SEKoop & AMCPF Lansa Filmagen “Kumpri Promesa Ba TL”
Imajem : Lansamentu kasting film iha salaun Kolegiu São Miguel Arcanjo Rai Kotu, Sabadu, (04/10/2025).
SAPNewsTL, Díli : Sekretáriu Estadu Koperativa (SEKoop) Arsénio Pereira da Silva, deklara, lansamentu ofisial prosesu selesaun kasting filmagen ho titulu, Kumpri Promesa ba Timor-Leste, memorializa jerasaun foun komprende kona-ba prosesu luta estudante timoroan iha tempu rezistensia.
Iha diskursu SEKoop Arsénio Pereira hateten, objetivu lansamentu kasting ne’e atu produs filmagen no fó oportunidade ba jerasaun foun sira atu sai hanesan artista no autor ba filmagen istória Timor.
“Filmagen ne’e hatudu memoria asuain juventude sira halo aktividade luta ba independénsia nian iha tinan 1995 iha Indonesia, Ministru Komersiu e Industria (MCI) hanesan mós sai autor ba luta ida ne’e nian”. Dehan SEKoop iha salaun Kolegiu São Miguel Arcanjo Rai Kotu, Sabadu, (04/10/2025).
SEKoop Arsénio salienta, filmagen ne’e atu hamosu konsiensia patriotismu ba juventude sira atu bele hatene verdade kontribuisaun istória no sakrifísiu ne’ebé estudante sira halo rezisténsia iha Indonesia nian rai durante rejime Suharto.
“Iha aktividade lubuk ida ne’ebe ita iha inimigu nian kabun laran, ita luta ba independensia, MCI, Nino Pereira, iha inisia hakarak halo filmagem, inisiativu hakerek mós livru ida kona-ba Pelompat Pagar, iha livru ne’e ha’u mós inklui an barak los iha ne’eba, konaba aktividade RENETIL nian”.
Nia hatutan, filmagem ida ne’e atu memorializa jerasaun foun sira tuir mai hodi senti asuain lubuk ida ne’ebe ho sira-nia dedikasaun no totalidade ba rai no povu ida ne’e ninia independénsia, lutador sira uluk terus hahu husi fundador estadu no inisiador funu ba independénsia ne’ebe luta kontra injustisa hakarak independemsia iha rai ne’e no sira balun laiha ona.
“Ita-nia filmagen Kumpri Promesa ba Timor-Leste, sei produz husi Asosiasaun Membru CEGNAG Production Film (AMCPF), hanesan atu valoriza istória nasionál no edukativu sosiedade kona-ba luta ba independénsia”.
Entretantu, lansamentu ofisial ba prosesu kesting filmagen ne’e marka prezensa, husi Sekretaria Estadu Arte no Kultura, Dirijente husi AMCPF no mós Juventude sira ne’ebe tuir prosesu seleksaun kasting.