SEATOU Husu Povu Ermera Halo Uma Dook Husi Estrada Ho Distánsia 10 Metru
Imajem : Sekretaria Estadu Asuntu Toponomia no Organizasaun Urbano (SEATOU) Germano Santa Dias Brites iha Gleno-Ermera, 13/03/2025.
SAPNewsTL, Ermera : Sekretaria Estadu Asuntu Toponomia no Organizasaun Urbano (SEATOU) Germano Santa Dias Brites husu komunidade Ermera liliu Atsabe hodi halo uma dook husi estrada maiz ou menuz metru lima to’o sanulu (5-10 metros).
Governante ne’e dehan SEATOU mós sei kontinua halo alargamentu estrada iha postu administrativu Atsabe tanba ne’e husu populasaun sira hodi koopera hodi prosesu alargamentu estrada ne’ebé sei implementa.
“Atu ita nia povu bele sente ukun rasik an maka ita nia nasaun tenki iha dezenvolvimentu, iha Novembru 2024, ami nia ekipa konjunta hala’o ona vizita iha postu Atsabe munisipiu Ermera nian hodi haree alaragamentu estrada”.
“Husu ba populasaun Atsabe villa tenki hela dook husi estrada no halo uma tenki dook husi fiu eletrisidade, nune’e bele evita ba dezastre naturais hanesan rai lakan, rai halai, rai monu, no seluk tan”. Tenik SEATOU Germano Dias Brites ba SAPNews iha Ermera,13/03/2025.
SEATOU mós husu komunidade sira hodi labele halo uma besik estrada no valeta leten, nune’e bele ses an hosi risku ba estrada no uma iha tempu udan.
“Ekipa konjunta SEATOU nian tun direitamente hodi fo hanoin ba populasaun Atsabe, labele halo Uma besik estrada ou valeta, nune’e tempu udan karik labele fo riksu boot ba estrada no enfrenta mos ba transporte públiku sira ne’ebe hala’o viajem iha Atsabe”.
“Rekomenda ba autoridade husi Atsabe nian atu fo atensaun ba populasaun Atsabe tomak hela dook husi estrada ou lina eletrisidade, kuase 50 ho distánsia 5-10 metru husi uma ba estrada, nune’e Ekipa SEATOU ou obras sira tun halo servisu karik la fo risku uma”. Nia husu
Ligadu ho ai-horis, to’os no kintal boot sira ne’ebé besik estrada ninin, Germano Brites deklara sei sobu hotu tanba ne’e husu komunidade sira hodi servisu hamutuk.
“Hakarak estrada ne’ebe diak iha Atsabe husu ba populasaun hotu tenki servisu hamutuk ho SEATOU, sira nia uma, ai-horis no kintal ou toos ne’ebe mak halo besik estrada ne’e tenki sobu muda se’es husi estrada ninin”. Germano husu.
Makaer ukun ne’e husu ba komunidade hotu ne’ebe okupa espasu públiku atu sobu nonok uma ka baraka sira ne’ebé halo iha dalan ninin tanba ekipa jestaun merkadu munisípiu sei tun ba halo observasaun.
Ligadu ho konsulta sidadania, Sekretariu Estadu Asuntu Toponomia no Organizasaun Urbanu (SEATOU) Germano Santa Dias Brites hateten konsulta sidadania ne’e hodi identifika prioridade munisipiu Ermera nian.
“Programa ne’e atu hatene nesesidade munisipiu Ermera nian, saida maka sira hasoru atu fo hanoin ba malu iha parte diskusaun nian, nune’e bele aprezenta iha grupu tékniku sira para atu prepara tau iha planu Orsamentu Jeral Estadu iha tinan 2026 liu husi Ministériu Finansas”.Tenik SEATOU Germano Dias Brites
Germano hatutan prioridade munisípiu Ermera maka problema infraestrutura, edukasaun no saúde iha rural.
“Problema barak liu ne’ebe munisipiu Ermera hasoru maka infraestrutura, edukasaun no saude maibe sira ne’e tama iha planu 2025, balun la’o ona maibe diskusaun ohin ne’e atu prepara fali planu no programa”. Nia sublinha
Sekretariu Estadu ne’e akresenta “Autoridade no xefe suku sira atu hato’o problema sira komunidade sira nian, durante enfrenta para tékniku husi finansas anota para lori ba aprezenta iha nasionál para tau orsamentu iha 2026”.
“Ita identifika balun no barak maka seidauk maibe programa IX governu nia sei resolve hotu problema sira ne’e, kontinua resolve buat ne’ebe maka governu bele, la’os milagre ohin ita koalia, halo kedas maibe tenki iha prosesu”. Nia informa
Fo hanoin fali katak, iha fulan Novembru 2024, SEATOU halo ona vizita ba komunidade Atsabe maibe komunidade balun aseita hodi halo alrgamentu estrada iha Atsabe, maske nune’e maibe tinan ne’e governu seidauk prevé iha orsamentu tinan 2025.
Jornalista : Conzita Mota
