Selebra Susesu Ho Retratu Mama Nian ! Ernesto Rekunhese Susesu Lases Husi Dejafiu

SAPNewsTL, Díli – Graduadu Universidade Nasional Timor Lorosa’e (UNTL) Fakuldade Edukasaun, Ernesto da Costa fo agradese ba Aman Maromak ne’ebe fo kbi’it no beran, no familia sira hotu ne’ebe apoiu finansial, moral no material hodi sustenta nia to’o hetan susesu.

Graduadu Fakuldade Edukasaun Artes humanidades Ernesto da Costa ho gratidaun fo agradese ba Aman Maromak tanba bele fo kbi’it no espiritu sabedoria ba nia hodi estuda iha UNTL to’o hetan graduasaun.

“Agradese ba Na’i Maromak liu husi Na’i Jesus ne’ebe sempre fó nia kbi’it mai ha’u, senti orgullu  bainhira hetan graduasaun iha universidade, durante luta iha prosesu estudu nian ne’ebe difisil tebes  maibe sempre ho pasiénsia, esforsu ho vontade tomak ohin loron bele to’o duni faze graduasaun”. Tenik graduadua FEAH-UNTL Ermesto da Costa ba SAPNews iha Díli, 12/07/2024.

Ernesto mos fo agradese ba nia aman no inan (matebian) ne’ebe kuidadu, proteze, suporta no fo korajen ba nia iha tempu susar, terus no difisil nia laran to’o oan mane hetan susesu iha UNTL.

“Agradese no obrigadu wain ba Pai no  Mae (Matebian) ne’ebe ho domin orasaun suporta ha’u tuir kbi’it ne’ebe iha, agradese no obrigadu wain mos ba familia sira hotu ne’ebe akompaña, fo motivasaun, suporta tantu material, siensia no espiritual durante hala’o ha’u nia prosesu estudu ida ne’e”.Nia Agradese

Graduadu ne’e mos agradese ba dosente sira ne’ebe transmite siensia ho dedikasaun, orientasaun no disponibilidade hotu ohin bele finaliza nia estudu hodi hetan susesu.

“Agradese no obrigadu wain mos ba Dosente sira hotu ne’ebe transmite ona siensia mai ami ho nia dedikasaun, orientasaun no disponibilidade hotu, ohin ha’u bele liu iha faze ida ne’e, ba kolegas no ema hotu ne’ebe iha inisiativa tulun ona ha’u agradese no obrigadu wain ba imi hotu”.

Graduadu ne’e mos sente triste tanba selebra nia susesu sein mama nia prezensa, tanba Maromak nia planu oin seluk bolu sedu nia inan, iha momentu ne’ebe Ernesto sei esforsu hodi realiza esperansa ne’ebe nia mama iha.

“Ha’u senti triste tanba momentu prezensa ha’u nia inan ne’ebe ho domin  bo’ot,  sempre motiva ha’u, mesmu  ke ha’u inan ne’e la senti naroman, la hare’e beleza mundu nian maibe ami fila husi foho ba fali sidade ne’e  sempre hameno liafuan dehan “Ba haree dalan, eskola didiak , kuidadu-an haree malu diak, lalika halo problema tanba ha’u ida o nia inan ne’e kasian ka kiak tebes no fila fali mai haree mos ha’u”, ohin ho fizikamente, ha’u nia inan la marka presensa, tan ne’e lori ho nia imajem ba partisipa iha graduasaun”. Nia Konta

Ernesto mos salienta, susesu ne’ebe nia hetan lases husu dezafiu no problema sira liuliu laiha osan  hodi fasilita prosesu estudu ne’ebe la’o naruk durante tinan ne’en (6) nia laran.

“Dezafius lubuk mak ha’u hasoru hanesan finansiamentu, kada ves ita hetan presaun oioin, dala ruma iha prosesu estudu nian iha kondisaun saúde ladun estavel  maibe nafatin firme luta hodi ultrapassa desafiu hotu”. Nia haktuir

Ernesto tatoli nia mama nia liamenon, “Ba haree dalan, eskola didiak , kuidadu-an haree malu diak lalika halo problema tanba ha’u ida o nia inan ne’e kasian ka kiak tebes no fila fali mai haree mos ha’u”.

“Husi ne’e inspira tebes ha’u hodi luta ba nafatin, iha esperansa, paseinsia, esforsu ho vontade tomak mak sei liu desafiu hotu hodi hetan susesu”. Nia sublinha

Graduadu UNTL ne’e garante, to’o tempu ida nia sei implementa manenek ne’ebe nia kolleta iha universidade hodi kontribui ba kualidade edukasaun iha Timor-Leste.

“Esperansa ba futuru hakarak implementa siensia ne’ebe hetan ona husi universidade hodi  kontribui ba kualidade edukasaun nian iha rai doben Timor ida ne’e”. Nia fundamenta

Liga ba falta kampu servisu, Graduadu ne’e rekunhese maioria la hetan servisu tanba laiha kampu servisu maibe iha oportunidade sira ne’ebe governu fo hodi ba servisu iha rai-liur.

“Kada tinan universidade produz graduadu barak, maibe maioria la hetan servisu ne’e mak problema tanba kampu traballu menus entaun ita halo komparasan katak entre kada tinan  produz graduadu barak vs kada fulan ema sai ba rai liur buka servisu mos barak entaun husi ne’e abilidade sira ne’ebe mak ita iha barak liu la aplika ona iha ita nia rain rasik, maibe governu mos fo oportudade ba Timor oinsa bele hetan servisu iha rai-liur.”

Graduandu ne’e husu foinsa’e sira iha ne’ebe hala’o estudu iha universidade sira hodi kontinua hatudu boa vontade, buka matenek no sai matenek, nune’e bele implementa iha futuru.

“Ha’u nia mensajen ba belun sira ne’ebe esforsu hela  iha prosesu estudu katak nafatin iha vontade hodi luta ba estudu nune’e bele  halo mudansa ba ita nia aan hodi bele garante sa mak deskreve ona iha logo República Democratica de Timor-Leste   (RDTL, sigla portugués) nia laran katak Unidade, Asaun no Progresu ba Timor-Leste”. Nia hakotu.

Enkuantu, Graduasaun ne’ebe UNTL hala’o iha loron 11-12 Fulan Jullu 2024 ne’e hamutuk 1728, entre sira fakuldade edukasaun arte no humanidades gradua graduadu hamutuk 521, Departamentu Ensinu Kímika hamutuk 62.

Jornalista : Marciana Fernandes