Selebra Loron Balibo Five & Liberdade Imprensa ! SAP News “Sai Lian Ba Lian Laek”.

Imagem : Estrutura Exekutivu & Jornalista Mídia SAPNewsTL.

SAPNews TL, Balibo : Relativamente ho loron nasionál liberdade imprensa, Mídia Sapnews kontinua firme defende lialos, justiça no sai lian ba lian laek sira ho baze la mai atu ema servi maibe atu servi nu’udar ida ne’ebe servi.

Media SAPNewsTL nu’udar meiu komunikasaun sosiál ida ne’ebe hari husi estudante universitáriu sira, formandu jornalizmu profisional sira no estudante sekundaria sira, iha ne’ebe hamriik nu’udar mídia online ho prinsipiu informativu, inspirativu, konstrutivu, produtivu, kritiku no edukativu hodi hari’i sosiedade Timor-Leste ida justu, prósperu, solidáriu no fraternu.

SAPNewsTL nu’udar órgaun komunikasaun sosiál ida neʼebé livre no independente hosi podér polítiku no podér ekonómiku, iha ne’ebe sei dezenvolve nia atividade editoriál ho liberdade no karakter jornalizmu ida ne’ebé iha kualidade.

SAPNews hala’o nia atividade jornalistika diáriu hodi garante no promove prinsipiu governasaun di’ak, kontrolu sosiál, inspirativu, divertimentu no kaer metin kultura dame, domin, unidade, lialos, justisa, liberdade, demokrásia no responsabilidade.

Loron 16 fulan outubru 2025, loron nasional ba liberdade imprensa no komemorasaun Trajedia Balibo 5 ba dala 50° nu’udar reflesaun ida ba orgaun komunikasaun sosial no jornalista sira hodi kontinua hadia ninia produtu jornalistika ida kualidade, imparsial, profissional no pluralismu hodi asegura direitu públiku asesu informasaun no hato’o opinião.

SAPNews hamrik ho orgullu tebes hodi refleta ba loron importante ida ne’e ho tema Jeral “Liberdade Imprensa ba Lialoos no Justisa” hodi servi inan aman sira, joven sira no sidadaun hothotu liu hosi halian lian sosiedade nian no sai lian ba lian laek sira ho baze informativu, inspirativu, konstrutivu no la mai atu ema serví maibe atu servi nu’udar ida ne’ebe servi.

SAPNewsTL hanesan orgaun komunikasaun sosiál ida ne’ebe ho fins lukrativu no hambriik estimula sosiedade fornese informasaun justu hodi asegura direitu sidadaun hotu nian ne’ebe fundamenta iha Konstituisaun Repúblika Demokrátika Timor-Leste Artigu 40° no 41° nian, kona-ba Liberdade Imprensa no Liberdade Expressão, kumpri kode etika jornalismu 10 no lei nú. 5/2014 kona ba lei komunikasaun sosial.

Ho espíritu loron nasional liberdade imprensa no tinan 50 Trajédia Balibo, SAPNews afirma katak :

1. SAPNewstTL sei kontinua espiritu independénsia, transparansia, Profisionalidade, integridade no imparsiálidade, kumpri ba padraun universal jornalistiku, obedese ba Kódigu Étika Jornalistiku no lei oan sira ne’ebé estadu Timor-Leste hatuur ba orgaun komunikasaun sosial.
2. Governante sira no orgaun judisial sira no públiku em jeral presiza respeita liberdade imprensa iha Timor-Leste hodi garantia direitu públiku asesu informasaun no hato’o informasaun tuir lei inan RDTL.
3. Ami mos hakarak aproveita biban ne’e hodi husu deskulpa ba públiku karik ami nia kobertura seidauk to’o ba fatin hotu iha territoriu nasional no ami nia publikasaun sira la tuir ita boot sira espetativa, dala ida tan ami husu deskulpa, maibe ami kontinua rona imi nia sujestaun no kritika sira hodi hadia ba futuru.
4. Ita nia ranking mundial liberdade imprensa hosi NGO Repórtagem Sem Fronteiras (RSF) tun husi top 10 ba top 20 no tinan 2025 monu ba top 39, maske nune’e maibe ita hotu kontinua firme hodi defende liberdade expresaun, direitus humanos, igualdade, akontabilidade, justisa no moris diak ba sidadaun tanba ranking ne’e la sai sasukat hodi defende lialos no justisa iha Timor-Leste.
5. Mai ita fo onra no glória ba jornalista nain lima nebe mate iha trajedia Balibo, 16 Outubru 1975 hanesan jornalista Gregory Shackleton, Anthony Stewart, Gary Cunningham, Malcolm Rennie, no Brian Peters. no sira seluk ne’ebe mate ba luta rezistensia povu maubere nian.
6. Ikus liu, Lori Konseleiru, Ezekutivu no jornalista SAPNews nia naran la haluha hato’o parabens no paranbens ba midia nasional no internasional sira hotu, parabens ba jornalista sira hotu.

Balibo, 15 Outubro 2025

Clementino Bragança Machado

Presidente SAPNewsTL