SAPNews Presta Omenajem Ba Maktoban Angelino Iha Lautém

SAPNewsTL, Lautém : Ezekutivu Mídia SAPNews ne’ebé lidera hosi Clementino Bragança Machado hamutuk ho estrutura presta omenajem maktoban Angelino dos Santos iha postu administrativu Luro, munisípiu Lautém.

Destinu Mate La Fihir, Mosu Mai Tanesan Ahu-Na’in Iha Tempu Kalan

Maktoban Angelino dos Santos hakotu iis iha loron 2 Dezembru 2024, maktoban nu’udar Aman ida hosi Sekretáriu Ezekutivu Mídia Nasionál SAP News TL Luis Dos Santos “Pailofo”. Aman no Avó diak ida ne’ebé firme no fuan boot apoia no fo koragem ba oan-beioan sira hodi dudu midia juvenil refere ba oin.

Moris iha mundu hanesan bainaka no ema la’o rai oan ida, ema ida-idak hala’o ninia moris ho dalan ne’ebe la hanesan tuir vontade no beran mak iha liu husi esforsu an no grasa na’i Maromak nian. Ema ne’ebe la’o rai, la’o lemorai sempre hasoru buat oioin iha dalan klaran, nu’udar ita hakat iha paragem terminal ida ba paragem terminal ida seluk ne’ebe presiza lailais hetan billete viajem nian (ezemplu viajem husi Sidade Dili ba Bali), ikus mai ita ba para iha terminal ne’ebe lori ita ba viajem eterna hodi hasoru malu ho maromak.

Durante ita moris, ita la’o, ita haree, ita sente no ita koko, ita moris halo istória midar no moruk, ita marka memória furak no trizte, wainhira ita mate, ita husik hela memória hirak ne’e hotu iha via gloriozu no dolorozu.

Wainhira Maktoban Angelino dos Santos sei moris nia hameno ba Diretor Ezekutivu SAPNews Sérgio Delekuar – Jurnalis katak “Imi bele ka lae, se imi joven sira bele hari’i mídia ida”. Diretor SAPNews hatan, “Avó, Ami bele tanba ami konta mós ho avó ninia tulun no motivasaun”.

Avó Angelino dehan teni “Ha’u katuas ona, ha’u hakarak imi ba oin nafatin, ami nia otas besik daudaun, maibé imi tenki hamutuk hodi kontinua, haree malu didiak hodi la’o, dala ruma sei presiza tempu atu imi hetan susesu”. Diretor SAPNews hatan, “Klaru katak ami sei la’o dook no dalan naruk ne’ebé nakonu ho dejafiu, maibé se avó firme hodi tulun ami, ami sei ba maske to’o tarde la hanesan ho ema sira selu-seluk”.

Maktoban Angelino ho oin midar no oin hamanasa maske sofre ona moras maibé nia sei dehan, “Imi nian foin hahú ne’e ema boot sira bele rekunhese no fiar imi ka lae, imi tenki servisu makaas mak karik sira bele rekunhese imi, se imi ko’alia de’it mais la halo mós ne’e imposivel”.

Tuir mai, Sergio Alves hatan “Avó fiar no reza, to’o loron ida ema boot sira sei rekunhese, ami sei aluta kontinua nafatin, Avó”. Maktoban ne’e ho oin hamanasa dehan, “Tebes, buat ne’ebé imi hein sei sai realidade iha loron ida, maibé tenki esforsu, dixiplina no servisu ho hakraik an ba ema hotu, aprende rona ema seluk no kolabora ho ema, imi sei bele”. Nia dehan ida ne’e ba Sergio SAPNews hafoin hala’o hela tratamentu iha Dili, Junhu 2024.

Buat ne’ebé ita haree no aprende hosi Maktoban Angelino dos Santos maka “Ninia simplesidade, silensiozu, haraik an, rona ema, simu ema, laran diak, pasíensia, fuan boot, la sura kolen, hatudu nafatin oin midar, sempre tetu, dasin, sukat, la foti desizaun lais iha problema nia laran no foti responsabilidade boot iha família laran”.

Tebes duni katak espresaun saudável no osan mean ne’ebé hato’o hosi avó Angelino dos Santos ne’e balun sai ona realidade ba SAPNews, mensajem furak sira kontinua horik metin iha ami nia fuan to’o ohin loron no rona katak nia laiha ona, maske destinu mate mai hasouru ona nia iha tempu ne’ebé nia oan no beioan sira sei luta hela iha jornada naruk.

---

Ema hotu sei frekuenta realidade ne’e ho maneira no tempu ne’ebe la hanesan. Moris ne’ebe hahú dala ida iha tempu ne’ebe temporária hodi la’o ba dalan mate nian nu’udar mistériu ida iha dalan eternidade ida sein espasu no sein tempu, dalan ida ne’e ema moris hotu sei hakat liu, tan dalan ne’e la presiza uza guia de marsa no la uza vistu iha passaporte. Dalan ne’ebe simples tebes maibe ema ida-idak sei hasoru iha kualker momentu iha kada segundu iha moris ida ne’e, maske la hatene bainhira tempu ne’e mai.

Bainhira mistériu mate to’o mai, mate ne’e to’o ba kada ema hanesan ahu-na’in ne’ebe tama hodi asalta no na’ok sasan sira iha uma laran iha momentu ne’ebe uma na’in dukur, wainhira hakfodak iha dadersan nakukun rai hun mutin manu kokorek, ahu-na’in hodi liu tiha ona. Nune’e halo uma na’in sente trizte, kanek, laran susar, laran taridu no tanis hodi sente lakon boot ba hahalok husi ahu-na’in ne’ebe lalin soin uma laran nian.

Maske sei iha idade ne’ebé, sei bele hala’o misaun serví oan ko beioan sira seidauk remata, halo oan no beioan sira sente lakon tebes nia, laran triste hasoru realidade ida ne’e. Tebes distinu mate to’o mai, la fihir no la hili, la haree ba idade, pozisaun, riku ka kiak, beik ka matenek.

Distinu mate to’o mai, laiha ema ida mak iha forsa naton hosi satan netik, matan dook rende, matenek na’in ba aimoruk mos sei rende, sira teni “Ami labele ona, ami hiit liman”, wainhira sira hiit liman ona, halo ita fila ba Maromak hodi sadere no husu tulun tanba nia mak dalan, lialos no moris, Nia mak uluk no ikus, hun no rohan, husi nia buat hotu mosu.

Na’i Maromak lori ona Maktoban Angelino dos Santos, “Ha’u la’o to’o ona rohan, ha’u mai saran an ba ita ho buat hotu ne’ebe ha’u halo iha moris ne’e”.

Tempu moris fo oportunidade ba ita hodi hatene mundu, tempu mos iha ninia tempu fo mai ita hodi husik hela mundu no despede ema moris sira iha mundu. Wainhira tempu to’o ita husik mundu, tempu sei lakon, espasu mos sei lakon.

Ita moris halo istória no mate husik hela istória sira, ita sei tama ba mundu hakmatek sein barullu, mundu eternidade ka rohan laek. Ne’e mak murak mistériu mate nian ne’ebe ita sei la ses an nein subar an, ita hot-hotu la’o hela iha dalan ba ne’e.

Fo hanoin fali katak, Angelino dos Santos hakotu iis iha loron 2 no halot ona ba nia deskansa fatin ikus iha loron 6 fulan Dezembru tinan 2024, maktoban mate husik hela oan mane na’in rua no oan feto na’in tolu hamutuk ho nia oan sira.

Avó Maktoban Angelino dos Santos la’o uluk ona, ba hamutuk ho maromak, la’o ho maromak no horik ho maromak iha nia roman nabilan rohan laek nian, adeus no adeus, obrigadu barak ba dedikasaun tomak, boa viajem Angelino dos Santos, até um dia.

Jornalista : Marciana Conceição