SEKomS Sei Kontinua Apoia Média Sira Bazeia Ba Prestasaun
Imajem : SEKomS Expedito Dias Ximenes halo enkontru ho liderança média nasional sira iha Salaun Konsellu Imprensa Kintal-Boot, 13/01/2026
SAPNewsTL, Dili : Sekretariu Estadu Komunikasaun Sosial (SECOMS) Expedito Loro Dias Ximenes hala’o enkontru ho xefe redasaun, diretór mídia, no assosiasaun jornalista sira hodi halo reflesaun no reafirma pozisaun servisu hamutuk ne’ebe baseia ba prestasaun.
“Ha’u lori governu nia naran agradese ba media sira, diretor informasaun, xefe redasaun, editor no jornalista sira ba ita-nia servisu, maske la perfeitu maibe pelu menuz ita hala’o kna’ar hanesan orgaun komunikasaun sosial. Iha ne’ebe povu tomak iha rai laran no moos rai liur akompaña produtu jornalistiku ne’ebe ita halo durante 2025”. Dehan Sekretariu Estadu Komunikasaun Sosial Expedito Loro Dias Ximenes liu husi nia diskursu iha Salaun enkontru Konsellu Imprensa, Quintal Bo’ot, Dili 13/01/2026.
Sekretariu Estadu Espedito Ximenes afirma, desde IX guvernu konstitusional nia mandatu hahú sempre servisu hamutuk ho instituisaun media sira hodi garante produtu jornalistiku ne’ebe diak no kualidade.
“IX guvernu desde hahu nia sempre servisu hamutuk ho media sira hanesan nain ba media, xefe redasaun no diretor informasaun ne’ebe kaer jestaun media iha orgaun komunikasaun sosial hotu no jornalista sira ne’ebe hala’o ka’ar ho diak”.
Expedito Loro Dias hateten, tinan 2026 SECOMS sei nafatin halo parseria ho media konvensional, privadu no plataforma dijital maibe ho programa ne’ebe diferente ho tinan 2025.
“2026 Sekretariu Estadu Komunikasaun Sosial sei nafatin servisu hamutuk ho media konvensianal sira, privadu no media plataforma dijital sira. Maibe iha diferensa tanba iha 2026 orsamentu ne’ebe menus maka ita-nia kooperasaun sira ne’e karik kuantidade osan sei la boot hanesan 2025 nian”.
“Ami hanoin katak ita halo ita-nia servisu hamutuk ne’ebe bazeia ba prestasaun servisu, katak imi halo servisu, halo invoise, hafoin ami selu”.
SECOMS akresenta, servisu hamutuk iha tinan 2025 media konvensianal sira, privadu no media plataforma dijital sira asina no servisu tuir kontratu ne’ebe iha, maibe tinan 2026 diferente.
“Drante ita halo ne’e asina kontratu no tenke halo tuir saida maka asina iha kontratu, se imi la halo ami la selu. maibe konseitu ida ami hanoin atu halo tanba ne’e maka ohin ita mai hamutuk iha ne’e atu diskute”.
“Ami fo opsaun ida katak ita boot sira halo servisu ne’ebe ami husu (haruka) ita boot sira halo tiha haruka invoice mai ami selu tuir osamentu ne’ebe ami iha, ami halo bainhira orsamentu ba imi nian hotu ona kerdijer ita-nia prestasaun servisu hamutuk hotu ona, apoia bazeia ba prestasaun, proporsional tuir antiguidade”. Nia hakotu