SEFOPE Despede Trabalhador 43 ! Rogério Agradese Ba Governu Korea Sul
Imajem : Kandidatu Trabalhador Korea Sul hamutuk 43. Dili, 15/01/2025
SAPNewsTL, Díli — Sekretáriu Estadu Formasaun Profesionàl no Empregu (SEFOPE sigla Portugués) hamutuk ho reprezentante Governu Korea iha Timor-Leste, kontinua despedida trabalhador Timoroan hamutuk 43 ne’ebe sei desloka ba serbisu iha nasaun Korea do Sul iha loron 20 fulan janeiru tinan 2025.
SEFOPE Rogerio de Araujo Mandonça hateten, objetivu husi serimónia despedida ne’e hodi enkoraja trabalador sira obedese ba orientasaun legais ne’ebe Governu Timor-Leste estabelese ho Governu Korea hodi fó empregu ba trabalador Timoroan sira.
“Objetivu husi serimonia despedida ne’e, parte Governu hodi fo orientasaun ba trabalador sira, tamba ita hatene nasaun balun Timoroan sira hamosu komfrontu iha ema nia nasaun ho rajaun trabalador sira ne’ebe ba serbisu la hetan rekohnesementu husi Governu”.Dehan Sekretáriu Estadu Formasaun Profesionàl no Empregu (SEFOPE) Rogério Araujo Mandonça ba jornalista sira, iha salaun Multifunsional Timor Lodge, Quarta (15/01/2025)
Sekretáriu Estadu ne’e salienta, tuir dadus trabalador sira ne’ebe sei desloka ba Korea hamutuk 43 kompostu husi feto ida no mane 42, trabalhador ne’ebe pasa iha area peskas 23 no Fabrika 20.
“Ha’u agradese ba Governu Korea tamba bele fo oportunidade ba Timor oan sira, nune’e joventude sira nafatin kapasita an liu husi formasaun sira, to’o ohin loron sira konsege sai hanesan kandidatura trabalhador atu ba serbisu iha nasaun Korea,” Dehan Rogerio.
Imajem : SEFOPE Rogério Araújo Mendonça
Nia akresenta, ba trabalador sira tenki firme no kumpri regulamentu ne’ebe parte estadu rua estabelese, nune’e bele servisu ho kontroladu, atu hadia ekonomia familiar no apoiu prosesu dezenvolvimentu nasaun iha nasaun Timor-Leste.
“Juventude sira ne’ebe iha komitmentu atu ba serbisu tenki kumpri deklarasaun kompremetidu entre trabalhador ho Governu, nune’e bele hetan nafatin oportunidade ba servisu iha nasaun Korea, karik trabalador sira ba servisu labele halai sai husi sistema, nune’e ita boot sira hetan moras ruma, kompanhia sei selu fila fali osan renumerasaun indemniza tuir kontratu servisu ba ita bo’ot sira, bainhira hetan moras”.
Nia haktuir iha futuru Governu Korea sei loke tan oportunidade ba Timor oan sira atu ba serbisu iha area agrikultura no hospitalidade iha nasaun Korea, nune’e nia parte husu ba juventude sira atu bele prepara an ho diak hodi aproveita oportunidade ne’ebe sei mai.
Enkuantu, Reprezentante HDR Korea iha Timor-Leste, Kim Min Hee informa, Governu Korea hakarak parabeniza kandidatura traballador Timoroan 43 ne’ebe passa ona selesaun atu ba serbisu iha nasaun Korea do Sul.
“Governu Korea hakarak fo parabens ba trabalador sira hotu ne’ebe passa ona atu ba serbisu iha Korea, tamba ita hotu hatene katak, ita nia moris ohin loron la fasil maibe difisil, nune’e ba imi trabalador sira ba karik servisu tuir lei Korea nian ne’ebe vigor iha nasaun refere”.
Nia salienta, Governu Korea oferese programa barak ba nasaun hotu-hotu inklui Timor-Leste, nune’e trabalador sira ne’ebe atu ba serbisu Governu Korea sei oferese oportunidade ba serbisu nain sira ho prazu tinan lima (5) ate (10).
“Ha’u fiar katak imi sei servisu ho diak hodi dezenvolve ita boot sira nia familia no nasaun, tamba Governu Korea fo tempu ba trabalador sira serbisu tinan 5 to’o 10, entaun tempu ne’ebe naruk ba trabalador sira ne’ebe legal, atu serbisu ho diak depozita komfiansa ba Governu atu halo kontrolu ba trabalador sira nia servisu”.
Entretantu, iha serimónia despedida ne’e partisipa husi SEFOPE, familia trabalador no trabalador sira. Tuir dadus ne’ebe Diresaun Nasionál Empregu Estrangeiru (DNEE) mensiona, total trabalhador Timoroan iha nasaun Korea hamutuk seis mill (6) no trabalhador ne’ebe sei desloka tan ba Korea iha loron 20 fulan janeiru 2025 hamutuk 43 kompostu husi feto ida (1) mane 42, trabalador re-entri 15 no trabalador foun hamutuk 28
Jornalista: Guilhermino Ramos da Cruz
