Selebra Jubileu de Prata ! Pe. Mouzinho : Jesus Mak Ha’u Nia Segredu

SAPNewsTL, Bobonaro – Tinan XXV selebra Jubileu de Prata, Padre Mouzinho Pereira Lopes hateten. Na’i Jesus mak segredu moris iha vokasaun saserdotal iha tempu desperasaun ne’ebe hamosu desanimada, bainhira serbi uma kreda katolika

Iha entrevista Jubilante Padre Mouzinho Pereira Lopes afirma, ho felisitasaun ksolok tebes, iha ambitu selebrasaun Jubileu de prata 25 anos vida saserdotal. Tamba maromak nia grasa halibur hamutuk familia, amu-lulik, Bispu sira, Kardeal no sarani sira, hodi hato’o agradesimentu ba maromak liu husi selebrasaun misa agradesimentu.

“Selebrasaun Jubileu de prata signifikativa obra maromak nian boot tebes ne’ebe ami simu hodi hala’o misaun nu’udar nai-lulik. iha momentu ne’ebe defisil to’o ohin loron, tamba Jesus mak sai hanesan segredu moris iha vida saserdotal”. Dehan Padre Mouzinho Pereira Lopes ba SAPNews iha igreija Paroquial Maliana, Sabadu (15/06/2024)

Nia salienta, Jubileu de prata signifika selebrasaun 25 anos 50 anos 75 no 100 anos padre sira moris iha vokasaun amu lulik, hodi hala’o kna’ar sagradu ne’ebe serbi maromak. Bainhira mosu defeitu atu kontra vokasaun, Jesus kristu mak sai hanesan sigredu moris iha tempu ne’ebe padre sira hala’o kna’ar hodi serbi uma kreda katolika no apostolika, Tenik nia.

“Jesus kristu mak sai ha’u nia kbiit to’o ohin loron, ha’u hambrik mesmu hasoru dezafiu oin-oin maibé jesus kristu mak hanorin ami hala’o obra ida ne’e, durante tinan 25 obstakulu ne’ebe ami enfrenta mak diminuisaun fé, ema barak mak la hambrik metin hodi fiar ba maromak sira sempre ignora balun hodi fiar liu ba kultura”.

Diretor Nasionál Missio Timor-Leste (Pontificias Obras Missionérias) Padre Mouzinho akresenta, Timor-Leste moris ho kultura ne’ebe beiala sira husik hela to’o ohin loron entaun ema balun haluhan maromak hodi adora liu ba lulik sira.

“Ho espíritu loron Jubileu ha’u husu ema hotu-hotu tenki konvense rasik sira nia fuan hodi fiar nai jesus kristu tamba espetativa oin-oin mai ho komunikasaun, asaun sira, planu no hahalok sira hotu ho nia esperansa lolos hun no abut mai husi, Jesus Kristu. Tamba obra ne’ebe nai Maromak haruka ita halo la hanesan ida ne’ebe tuir ema nia hakarak”. nia haktuir

Aleide ne’e, liga ba vizita Santo Padre Papa Francisco nian mai Timor-Leste Padre Mouzinho Pereira Lopes esplika, moris nu’udar humano nu’udar sarani, tenki hatudu fidelidade konfiasa ba maromak bainhira nai jesus kristu nia saseluk mai Timor-Leste.

“Sarani sira tenki tau iha konsiderasaun bainhira, Santu padre nia prezensa iha ita nia le’et tamba vizita ida ne’e sei lori dame, domin, ksolok no bensaun ba ita hotu. tamba laos imi nia kultura mak sai imi nia fiar maibé imi nia fiar mak sai kultura”.

Entertantu Padre Mouzinho Pereira Lopes hao’o mensajen ba Juventude katak keta tauk atu tuir Jesus Kristu. tamba obra ne’ebe ema halo loron ida sei mate maibé maromak nia obra sei la mate, Nia hakotu.

Jornalista : Marciana da Conceiçao & Guilhermino Ramos da Cruz