Sai Embaixadora Foun Ba Japão, Maria Deklara Seidauk Bele Halo Buat Foun
Embaixadora foun ba Japão Maria Terezinha Da Silva Viegas iha Palácio Presidencial Nicolau Lobato, 18/08/2025. Foto : Média GPR
SAPNewsTL, Dili : Prezidente Repúblika (PR) Jose Ramos Horta fo posse ba Embaixadora foun Japaun Maria Terezinha Da Silva Viegas hodi troka Elidio Da Costa Ximenes.
Vinsensius Saldanha Morais De Araujo – SAPNewsTL
Vise Ministra Negosiu Estranjeiru Asuntu ASEAN Milena Rangel hateten, “Ohin dadersan, ita mai akompanha tomada posse ba Maria Terezinha Da Silva Viegas sai Embaixadora ba Japão hodi troka Embaixador Anterior Elidio Da Costa”.
“Nia sei exerse nia kargu hanesan Embaixadora ba Japão durante tinan tolu”. Dehan Vise Ministra ASEAN iha Palasiu Presidensial Nicolau Lobato Bairo -Pite Segunda feira, 18/08/25.
Vise Ministra Negosiu Estranjeiru Asuntu ASEAN ne’e hatutan Embaixadora Maria Terezinha Da Silva Viegas sei reprezenta nasaun atu halo kontinuasaun ba kooperasaun sira ne’ebe eziste ona entre Timor-Leste ho Japão.
Iha fatin hanesan, Embaixadora Japão Maria Terezinha da Silva Viegas hateten, seidauk bele halo buat foun, maibe kontinua servisu ne’ebe Embaixador anterior husik hela.
“Ha’u hanoin nu’udar Embaixadora foun, karik buat foun ha’u seidauk bele halo tamba iha kontinuasaun Embaixador anterior nian”. Katak Embaixadora ba Japao Maria Terezinha
Antes ne’e mos Embaixadora ba Japão Maria Terezinha Da Silva Viegas haksumik knaar hanesan Vise Presidente Parlamementu Nasional, nune’e iha loron 16 fulan Agostu resigna aan ona husi Vise Presidente Parlamementu Nasional.
“Ba kargu ne’ebe ha’u asume, antes tomada posse. Ha’u halo resignasaun ne’e hahu efetivu iha loron 16 fulan Agostu”. Nia subliña.
Enkuantu, kona-ba troka Vise Presidente Parlamentu Nasional, nia fatin Maria Terezinha hatutan Parlamentu Nasional tenke eleje foun fali iha sesaun plenaria nia laran tamba ne’e laos indijatasaun ka nomeasaun.
“Parlamentu Nasional agora iha resesu nia laran, Parlamementu Nasional sei aguarda hela ba konvokatoriu sesaun plenaria Extra-Ordinaria ka mesmu ordinaria, mais se ordinaria depois resesu, tamba Parlamementu Nasional iha resesu hahu husi 15 Jullu to’o 15 setembru”. Nia akresenta.
Entertantu, Parlamentu Nasional sei troka Vise Presidente Parlamentu Nasional iha loron 15 setembru ba oin.