SEKomS & UNITAL Lansa Website & Rádiu Streaming
Imajem : Sekretariu Estadu Komunikasaun Sosial (SEKomS) Expedito Loro Dias Ximenes lansa website no rádio streaming iha Salaun UNITAL Bekora, 21/10/2025
SAPNewsTL, Dili : Sekretariu Estadu Komunikasaun Sosial (SEKOMS) hamutuk ho Universidade Oriental Timor Lorosa’e (UNITAL) lansa Website no radio streaming hodi desimina informasaun Universidade nian ba públiku.
Marcela Mery- SAPNews
Sekretariu Estadu Komunikasaun Sosial (SEKomS) Expedito Loro Dias sente orgulhu ba UNITAL tanba iha hanoin atu nafatin dezenvolve kapasidade iha area komunikasaun sosial liu-liu iha area radio no televisaun hodi tatoli informasaun universidade nian
“Lansamentu ofisial ba website no radio streaming Universidade Oriental Timor Lorosa’e, ne’e bele hateten katak hatudu pasu ne’ebe ita atu moderniza ita-nia komunikasaun sosial iha Universidade”.
“Nune’e ha’u lori IX governu konstitusionál hakarak hato’o parabens ba magnifiku reitor no dosente sira hotu tanba hakarak adapta ritmu teknolijia ho inovasaun dijital ne’ebe mak sai nesesidade loron-loron ba ita hotu”.Dehan Sekretariu Estadu Komunikasaun Sosial (SEKomS) Expedito Loro Dias iha diskursu, iha salaun UNITAL, Tersa feira (21/10/2025).
SEKomS haktuir lansa website no radio streaming Universidade Timor Oriental (UNITAL), ne’e hodi bele hala’o aktividade diseminasaun informasaun, konserteza ne’e laos interse universidade nain deit maibe interere komunidade tomak tanba frequensia radio ne’e bele kobre ba area Becora no bele kobertura mos iha area sira ne’ebe mak besik.
“Ha’u lori IX governu konstitusionál agradese ba reitor no professor sira tanba sira komprende, oinsa tau importansia ba informasaun ba komunidade no universidade, husi radio no website ne’e bele ajuda publika informasaun”.
Iha fatin hanesan, Vise reitor 2 ba asuntu Administrasaun no Finanças Cecilio Alves da Costa Belo salienta Universidade hakat pasu isalientue komunikasaun sosial nian, ne’e hanesan parte kiik ida husi UNITAL nian maibe ne’e mos importante tebes atu bele divulga informasaun ba sosiedade sira, nune’e sira husu SEKomS atu monitoriza informasaun.
“Ami husu ba SEKOMS atu fo atensaun mai ami-nia media ne’ebe mak foin lansa, banhira ami divulga informasaun ne’ebe mak la los bele fo hanoin mai ami, nune’e ba futuru oin mai bele diak liu ba universidade no ba povu Timor-Leste”.
Vise reitor ne’e informa Universidade Oriental Timor Lorosa’e nia fakuldade hamutuk hitu (7) no departamentu 53, iha mos pos graduasaun materadu nian rua(2) iha programa gestaun no direitu.
Enkuantu, iha aktividade Lansamentu ne’e partisipa husi Sekretario Estadu Komunikasaun Sosial (SEKOMS) Expedito Loro Dias, Vise reitor 2 ba asuntu Administrasaun no finansas Cecilio Alves da Costa Belo, Vise reitor 1 asuntu akademika no Estudantil, Dekanu no Dekana, dosente no estudante sira.