SEKomS Kontinua Habelar Programa Suku Digital Iha Kampung-Alor
Imagen : SEKOMS, Expedito Loro Dias iha Sede suku Kampu Alor,Tersa-Feira 09/12/2025.
SAPNewsTL, Díli : IX governu konstitutional liu husi Sekretariu Estadu Komunikasaun Sosial (SEKOMS), servisu hamutuk ho autoridade suku halo lansamentu ba plataforma website iha suku Kampung Alor, Postu Administrativu Dom Aleixo, Munisípiu Díli.
Sekretariu Estadu Komunikasaun Sosial (SEKOMS), Expedito Loro Dias Ximenes hatete, importancia ba implemantasaun programa suku dijitál sai hanesan politika IX governu nian, atu lori servisu informasaun ba povu.
“Lansamentu sentru informasaun suku iha Kampung Alor, hanesan pasu ida hosi politika IX Governu nian, no la’ós hela deit hanesan polítika iha surat tahan, maibe ho prontidaun suku Kampung Alor hakarak simu, nune’e ita implemanta hodi kria website hodi halo komunidade sira bele asesu informasaun ne’ebe los no kredivel” Dehan SEKOMS, Expedito Loro Dias iha Sede suku Kampu Alor,Tersa-Feira (09/12/2025).
SEKOMS haktuir, lansamentu sentru informasaun suku kampu Alor atu responde lakuna iha área teknolojia informasaun no komunikasaun nian ne’ebe atu lori servisu informasaun ba povu sira iha suku no hamenus diferensa iha asesu informasaun entre autoridade no komunidade sira.
“Konseitu Suku Dijitál mak utilizasaun teknolgia Internet (IT), iha servisu públiku, ekonómia, sosiál no kulturál, hodi hamenus diferensia dezenvolvimentu ne’ebe existe entre sidade no suku la’ós buat ki’ik. Diferensa iha populasaun, ekonomia no infraestrutura bele lori impaktu ba moris diak povu nian. Tanba ne’e, suku hotu tenke iha kapasidade atu akompaña mudansa teknolojiku, liu-liu evolusaun dijital”.
Sekretariu Estadu espera katak, ho sinerjia di’ak entre governu sentral, autoridade suku no komunidade, ne’ebe kria suku dijitál bele empodera komunidade sai kritiku, no partisipativu iha suku”.
“Suku dijitál mak katalista ida servisu públiku no mais ekonómiku liuhusi servisu online, website, rede sosiál ho objetivu bo’ot servisu públiku sai transparente no responsavel, komunidade sai kritiku no partisipativu, nune’e suku sai forte iha ekonómia, kultura no identidade rasik”.
Iha fatin hanesan, sefe suku Kampung Alor Estela Aleixo informa, autoridade hamutuk ho komunidade suku kampu Alor hato’o agradesimentu ba apoiu husi IX governu liu-husi Sekretariu Estadu Komunikasaun Sosial ne’ebe implemanta programa sentru informasaun suku no fasilita formasaun kona-ba website.
“Nu’udar autoridade suku hamutuk ho komunidade agradese no apresia tebes ba programa sentru Informasaun suku ne’ebe implemanta iha ami-nia suku ho apoiu ida ne’e, mak ami-nia suku Kampung Alor bele tama ona ba plataforma dijital”.
Autoridade ne’e tenik, hanesan autoridade suku sente orgullu tamba liu husi website bele fasilita komunidade sira bele asesu informasaun.
“Lansa plataforma digital ne’e hodi fasilita ami-nia servisu no informasaun atu hafasil ami-nia komunidade asesu informasaun sira iha suku laran”.
Enkuantu, programa sentru Informasaun suku ne’e primeiru lansamentu iha Suku Mascarenhas, segundu iha suku Bidau Santana no terseiru iha suku Kampu Alor.