Selebra Idul-Fitri ! Ibrahim : “Tempu Ba Domin, Damen & Ksolok”
Imajem : Pastor Ibrahim Soares iha Masjid Annur Dili, 31/03/2025. Foto : Marciana da Conceição
SAPNewsTL, Dili : Komunidade Musulmanu Timor-Leste selebra loron Idul-Fitri ho perdaun, ksolok, damen no fraternidade, hafoin halo jejum durante fulan Marsu 2025.
Pastor Ibrahim Soares haktuir Idul-Fitri katak loron ne’ebé komunidade musulmanu selebra sira nia ksolok, livre no susesu durante jejum fulan ida (01-31/03) tanba bele tahan an to’o ohin loron.
“Sarani Musulmanu selebra Idul-Fitri katak hahú fila fali han no hemu tanba durante fulan ida halo jejum, tahan sira nia an hodi la han no lá hemu, tahan ibun hodi la hasai liafuan ladiak, haree malu hanesan maun ho alin”.
“Ohin ne’e tempu atu ita tenki fo deskulpa ba malu, haree malu no hakuak malu ho matan-ween, buka damen, dalan los no naroman ba malu iha mundu ne’e”.Teni Pastor Ibrahim Soares ba SAPNews iha Majid Annur, Dili, 31/03/2025
Ibrohim Soares husu ba família sira hodi moris iha domin, damen no respeitu malu hodi hatudu ezemplu no eduka oan sira ba futuru.
“Família sira tenki moris iha domin, fen ho laen tenki respeitu no hadomi malu, fen respeita laen no laen respeitu fen, labele baku no tolok fen no oan sira arbiru, ita tenki tanis hodi rekunhese ita nia sala hodi hatudu ezemplu dial no eduka oan sira ba futuru”.
“Ita tenki iha tolerânsia ba malu, haree malu didiak, respeitu ba malu, fo oportunidade atu fo perdaun ba malu, asegura damen tanba ita la seluk la leet, ita mesak timoroan, ita iha relijiaun la hanesan maibé ita tenki hatudu domin, rekunhese pasadu no hari’i ita nia futuru ne’ebé diak liu”.
Ibrohim mós husu ba joven sira hodi eskola didiak, labele involve iha konflitu no prepara an tanba futuru nasaun iha joven sira-nia liman.
“Ba joven sira labele tuku malu no baku malu, imi tenki eskola ho lolos, ita nia lider sira agora ne’e katuas dadaun ona, ita joven sira mak sei kaer nasaun ne’e, tanba ne’e tenki estuda didiak”. Nia fo hanoin
Imajem : Komunidade Musulmanu Isac da Costa de Jesus
Komunidade Musulmanu Isac da Costa de Jesus konsidera ne’e loron Idul-Fitri hanesan loron ne’ebé importante tebes ba islâmiku sira mundu hodi selebra sira nia ksolok no susesu ne’ebé hetan durante fulan ida.
“Loron ohin ami selebra ami nia susesu ida ne’e katak durante fulan ida ami tahan an, halo jejum, la han no hemu, la fuma sigaru, entaun ohin ami selebra loron ksolok ida ne’e, tuir lolos ita bele kontrola an husi buat aat, ita bele hadia an diak liu no ser Musulmanu ne’ebe diak liu”.
“Ita joven, ita bele halo mudansa, bainhira ita hakarak, hakarak ne’ebé mai hosi laran, ita bele tahan an hosi hahalok demóniu sira, dala ruma ita provoka malu, oan ne’ebé la respeitu inan aman no lider sira karik, ita bele halo reflesaun hodi halo diak, respeitu ita nia inan aman no lider sira liliu haree malu hanesan maun alin”. Nia sublinha
Isac akresenta ho ispíritu idul-fitri bele fanun ema hotu bele konkretiza valor jejum liu hosi perdua malu, agradese ba Maromak no hakbesik an nafatin ba Maromak hodi sai ema ne’ebé diak.
“Valor jejum ne’ebé ita hetan hosi Alquran (Bíblia), ita pratika iha ita-nia moris, tanis ba ita-nia salan hodi husu perdaun, harohan ba Maromak katak sein Maromak ita laiha buat ida, ita hakbesik an ba Maromak katak la hotu iha ne’e no sai ser ne’ebé diak liu”. Nia hakotu.
Enkuantu, tinan ne’e komunidade musulmanu selebra loron idul-fitri ba dala 1446 Hijriah no hetan partisipasaun maksimu hodi musulmanu sira kapital Dili inklui hosi munisipiu sira.
Jornalista : Marcela Mery da Costa & Marciana da Conceição