Salva Vítima VBJ ! MS & UNFPA Inaugura Uma Mahon Iha Covalima

SAPNewsTL, Covalima : United Nations Population Fund (UNFPA) servisu hamutuk ho Ministériu Saúde lansa fatin seguru ba vitima sira iha sentru saúde Tiliomar, Munisípiu Covalima.

Diretora Jeral Kuidadu Saúde Primária Elisabeth Leto Mau agradese bele partisipa eventu inagurasaun fatin seguru iha Sentru Saúde Komunitária Tilomar ne’ebe hala’o ona ba dala-7.

Nia konsidera lansamentu fatin seguru ne’e marka istória importante atu hametin kapasidade setor saúde hodi responde kazu Violénsia Bazeia Ba Jéneru (VBJ) iha area rural.

“Ha’u kontente tebes bele partisipa iha eventu inagurasaun fatin seguru, bele estabelese tan iha sentru saúde komunitária Tilomar, inaugurasaun fatin seguru ida ne’e ba dala hitu (7), ita marka istória importante ida tan husi ita nia esforsu atu kontínua hametin kapasidade setor saúde hodi responde ba kazu VBJ iha Munisipiu Covalima”. Hatete Diretora Jeral Kuidadu Saúde Primária Elisabeth Leto Mau ba jornalista sira liu husi nia diskursu iha Sentru Saúde Tilomar, segunda, (09/12/2024).

Diretora Jeral Kuidadu Saúde Primária Elisabeth Leto Mau afirma, Violénsia Bazeia ba Jéneru asuntu ka problema saúde públika no kontinua sai violasaun komum ba problema direitus umanus iha Timor-Leste.

Prevalénsia violénsia kontra feto no labarik feto tuir peskiza Demográfika Saúde Timor-Leste iha tinan 2016 hatudu katak 38% husi feto ho idade 15-49 sofre ona violénsia fíziku.

“Hanesan ema hotu hatene katak Violénsia Bazeia ba Jeneru sai ona hanesan asuntu ka problema saúde públika, kontínua sai violasaun komum ba problema direitus umaus”. Nia informa.

Diretora ne’e akresenta, Munisípiu Covalima 51% husi feto no inan feto sira iha ona esperiensia ba violénsia fizika ka seksual ho emosional desde idade 15, ida ne’e sai kazu sériu ne’ebe presiza ema hotu nia atensaun no servisu makas.

“Iha Munisípiu Covalima 51% husi feto no inan feto ne’ebe mak esperiensia ba violénsia fizika ka seksual ho emosional hahu kedas iha tinan 15, setor saúde nia intervensaun hosi prevensaun no resposta ba kazu Violénsia Bazeia ba Jéneru importante tanba setor saúde jeralmente sempre sai primeiru pontu de kontaktu ba kazu violénsia Bazeia ba Jéneru”. Nia esklarese.

Elisabeth Leto Mau hateten, sira inauguna ona fatin seguru hamutuk hitu (7) iha Munisípiu Viqueque, Ermera, Bobonaro, Liquiça, Díli, Baucau no Covalima ne’ebe hetan apoiu tekniku hosi UNFPA. Fatin seguru foun iha SSK Tilomar projetu ne’e hala’o hamutuk ho Sekretáriu Estadu Igualdade (SEI) finansia husi KOICA, projetu refere kobre munisípiu Díli, Baucau, Covalima no RAEOA.

“Ita inaugura ona Fatin seguru hamutuk hitu (7) iha munisipiu Viqueque, Ermera, Bobonaro, Liquica, Dili, Baucau no mos Tilomar entaun hamutuk hitu ne’ebe hetan apoiu tekniku husi UNFPA.”

“Ohin ita inaugura tan fatin seguru foun iha SSK Tilomar liu husi projetu hamutuk ba igualidade ne’ebe finansiadu husi KOICA, projetu kobre munisipiu Dili, Baucau, Covalima no RAEOA. Iha tinan 2022-2024, Ministériu Saúde ho parseiru sira inaugura ona fatin Seguru hamutuk neen iha munisípiu hitu (7)”.Nia dehan

Governu mos aprova ona lei polítika nasional hodi responde ba kazu VBJ, komprimisiu governu nian ba konvensaun internasionál liga ho violensia hasoru feto no labarik feto. Governu Timor-Leste toma pozisaun forte hodi promulga lei kontra violènsia domestika iha tinan 2010, no deskreve violénsia doméstika hanesan krimi públiku, inklui violensia fizika, psikolojika, seksual no ekonomika.

Iha tinan 2018, Governu Timor-Leste liu husi Ministériu Saúde aprova ona matadalan Nasionál ida ba setor saúde atu responde ba Viólensia Bazeia ba Jeneru, inklui violénsia parseiru intimu iha Timor-Leste, no provizasaun de servisus saúde essensiál ba sobrevivente sai parte integral ida husi kobertura saúde universal no kuidadu saúde primariu.

Asaun sira ne’e hotu, hatudu katak Governu Timor-Leste liu husi Ministeriu Saude kontínua komprometidu atu prevene, kombate no halakon Violensia Bazeia ba Jeneru iha Timor Leste.

Reprezentante UNFPA Timor-Leste Domingas Bernardo konsidera fatin seguru ne’ebe inaugura ba vitima VBJ marka istória foun tanba esforsu koletivu ne’ebe sai responsabilidade ema hotu nian.

“UNFPA hamutuk ho Ministeriu Saude (MS) hodi inaugura fatin seguru ba vitima Violensia Bazeia Jeneru iha Sentru Saude Tilomar. Wainhira ita lansa Fatin Seguru ita marka istroria ida tanba esforsu koletivu, laos ba ema ida, rua deit maibe ba ita hotu nia responsabilidade”.

UNFPA nia kompromissu determinasaun ho vizaun ida katak tenke elimina Violénsia Bazeia ba Jéneru, no sira luta hodi kria espasu seguru ba feto no inan feto sira, apoiu fasilidade saúde ne’ebe ho kondisaun di’ak hodi prevene no responde bazeia ba VJB.

“UNFPA nia komprimisiu determinasaun tanba ita iha vizaun ida katak tenke elimina violensia bazeia ba jéneru, ita luta hodi kria espasu ida ne’ebe seguru bá feto no inan feto sira, no apoiu fasilidade saúde sira ho kondisaun di’ak hodi bele prevene no responde bazeia ba VJB ho efetivu”. Nia sublinha

Prezidente Autoridade Munisipiu Covalima Miguel Armanda Cardoso dehan nia parte sente onradu bele sai sasin ba inaugurasaun ba fatin seguru iha Sentru Saúde Komunitária Tilomar Munisípiu Covalima.

Ezistensia fatin seguru refere fó oportunidade ba vitima violénsia doméstika no Violénsia Bazeia ba Jéneru hodi asesu ba servisu saúde hodi rekupera siklu violénsia ne’ebe sira infrenta iha tempu naruk.

“Ha’u sente onradu tebes bele sai sasin ba inaugurasaun fatin seguru ida ne’e, tanba ho ezisténsia fatin seguru ida ne’e vítima violensia doméstika no Violénsia Bazeia ba Jéneru sira bele iha ona oportunidade hodi asesu ba servisu saúde essensial ne’ebe importante tebes hodi fasilita vítima sira hodi rekupera husi siklu violénsia ne’ebe sira esperiensia ona durante tempu naruk”. Nia deklara.

Prezidente Autoridade Munisipiu Covalima Miguel Armanda Cardoso mos husu ba responsavel Uma Mahon hodi lori sobrevivente sira atu konsulta iha fatin seguru, no pessoal saúde ne’ebe treinadu iha parte VBJ hodi konsulta regular ho dignu no respeitu atu sira labele lakon direitu ba saúde.

“Ha’u husu ba responsavel Uma Mahon sira, favor lori sobrevivente sira mai konsulta iha fatin seguru, husu mos ba pessoal saúde sira ne’ebe treinadu ona ba VBJ, favor halo konsulta regular ba sobrevivente sira ho dignu no respeitu atu sira labele lakon sira nia direitu ba saude”.

“Ha’u husu mos ba Diretor husi setor ida-idak hanesan saúde, polisia, servisu sosial, justisa, uma mahon, NGO lokal, autoridade lokal sira no parte interessada sira hotu hodi servisu hamutuk halo senbilizasaun ba komunidade sira no servidu hamutuk hodi prevene no responde VBJ, kontribui ba sosiedade ne’ebe moris ho seguru, hakmatek no prosperiadade”. Nia hakotu.

Jornalista : Ermelinda Soares