![SEAC & CNC Inaugura Monumentu Liberdade SEAC & CNC Inaugura Monumentu Liberdade](https://sapnewstl.com/wp-content/uploads/2023/11/IMG-20231115-WA0303.jpg)
SEAC & CNC Inaugura Monumentu Liberdade
SAPNewsTL, Bobonaro: Sekretariu Estadu Arte Kultura (sigla portuges SEAC) ho Centro Nasional Chega Institutu Publiku (CNC, IP) inaugura monumentu liberdade Balibo no simu delegasaun husi Belu, Kupang no Malaka Nusa Tenggara Timur, Indonesia iha loron dahuluk Festival Fronteira 2023.
“Atividade ba loron ohin halo inagurasaun ba monumentu liberdade no mos ita sei simu delegasaun husi Belu, Kupang no Malaka Nusa Tenggara Timur, Indonesia hamutuk ema nain-300 sei partisipa Festival Fronteira 2023 tanba festival ne’e ho tema interkambiu kulturál ba hametin rekonsiliasaun”, dehan SEAC Jorge Cristovão ba jornalista sira liu husi diskursu iha fatin inagurasaun Balibo, Bobonaro kuarta (15/11/2023).
Sekretariu estadu hatutan, festival ne’e konvida delegasaun husi Nusa Tenggara Timur atu hametin relasaun povu husi nasaun rua iha area fronteira nune’e simu sira ho kultura Timor-Leste nian.
Iha fatin hanesan diretor ezekutivu CNC, IP hatete, serimonia ida ne’e laos abertura ba Festival Fronteira 2023 maibe inaugura monumentu liberdade no simu mos administrador ho delegasaun husi Belu, Kupang no Malaka Nusa Tenggara Timur, Indonesia.
“Serimonia ida ne’e ita laos abertura ba Festival Fronteira 2023 maibe ita inaugura monumentu liberdade no simu mos administrador ho delegasaun husi Belu, Kupang no Malaka Nusa Tenggara Timur, Indonesia ho serimonia kultural atu simu matak malirin husi lia nain sira para saúde diak partisipa festival ne’e”, tenik Hugo
Hugo informa, Monumentu liberdade Balibo tanba ida ne’e simboliza Timor-Leste nia liberdade, Balibo nu’udar area dahuluk ba militar Indonesia hakat iha 1975.
Iha sorin seluk, prezidente autoridade munisipiu Bobonaro Ernesto de Oliveira Barreto informa, monumentu tau naran Monumentu Liberdade tanba ho re-intregrasaun ba Indonesia 1975 durante tinan 24 no agora Timor-Leste hetan liberdade sai nasaun soberanu iha mundu nia matan.
“Monumentu ita tau naran Monumentu Liberdade tanba ho re-intregrasaun ba Indonesia 1975 durante tinan 24 no agora ita hetan liberdade sai nasaun soberanu iha mundu nia matan”, Prezidente hateten
Entretantu,iha serimonia SEAK Jorge Cristovão ho diretór ezekutivu CNC, IP halo inagurasaun Monumentu Liberdade Balibo ne’e hamutuk ho administrador Belu ho nia espoza, membru governu sira, embaixadora Cuba, diretór G7+ no prezidente autoridade munisipiu Bobonaro.
Reportajen: Augusto dos Santos