São Tomé Apostolu Sai Mahein Ba SAPNews ! Pe. Mouzinho : Keta Ta’uk Tuir Jesus

SAPNewsTL, Díli – Estrutura Média Sa’ani Assamana Prazer News Timor-Leste (SAPNews) hala’o sorumutu ho Konseleiru Padre Mouzinho Pereira Lopes iha nia rezidensia Manleuana.

Durante sorumutu, Estrutura SAPNews komprimenta no parabeniza Padre Mouzinho ne’ebe selebra loron jubileu de prata saserdósiu ba tinan XXV iha Maliana.

Iha sorumutu ne’e mos, Konseleiru no Ezekutivu SAPNews deside no hili ona padrueiru Mídia SAPNews maka São Tomé Apóstolu tanba São Tomé hanesan santu ne’ebe realístiku no aposta ba evidénsia katak fiar ba buat ne’ebe nia haree, kaer ho liman no sente.

Padre Mouzinho Pereira Lopes, husu ezekutivu no jornalista SAPNews  atu kontinua firme hodi serví, hakat ba oin nafatin, brani tuir Jesus hodi kombate injustisa liu husi haklaken lialos no dalan los ba públiku.

“Keta tauk tuir na’i Jesus, iha prosesu buka lia los no kombate injustisa iha nasaun Timór-Leste, Tau fiar iha Maromak, husik buat hotu nia mak fo bensa”.  Tenik Padre Mouzinho Pereira Loped iha nia rezidensia Manleuana, 20/06/2024

Liga ba hili protetor SAPNewsTL, Padre Mouzinho prefere São Tomé Apostolu tanba santu ne’e sempre buka lialos, lialos ne’ebe ho faktual no klaru iha nia matan.

“Ita hili São Tomé Apostolu sai ita nia  protetor tanba São Tome maka santu ida ne’ebe buka lialos, buka faktus, ko’alia buat ne’ebe nia sente, fo sai buat ne’ebe nia haree ho evidénsia”. Nia sublinha

Konseleiru Agustinho de Sousa, fo parabens ba Padre Jubilante, Mouzinho Pereira Lopes tanba bele hala’o misaun sagrada to’o ona tinan 25 nu’udar na’i lulik.

“Parabens ba Amu, tanba hala’o misaun nu’udar Na’i Lulik kompleta ona  tinan 25, espera katak ba oin  ho misaun salvasaun ne’e hodi lori naroman ba sarani sira”. Agustinho de Sousa hateten

Diretor Mídia SAPNews Sergio Alves felisita Padre Mouzinho o ekipa SAPNews hato’o parabéns ba, Jubilante Padre Mouzinho Pereira Lopes, ne’ebe selebra Jubileu de Prata ba dala 25 iha loron 15 fulan junho tinan ne’e.

“Kongratulasaun boot ida ba amu tanba servi ona sarani sira ba tinan 25, atu selebra loron jubileu prata sasrdotal ne’e lori tinan naruk maibe konsege servi ona durante tinan 25 hanesan bibi atan diak, hein katak sai nafatin bibi atan ne’ebe diak hodi servi no bali ninia bibi sira ne’ebe sei halai namkari iha mundu rai-klaran”. Sergio Alves da Costa kogratula

Relasiona ho padroeiru Midia SAPNews, Diretor ezekutivu ne’e aseita ho opsaun ne’ebe Padre Mouzinho Pereira Lopes atual Konseleiru SAPNews ne’e fo. Sergio mos agradese ba Padre Mouzinho tanba bele hili ona São Tomé Apostolu nu’udar mahein ba Mídia Nasionál refere.

“Ha’u aseita tebes no agradese ba Padre Mouzinho Pereira Lopes tanba hili ona São Tomé Apostolu nu’udar mahein ba mídia nasionál SAPNews, ita fiar katak husi nia harohan daet ba maromak bele satan no kaer metin media ne’e hodi kontinua hakat ba oin hodi servi povu no nasaun liu husi orgaun komunikasaun sosial, entaun ita nia loron padroeiru sei monu iha loron 3 Fulan Jullu, ita sei selebra loron ne’e iha fulan oin”. Nia agradese

Enkuantu, Selebrasaun loron Jubileu de Prata Saserdotal ba Padre Mouzinho Pereira Lopes no Lúcio Norberto de Deus hala’o ona iha Maliana, 15 Junhu 2024.

Sarani Parokia Imaculada Conceição mos selebra ona misa agradesimentu ba Padre Jubilante na’in rua iha loron 22 Fulan Junhu iha igreja Balide.

Jornalista : Guilhermino Ramos da Cruz