Selebra 12 Novembru, Foinsa’e Labele Hatudu De’it Ninia Beleza
Imajem : Mate Restu 12 Novembru, Jacinto da Costa iha Luro, 11/11/2024
SAPNewsTL, Dili : Durante semináriu ne’ebe foinsa’e sira hala’o iha Luro, Mate Restu 12 Novembru Jacinto da Costa husu foinsa’e sira atu labele hatudu deit ninia beleza maibe buka hatudu mós ninia bele liu hosi kreatividade.
“Ha’u nia naran Jacinto da Costa hadomi rain no servi to’o mate, ha’u hakarak husu ba foinsa’e sira atu labele hatudu deit ninia furak ka beleza, maibé tenki hatudu ninia bele, hatudu kreatividade, iha hanoin boot, halo boot ba imi nia futuru, muda imi nia hanoin hodi muda imi nia moris”. Tenik Jacinto da Costa iha palestra, Luro,11/11/2024
Mate restu 12 Novembru 1991 ne’e dehan joven sira tenki buka estuda didiak, eskola didiak, halo didiak hodi hetan futuru ne’ebe diak liu iha futuru, ohin karik bele moris iha situasaun ne’ebe difisil maibe tenki tau iha hanoin hodi esforsu makaas,nune’e bele sai ezemplu ba ema seluk.
“Imi tenki eskola didiak, halo didiak, hodi hetan rezultadu ne’ebe diak iha futuru, se agora moris iha situasaun ne’ebe difisil, entaun tenki esforsu hodi konkista mudansa iha tempu oin mai, tanba futuru imi nian, ha’u dehan ida ne’e tanba ha’u hadomi imi nia futuru”. Jacinto hateten
Jacinto mós fo agradese ba Prezidente Klibur Foinsa’e Fini Lautém tanba bele komunika hodi bele fo palestra ba jovens Luro oan sira.
“Ha’u fo agradese ba Prezidente Klibur Foinsa’e Fini Lautém Jorge Alves no Prezidente Komisaun Organizadora tanba bele komunika ha’u mai Luro hodi fo palestra ba imi joven sira”. Nia agradese
Iha fatin hanesan, Administrador Postu Administrativu Luro Gaspar Xavier hateten loron masakre santa kruz, loron refletivu ne’ebe importante tebes ba joven sira, joven sira tenki foti ona responsabildade ba ninia rain tanba futuru iha joven sira nia liman.
“Ohin loron ne’ebe importante ba imi joven sira, imi mai aprende, foti matenek no sai matenek liu hosi semináriu sira ne’ebe imi tuir, loron masakre fo atensaun ba ita hotu katak vitoria ne’e tenki halo sakrifisiu no dedikasaun forte, imi tenki kuda ispiritu unidade no asume responsabilidade”. Administrador Luro Gaspar Xavier sublinha
Prezidente Komisaun Organizadora Luis Ribeiro Soares haktuir komisaun realiza atividade sira hanesan semináriu, kompetisaun diskursu públiku, kompetisaun salmu, aklamasaun no lee biblia, halo refleksaun, loke filmajem, selebra misa agradesimentu, sunu lilin no kari aifunan.
“Komisaun Organizadora ne’ebe forma hosi Klibur Foinsa’e Fini Lautém, Foinsa’e Katólika Luro no Alumni Joven Ba Mudansa Postu Luro, ami servisu hamutuk maka realiza semináriu, kompetisaun diskursu públiku, kompetisaun salmu, aklamasaun no lee biblia, halo refleksaun, loke filmajem, selebra misa agradesimentu, sunu lilin no kari aifunan”. Luis Ribeiro sublinha
Orador sira ne’ebe hala’o palestra iha seminariu ne’e maka Mate Restu 12 Novembru Jacinto da Costa (Transmite Valor Resisténsia Ba Jerasaun Foun hodi hametin ispiritu patriotismu no nasionalizmu ba dezenvolvimentu nasionàl), Diretor Mídia SAPNewsTL Sergio Alves da Costa (Papel Mídia Iha Luta Libertasaun Nasionál) no Pontu Fokal MJDAK Luro António Belo (Polítika Governu liu hosi MJDAK ba dezenvolvimentu juventude).
Semináriu ne’ebé hala’o iha postu administrativu Luro Munisípiu Lautem hetan partisipasaun maksimu hosi autoriedade lokal sira, estudante sira no komunidade sira hamutuk atus ida limanulu (150).
Jornalista : Januário Pinto