SEATOU Sobu Sasan Negosiante ! Labarik 1 Tanis & PNTL Kaptura Jornalista Diligente

SAPNewsTL, Dili – Ekipa Sekretaria Estadu Asuntu Toponomia no Organizasaun Urbanu (SEATOU) Germano Santa Dias Brites sobu no baku rahun produtu lokal ne’ebe negosiante sira fa’an iha Merkadu Kampun Baru.

Relasiona ho Polítika Sekretaria Estadu Asuntu Toponomia no Organizasaun Urbanu (SEATOU) Germano Santa Dias Brites ne’ebe hakarak organiza sidade Dili sai moos no organizadu, iha ne’ebe halo eviksaun ba komunidade no muda negosiante ambulante sira iha fati-fatin, orseik kalan ekipa ne’e halo asaun brutal hodi sobu no baku rahun produtu ne’ebe komunidade sira fa’an iha Merkadu Kampun Baru.

Tuir video ne’ebe viral iha média sosial hatudu, bainhira ekipa SEATOU liu hosi guarda munisipál Dili baku rahun kadeira, kaer besi no uza kadeira hodi baku rahun produtu lokal ne’ebe negosiante ambulante fa’an, halo labarik ida pániku no tanis hodi bolu nia papa maibe guarda munisipal ne’e kontinua sobu sasan ne’ebe komunidade sira fa’an.

“Aiaaaa, Apaaa”. Labarik ne’e tanis bolu nia papa, maske nune’e maibe ekipa SEATOU ne’e kontinua hamonu 3 Roda ne’ebe negosiante uza hodi tau modo sira, kaer besi hodi baku rahun modo sira ne’ebe fa’an no baku rahun kadeira ne’ebe negosiante sira tur hodi hein sasan.

Produtu hirak ne’ebe negosiante sira fa’an no harahun husi ekipa SEATOU mak hanesan modo repollu, alfase, tomante, mostarda, modo-mutin no modo sira seluk tan.

Asaun brutal ne’e akontese hori-kalan iha Merkadu Kampun Baru, Postu Administrativu Dom Aleixo, Munisípiu Dili, 03 Fulan Setembru 2024.

Iha oportunidade ne’e mós SEATOU nia ekipa impede jornalista halo kobertura ba asaun brutal ne’e no orienta parte PNTL hodi kaptura mós Jornalista Feto ho naran Antonieta husi Mídia Diligente tanba la tara kartaun jornalista hodi lori ba edifísiu Eskuarda Dom Aleixo.

Hafoin kaptura, Prezidente Assosiasaun Jornalista Timor-Leste (AJTL) Zeovonia Vieira ho ekipa to’o kedas iha Edifísiu Eskuarda Dom Aleixo hodi halo aproximasaun liga ba asuntu kapturasaun hasoru Jornalista Diligente.

Aleinde Jornalista husi Diligente, ekipa Média One Timor Suzana Cardoso mos sai vitima no hetan ameaça husi SEATOU bainhira foti filmajen kona-ba sobu komunidade nia sasan.

Tuir informasaun ne’ebe SAPNews liu hosi Pajina Oficial AJTL, Prezidente AJTL Zeovonia Vieria konsidera asaun ne’e tentativa halo limite ba liberdade imprensa iha Timor-Leste.

“Ida ne’e parte husi tentativa limite liberdade imprensa iha Timor-Leste”. Sita Prezidente AJTL Zeovonia Vieira liu hosi Pajina AJTL, SAPNewsTL Screeshoot. Dili, 03/09/2024

Ekipa Estrutura AJTL iha oras tuku 21:00 kalan ba halo kedas enkontru ho Komandante Eskuadra Dom Aleixo, Sr. Alexandrite da Costa, hodi esplika konaba papel importante husi jornalista nian servisu ba interese públiku ne’ebe garante iha Konstituisaun Repúblika Demokrátika Timor-Leste, artigu 40⁰ no 41⁰ kona ba liberdade imprensa no liberdade expressaun liu-liu média halo kobertura iha fatin públiku.

AJTL kontinua halo aprosimasaun no advokasia kona-ba importansia husi liberdade imprensa no expresaun iha nasaun demokrátiku, no insitituisaun hotu presiza komprende papel importante husi jornalista nian hodi fo sai asuntu públiku nian.

Liga ba kazu ne’e, AJTL sei halo konferensia imprensa iha tempu badak, hodi fo hanoin ba instituisaun públiku sira atu bele hatene no respeita papel jornalista iha Timor-Leste.

Iha Komunikasaun Sosial Nú. 5/2014, 19 de Novembru haktuir iha artigu 41⁰, wainhira atentadu ba liberdade informasaun :
1. Sei hetan pena-prizaun to’o tinan-rua ka multa ba ida-ne’ebé maka:
a) Impede ka perturba kompozisaun, impresaun, distribuisaun no sirkulasaun livre hodi halo publikasaun;

b) Tahan publikasaun sasá de’it;

c) Tahan ka hahaat materiál sasá de’it ne’ebé presiza hodi hala’o atividade jornalístika.

d) Impede asesu livre jornalista nian iha fatin públiku ka ekipa órgaun imprensa nian;

e) Halo aktu seluk sasá de’it ne’ebé perturba, impede hamosu ka hamenus kapasidade hodi hala’o atividade jornalístika nian haktuir lei ida-ne’e.

2. Funsionáriu públiku ka ajente Estadu, ne’ebé komete atentadu ba liberdade imprensa sei hetan kastigu hop ena-prizaun to’o tinan-tolu ka multa.

3. Tentativa nu’udar punivel.
4. Responsabilidade kriminál infratór nian, la hahaat direitu hodi fó indemnizasaun tuir saida maka hatuur iha rejime jerál responsabilidade sivíl nian.

Ligadu ho asuntu ne’e, SAPNews seidauk halo komfirmasaun ho parte Sekretariu Estadu Asuntu Toponomia no Organizasau Urbanu, Germano Santa Dias Brites kona ba asaun brutal ne’ebe ekipa SEATOU halo hasoru vendedor ambulante no impede jornalista halo kobertura ba asuntu públiku, maske nune’e maibe SAPNews sei kontinua kolleta informasaun hodi aktualiza iha tempu tuir mai.

Jornalista : Conzita Mota & Marciana da Conceição