Saudozu Dudu Hakotu Iis ! Assanami Deklara PD Lakon Aman & Lider Di’ak Ida
Imajem : Presidente Partido Democrático Mariano Assanami Sabino hamutuk ho kuadru sira iha Sede PD Kolmera, 07/05/2025
SAPNewsTL, Dili : Saudozu Ernesto Fernandes Dudu nia mate isin hala’o vizita ikus ba Sede Sentral Partido Democrático (PD) Colmera-Dili hodi halo presta omenajem ikus. Durante vizita Presidente PD Mariano Assanami Sabino hamonu matan-ween hodi dehan Saudozu Dudu nu’udar aman diak, brani, dixiplina no komitmentu iha tempu funu laran no ukun an.
“Ita hotu triste, timoroan hotu sente lakon Apa Dudu, aman diak ida, dixiplina, konsistente, brani no firme iha luta ba ukun an no desenvolvimentu povu nian”.
“Apa Dudu mak hamutuk ho ami alin sira hodi hari’i Partidu Demokrátiku iha 2001, nia nu’udar Presidente PD Ermera, Vise Presidente PD no konselleiru ne’ebe fo hanoin ba ami alin sira”. Teni Presidente PD Mariano Assanami Sabino iha Sede PD Kolmera, 07/05/2025
Assanami hatutan, “Ba família sira, ohin Apa Dudu laiha ona, karik nia la fo buat barak no rai hela ba oan sira hanesan aman sira seluk, maibe nia rai hela nasaun ne’e ba ita atu kuidadu rai ne’e no nia hari’i PD hodi konstrui nasaun ne’e”.
“Apa Dudu, ohin ita mai vizita ikus ba fatin ne’e, ami hotu sente triste no lakon ita, ita nia isin mai husik hela maibe ita nia espíritu, valores, dixiplina no domin nafatin hamutuk ho ami iha ne’e, ba hamutuk ho aman maromak, descansa ho damen, obrigadu Apa Dudu ba dedikasaun no kontribuisaun tomak”.
Saudozu Ernesto Fernandes Dudu
Komandante Rejiaun IV no Eis Deputadu Ernesto Fernandes “Dudu” fila hikas ona ba Aman Maromak nia kadunan santu, wainhira hala’o tratamentu iha Hospital Nacional Guido Valadares (HNGV) tanba sofre moras.
Antes ne’e, Saudozu Ernesto Dudu hetan atakasaun derepente iha loron 10 fulan Abril, nune’e família lori ba halo tratamentu iha Hospital Nasional Guido Valadares hodi halo tratamentu ba ninia saúde maibe infelismente Saudozu hakotu iis tanba sofre moras grave.
Durante Saudozu Dudu baixa iha ospital, hetan vizita hosi Primeiru Ministru Kay Rala Xanana Gusmão, Jeneral Reformadu Lere Anan Timur, Vise Primeiru Ministru Mariano Assanami Sabino no Membru Governu dasia sira iha fulan Abril liu ba.
Saudozu Ernesto Dudu nia mate isin hala’o vizita ikus iha Kuartel Jeral F-FDTL, Sede Nasional PD Kolmera, no CCLN hodi presta omenajem ikus.
Oras ne’e Mate-Isin iha ona saudozu Ernesto Dudu nia rezidensia, Suku Talimoro Postu Administrativu Ermera, Municípiu Ermera.
Jornalista : Ermelinda Soares & Dircia Belo