Selebra Loron Jubileu ! Palku Vokasional Misionária Transforma Ema Sai Sarani Diak

SAPNews TL, Bobonaro – Iha ámbitu preparasaun ba selebra loron Rekordasaun Jubileu de Prata Saserdotal ba dala 25 Padre Mouzinho Pereira Lopes konsidera aprezentasaun Palku Vokasional Misionária la hanesan ho palku sira seluk.

Padre Mouzinho Pereira Lopes hateten, liu husi apresentasaun Palku Misionária Vokasional bele transforma ema sai aman diak, inan diak, sarani diak, Madre diak no sai nai lulik diak tuir, Jesus Kristu nia hanorin

“Iha kalan ida ne’e, ita hotu hamutuk hodi asiste apresentasaun Palku Misionária Vokasional ne’ebe hatudu sentidu uniku tebes, tamba Palku Vokasional Misionária la hanesan ho palku sira seluk ne’ebe babain ita haree maibe transforma ema sai ema diak ba oin.” Dehan Padre Mouzinho Pereira Lopes liu husi nia diskursu iha Salaun Paroquia Maliana, Sexta (14/06/2024)

Nia hatutan ohin loron ema hotu moris iha domin nia laran, nune’e atu hakbesik aan ba maromak hodi moris tuir doutrina maromak nian, tenki sai inan-aman no sarani diak ba ema hotu.

Iha apresentasaun ne’e hetan animasaun husi banda musika Fokadima, no grupu banda sira seluk hodi festeza loron Jubileu de Prata Saserdotal, Padre Mouzinhu Pereira Lopes no Padre. Lúcio Norberto de Deus ba dala 25 sai nu’udar na’i lulik hodi serbi uma kreda katólika.

Tuir agenda, ohin loron (15/06/2024) sei iha misa agradesimentu ne’ebe sei hala’o iha igreja Pro Katedral Maliana, prezide husi Dom Virgilio Cardeal do Carmo da Silva nu’udar simbolu agradesimentu ba loron saserdotal padre na’in rua nian.

Entertantu, iha serimonia apresentasaun Palku Misionária Vokasional ne’e sarani Dioseze Maliana antusiasmu hamutuk ho Bispu Dioseze Baucau Dom Leandro Maria Alves, Padre, Madre, no seminarista sira hodi selebra loron Jubileu de Prata Saserdotal, Padre Mouzinhu Pereira Lopes no Padre Lúcio Norberto de Deus ba dala 25

Jornalista : Marciana da Conceiçao & Guilhermino Ramos da Cruz