São João Bosco Laran Nakali ! Wainhira Ema Ko’alia Liafuan Aat

SAPNewsTL, Lautem: Bispo Dioseze Baucau Dom Leandro Maria Alves hateten São João Bosco sente laran nakali haree ema ko’alia liafuan a’at no hakarak lori ema ba moris hamutuk ho maromak.

Tuir Bispo Dioseze Baucau Dom Leandro Maria Alves heteten São João Bosco halo buat hotu lori ema hotu ba maromak no Nia hakarak halo oinsa atu ema labele koalia liafuan a’at sira.

“Hahalok kristu nian ida ne’e mak hatudu liu husi São João Bosco halo buat hotu atu lori ema ba hasoru malu ho Na’i maromak, oinsa maka Nia hakarak atu ema labele koalia lia a’at, buka koalia liafuan ne’ebe mak ema sarani nian, ko’alia buat ne’ebe mak diak labele koalia fali liafuan a’at sira ne’e ladi’ak”. Dehan Bispo Dom Leandro Maria Alves iha igreja São Paulo Lospalos, Kuarta 31/01/2024

Bispu ne’e hatutan buka atu hasees an husi liafuan a’at sira, lia fuan sira ne’ebe mak ladun diak atu koalia nu’udar ema sarani.

“Husu atu ita buka oinsa mak ho selebrasaun ida ne’e bele mos fo hanoin mai ita, fanu ita atu hases an husi ita nia liafuan sira ne’ebe mak ladun diak, buka atu hatoman an ho liafuan diak sira ida ne’e mak diak liu buka atu hases an husi liafuan a’at sira”. Tenik Bispo Dom Leandro

Bispo Leandro akresenta São João Bosco kiik oan maibe hatene oinsa lori ema ba hakbesik maromak no Nia sente laran nakali wainhira ema koalia liafuan a’at.

“São João Bosco sente ran nakali oituan wainhira ema koalia liafuan a’at, kiik oan mas hatene ona atu oinsa mak lori malu ba Na’i maromak, ita mos hanesan, hodi selebra loron São João Bosco ne’e atu fanu ita halo ita la ran nakali atu hasee ita nia maluk sira ne’ebe mak koalia liafuan a’at ne’e”. Katak Dom Leandro

Bispo Dioseze Baucau ne’e salienta buka lori ema ko’alia buat ne’ebe diak hodi hahi maromak hases an husi liafuan a’at sira.

“Wainhira ita hases an husi liafuan a’at sira ida ne’e hatudu katak ita lori ema atu ba hasoru malu ho maromak ida ne’e mak dehan matenek tanba ita labuka hahi ba ita nia an maibe buka hahi maromak lori ita nia maluk sira ko’alia diak atu sira mos hahi maromak”. Bispo Baucau afirma

Dom Leandro husu ema hotu tenke haree malu hanesan maun alin hodi buka diak ba malu iha moris.

“Ema ne’ebe moris kontente mak ema ne’ebe haree malu hanesan maun ho alin, ba maluk sira hotu laiha sai fali hanesan opozisaun ka diferente ida ho maluk sira seluk maibe buka atu harii iha ita nia le’et moris hamutuk ida ne’ebe mak diak, moris hamutuk ida ne’ebe mak dehan ksolok nia laran ne’e”. Nia sublina

Jornalista: Luis Pailofo