SEKomS Aloka $ 150.000 ! Frekuénsia Ki’ik Sai Dejafiu Ba Rádiu Komunidade
Imajem : Jestora Rádiu Komunidade defisiente Timor-Leste Eufrosina Soares Bras iha Fundasaun Alola, 18/03/2025
SAPNewsTL, Díli — Governu liu-husi Sekretáriu Estadu Komunikasaun Sosiál (SEKomS) organiza reuniaun konsultivu hodi avalia relatóriu Fundus Transferênsia Públiku (FTP) 2024, tinan 2025 governu aloka osamentu ha rádiu komunidade hamutuk $ 150.000.
Sekretariadu Estadu Expeditu Loro Dias hateten, SECOMS liu husi Diresaun Nasionál Dezenvolvimentu Média reuniaun hamutuk ho jestór Radiu Komunidade sira hodi halo avaliasaun ba relatoriu FTP 2024 ne’ebe jestor Radiu Komunidade sira aprezenta.
“Ohin, ha’u halo enkontru ho jestor rádiu komunidade sira husi munisipiu hotu-hotu, atu halo avaliasaun, orsamentu ne’ebe durante ne’e ami transfere, liu husi transferênsia publikas ne’e, oinsa atu halo sira nia konta de responsabilidade.” Dehan Sekretáriu Estadu Komunikasaun Sosial Expeditu Loro Dias ba jornalista sira iha Balide, Tersa (18/03/2025).
Governante ne’e aprofunda, aleinde aprezenta relatoriu Fundus Transferência Públiku SEKOMS mos avalia kona-ba atividade jestaun radiu komunidade sira, durante hasoru dezafiu no oportunidade.
“Relatoriu avaliasaun, ami halo mos prosesu ba atividade radiu komunidade, iha 2025 nian, difikuldade no dezafiu ne’ebe sira hasoru, no mos oportunidade ne’ebe sira hetan tanba IX Governu konstitusional iha programa tinan lima ne’e fo atensaun maka’as ba iha Radiu komunidade”.
Sekretariu Estadu salienta, kada tinan governu sempre fo apoiu orsamentu ba rádiu komunidade sira no iha tinan 2025 Governu aloka ona osan, 150.000 ba radiu komunidade sira hodi bele halo jestaun ba atividade radiu nian.
“Atu bele fo atensaun ba iha atividade radiu komunidade, osan sira ne’e transfere ba radiu komunidade bainhira hato’o sira nia proposta, tanba tinan ida ne’e governu aloka osan kuaze 150.000 mil ba radiu komunidade sira”.
Expedito afirma, liu-husi reuniaun ne’e enkoraja jestor Radiu Komunidade sira atu entende kona-ba prosesu hato’o proposta ba governu hodi hetan osan atu responde ba atividade radiu nian kada munisipiu.
“Ohin, reuniaun ida ne’e atu sira bele komprende oinsa mak halo proposta tuir sira nia atividade ne’ebe iha tanba osan ne’ebe transfere liu husi transferensia publikus ne’e tenki bazeia ba sira nia proposta ne’ebe kabe ba orsamentu”.
Tuir nia, IX Governu Konstitusionál konsidera radiu komunidade iha papel importante hodi trasmite informasaun real ne’ebe akontese ba komunidade iha area rurais.
“Reuniaun ne’e fo hanoin atu jere radiu komunidade ne’e ho diak, tanba IX Governu konstitusional sente informasaun iha baze ne’e importante tamba informasaun iha media ne’e pilar importante ba demokrasia, no baze prinsipal ne’e mai husi komunidade iha area rurais, iha postu administrativu no munisipiu sira” Dehan nia.
Iha Fatin hanesan, Jestora Rádiu Komunidade defisiente Timor-Leste Eufrosina Soares Bras akresenta, nia parte husu ba governu prioritiza fundu parmanente ba radiu komunidade hotu-hotu hodi apoiu programa transmite informasaun ba públiku.
“Ha’u reprezenta kolega sira husu governu atu tau fundu ba radiu komunidade sira hotu liga ba implementasaun programa transporte ba kobetura nian, nune’e bele la’o iha munisipiu liu-liu ba defisiensia iha munisipiu tanba defisiensia barak mak iha munisipiu susar tebes atu hetan informasaun, rádiu komunidade defisiensia sempre halo visita ba fatin hotu foti deficiente iha munisipiu nia istoria moris hodi publika”.
Nia hateten avaliasaun transferensia publika 2025 nian iha avaliasaun ne’e problema ne’ebe radiu komunidade hasoru ida, haree liu ba frekuénsia ne’ebe mak ho distansia kobre ho velosidade kiik, nune’e públiku sira ne’ebe hela iha area rural difísil asessu informasaun.
“Notisia ne’ebe mak ami hatun iha Dili no mos iha munisipiu labele rona tanba ami nia frekuensia nee ki’ik, ami nia kobertura laos iha Dili deit, iha munisipiu halo kobertura ne’ebe mak ami foti notisia, entaun hosi munisipiu ne’e labele rona tanba iha frekuénsia ne’ebe mak kiik liu ida ne’e mak sai hanesan ami nia problema ida ba iha ami nia radiu komunidade”.
Entretantu, iha sorumutu ne’e partisipa husi Sekretáriu Estadu Komunikasaun Sosiál Expedito Loro Dias, Xefi Departamentu sira ekipa tekniku no jestor Radiu Komunidade.
Jornalista : Anina Gama & Dircia Baptista.
