SAPNews Kompleta Tinan 2 !”La Mai Atu Ema Servi, Maibe Atu Servi”

SAPNewsTL, Dili : Presidente SAPNewsTL Clementino Braganca Machado fo agradese ba Na’i Maromak tanba to’o ohin loron Midia ne’e kontinua eziste no kompleta ona tinan 2, moris iha estadu Republika Demokratika Timor Leste Povu Doben Timor Leste.

Povu Doben Timor-Leste  

Ita hotu nia agradese ba aman maromak santísima trindade ne’ebe bele tulun no halibur ita hotu, ita bele hasoru malu hamutuk iha fatin ida ne’e ho saúde diak, liliu Mídia ne’e bele hamriik metinno la’o to’o ona tinan rua, husi fatin ida ne’e mos, ita fo Onra no Gloria ba Heroi sira ne’ebe mate ba rai ida ne’e inklui Jornalista Internasional sira ne’ebe husik ona mundu, ne’ebe kontribui mos ba nakfilak ita nia rain, sai estadu ida soberanu, Livre no demokrátiku iha mundu.

SAPNewsTL nu’udar meiu komunikasaun sosiál ida ne’ebe hari’i iha loron 26 Fulan Fevereiru Tinan 2022, hari’i no funda husi estudante Universitáriu sira, Formandu Jornalizmu Profisional sira no Estudante Sekundaria sira, iha ne’ebe hamriik  nu’udar média ho prinsipiu Informativu, Inspirativu, Konstrutivu, Produtivu, krítiku no Edukativu hodi hari’i Sosiedade Timor-Leste ida Justu, Prósperu, Solidáriu no Fraternu.

Permite ha’u atu introduz katak, Mídia Sa’ani Assamana Prazer News Timor-Leste, nune’e habadak SAPNewsTL, Sa’ani katak lian maubere, lian komunidade, lian juventude, lian estudantes, lian  adolesentes, lian kbiit laek no lian ema hotu nian ne’ebe hanaran lian povu nian, lian heroi sira nian no lian maromak nian ka vox poluli, vox dei.

Assamana katak espasu ka sentru ida ne’ebe ema halibur an salva vida no sobrevive, signifika sentru informasaun ida husi ezisténsia sosiedade nian hodi afirma direitu liberdade expressaun no imprensa nu’udar dalan ba hametin konstrusaun estadu de direitu no demokrátiku.

Prazer hanesan asaun satisfasaun ba dejeju humanidade nian, asaun divertimentu, vontade ba bem estar, luta ba felisidade komun ho karater respeituozu, haraik an, obediente no empatia ba ema hotu.

SAP iha lian ingleza signifika Ai-been, iha lian Portugueza dehan “Uma Vitamina que circula dentro das plantas” katak bee ida ne’ebe sirkula iha ai-hun ida nia laran, entaun ai ida atu moris no fo fuan diak, nia presiza bee, nune’e mós sosiedade atu goza unidade nasionál, fraternidade, direitu humanus, liberdade no demokrasia presiza apoia orgaun komunikasaun sosial tanba mídia mak ispíritu ba liberdade, demokrasia, justisa, domin no pás.

SAPNewsTL hari’i ho espíritu forsa vontade Juvenil, ho karater nasionalista no Espiritu Patriotista nu’udar sentru ba informasaun kredivel, edukasaun sidadania, Pensamentu Públiku, Peskiza no dezenvolvimentu komunikasaun sosial.

Senhores no senhoras

Ohin nu’udar Momentu ne’ebe importante tebes, ba Mídia SAPNews, Momentu ne’ebe ita hotu hamutuk lansa marsa media SAPNews,  espansaun ba plataforma sira hanesan Tik tok, Youtube, Instagram, twiter, sertifikasaun ba maktoban Aquelina Mangalhães nia kontribuisaun durante funda Media ne’e to’o husi ita ba mundu seluk, semináriu no selebra ezisténsia Mídia SAPNewsTL ba daruak.

SAP News ne’ebe idéntiku ho feto ran no mane klosan sira, mídia juvenil no akadémiku ne’e, ami dehan, “ami la mai atu ema servi, maibe atu servi, nu’udar ida ne’ebe servi”, ami kontinua kaer metin ispíritu, valores no prinsipiu sira ne’ebe journalista antigu sira kaer hodi luta no defende direitus humanus, liberdade, justisa no dignidade humana iha tempu funu nia laran, ohin iha momentu ukun rasik an, ami hamriik hakarak kontinua espíritu ida ne’e hodi garantia liberdade imprensa no expresaun ba ema hotu.

Tuir Sosiolojista Já Tuchman (1993) husi Itália konsidera jornalista dezempeñu sira-nia atividade jornalístika ne’ebe ho forma sériu, profisionál no objetividade, jornalista dala barak liu la susesu atu fo hanoin ba ema, maibe susesu barak liu  halo públiku atu hanoin kona ba realidade ida liu husi notísia sira mak publika.

Iha aniversáriu tinan daruak ida ne’e, ami atu afirma katak Timor Leste iha futuru, hakarak sai Timor Leste ne’ebe laiha obstákulu no la hanesan iha Timor Leste ida uluk, uluk sai referénsia, agora tempu ba mudansa no futuru tempu ba prosperiedade, dezenvolvimentu no moris hanesan sein diskriminasaun. Katak :

1. Ami sei hatutan, no estimula sosiedade fornese informasaun ne’ebe justu no kredivel hodi asegura direitu sidadaun hotu nian ne’ebe hakerek iha Konstituisaun Repúblika Demokrátika Timor Leste Artigu 40⁰no 41⁰ kona-ba liberdade Expresaun no Liberdade Imprensa
2. Ami sei garantia ami nia independénsia editorial, livre husi poder ekonómiku no poder polítiku hodi kumpri deit ba Kode étika Jornalizmu Sanulu (10) no Lei Nú. 5/2014, 19 de Novembru, Lei Komunikasaun Sosial.
3. Ami sei buka, rona, tane no valoriza nafatin sosiedade tomak nia lian, sai matan, tilun, ibun no The Voice of the Voiceless katak sai lian ba lian laek.
4. Ami sei defende no promove prinsipiu governasaun diak, kontrolu sosial, edukasaun sidadania, Igualdade no inkluzaun, Direitu Feto No Labarik sira hodi kaer metin kultura damen, domin, unidade, justisa, liberdade, demokrasia no direitus humanus
5. Ami mos kontinua esforsu no luta hodi luta kontra disinformasaun, hoax, fake news ho forma saida deit iha Timor Leste, nune’e bele promove no desenvolve diskuzaun ne’ebe saudável, amigavel, krítiku, analítiku iha sosial media no sosiedade enjeral

Ikus liu, ho selebrasaun ne’e ami hato’o: ami nia apresia no orgullu ba entidade hotu ne’ebe kunhese SAPNews, apoia direita no indeireita, liliu Telekomsel, konseleiru/a sira, familia,inan aman jornalista sapnews nian. ami konta ho imi, ita hotu nia prensesa nu’udar koragem ba ami nia luta. Mídia ida kiik, maibe sura ho ita hotu, ami sei hamriik metin, firme no forte liu tan iha rai lalatak lafaek nian.

Ami nia matan sei la dukur, wainhira injustisa, hoax, violasaun, Dezempregu, Kiak, Koluzaun, Korupsaun, Nepotizmu no Partidarizmu sei buras iha rai ida ne’e. SAPNews imi nian, SAPNews ita hotu nian. Viva SAPNews Timor, Viva Timor Leste.

 Presidente SAP News TL

Clementino Bragança Machado

Salaun UNITAL, Dili, 23/02/2024.