Sentru Saúde Tilomar Uza Kama-Partus Ida De’it Ho Kondisaun Aat

Imajem : Kama Partus Ne’ebe Aat Iha Sentru Saude Tilomar, Covalima, 09/12/2024

SAPNewsTL, Covalima – Sentru Saúde Komunitáriu(SSK) iha Postu Administrativu Tilomar, Munisipiu Covalima hela kama partus (Tur-Ahi) ida deit ho kondisaun aat, difikulta inan isin rua sira iha area rural.

Parteira iha Sentru Saúde Komunitáriu(SSK) Tilomar, Beatriz Nunes informa katak atendimentu ba komunidade sira la’o diak maibé kama partus ba inan isin rua sira aat.

“Ha’u foin muda mai iha ne’e fulan rua, kama partus iha ne’e ida de’it. Kama partus ne’e mós agora daudaun aat tiha ona, kama sira ne’ebé inan isin-rua mai atu deskansa ne’e iha, maibé ba partus ne’e mak laiha”.

“Bainhira inan sira mai na’in rua ka tolu iha loron ida de’it ne’e difikulta tebes ba ami tanba kama partus ida deit”. Tenik Beatriz Nunes iha Sentru Saúde Komunitáriu, Tilomar, Tersa-Feira (10/12/2024).

Imajem : Parteira Beatriz Nunes iha Tilomar

Realidade ne’e halo parteira sira preokupa no sira fo espasu uluk ba inan-feton sira ne’ebe besik ona atu tur ahi sira.

“Ami uza maneira ida ba inan ne’ebé nia oras besik ona atu partu mak uza uluk kama no ida ne’ebé sei kleur toba hein iha kama vasina nian”.Nunes salienta

Durante tinan ida (Janeiru-Dezembru 2024), sentru saúde ne’e rejista inan isin rua hamutuk atus ida hutunu resin-neen (176).

Diretór Servisu Saúde Munisipiu Covalima, Domingos Siqueira deklara katak sentru saúde refere menus ekipamentu maske halo ona pedidu balun konba ba problema saúde iha rural.

“Agora ita halo hela pedidu balun, balun atende ona, ezemplu hanesan Sentru Saúde Zumalai, ita atende on, ta haree ba Sentru Saúde sira ne’ebé mak partus barak liu, ita atende uluk ba sira, maibé Sentru Saúde sira ne’ebé mak menus, ita sei la haluha”. Domingos deklara

Domingos afirma nia parte sei halo planu no pedidu ba Ministériu Saúde hodi kompleta fasilidade saúde ne’ebé menuz no aat

Hafoin notísia ne’e tun, SAPNews seidauk halo komfirmasaun ho parte ministériu saúde ligadu ho probelma kama partus menuz ba inan isin rua sira iha postu afministrativu Tilomar, Covalima.

Jornalista : Ermelinda Soares