Setor Produtivu Hakdasak ! FONGTIL Rezeita Sosa Prado Ba Deputadu 65
Imajem : Diretor Ezekutivu FONGTIL Valentim da Costa Pinto iha Kampus Sentral UNTL,26/10/2024.
SAPNewsTL, Dili : Diretor Ezekutivu Forum Organizasaun Non Governamental Timor-Leste (FONGTIL) Valentim da Costa Pinto hateten FONGTIL rezeita Parlamentu Nasionál sosa karreta prado ba deputadu sira iha sexta legistatura.
Parlamentu Nasionál hanesan orgaun soberanu daruak iha Estadu Repúblika Demokrátika Timor-Leste ne’ebé representa povu hodi halo desizaun polítika, halo lei no halo fiskalizasaun ba ezekusaun orsamentu jeral estadu kada tinan.
Durante halo palestra ba estudante Universidade Nacional Timor Lorosa’e (UNTL), Valentim da Costa Pinto hateten FONGTIL la aseita polítika sosa prado ba deputadu sira maibé prefere uza osan hirak ne’e investe ba setor produtivu sira tanba povu barak sei moris ki’ak.
“Ami FONGTIL rezeita osamentu sosa karreta prado ba deputadu sira tanba dezenvolvimentu sei hakdasak no povu barak sei moris iha linha kiak nia laran (42% kategoria kiak), deputadu sira laiha sensibilidade ba povu, la justu se sira hola karreta prado”. Tenik Diretor Ezekutivu FONGTIL Valentim da Costa Pinto liu hosi palestra iha Kampus Sentral UNTL,26/10/2024.
Ezekutivu FONGTIL ne’e konsidera orsamentu sosa karreta prado la nesesáriu ba deputadu sira iha Parlamentu Nasionál, tanba ne’e deputadu sira presiza haree hikas hodi aloka orsamentu ba setor produtivu sira.
“Orsamentu hirak ne’e presiza aloka ba setor produtivu sira hanesan setor saúde, edukasaun, turismu, agrikultura no infraestrutura bázika tanba ita nota katak setor sira ne’e seidauk mudansa boot, ita tenki investe iha area ne’e”. Hateten Valentim
FONGTIL mós husu Governu no Parlamentu Nasionál hodi aprova osan ne’ebé aposta ba investimentu tanba orsamentu barak ne’ebé aprova no ezkuta iha tinan hirak ba kotuk barak liu ba konsumu.
“OJE ita aprova barak liu ba konsumu seidauk halo investimentu, tanba osan barak liu ba rai-liur, Parlamentu Nasionál no Governu presiza haree ida ne’e”. Nia husu
Ezekutivu ne’e mós husu Parlamentu Nasionál hodi revê lei pensaun vitalísia, nune’e bele investe makaas iha setor produtivu sira.
“PN presiza iha konsensu hodi revé hodi hapara lei pensaun vitalísia, tanba reseitas doméstika la to’o 20%, osan minarai hela 18.45 Billiaun ne’ebé tuir estimasaun ministériu finansas katak sei hotu iha tinan 2034”. Nia sublinha
Lideransa FONGTIL ne’e mós husu governu hodi halo intervensaun ba joven sira ne’ebé hahú tuir kursu hodi ba servisu iha rai-liur tanba laiha kampu traballu iha rai rai-laran.
“FONGTIL husu governu presiza halo intervensaun imediatu ba joven sira ne’ebé tuir kursu hodi ba servisu iha Corea do Sul, Austrália no Japaun tanba sira nia idade produtivu ne’ebé merese atu ba eskola, governu bele fasilita sira hodi asesu ba bolsa estudu hodi sai rekursu humanu ne’ebé kualidade iha futuru”. Nia husu
Fo hanoin fali katak Parlamentu Nasionál prevê ona osamentu ba parlamentu hamutuk milliaun ruanulu resin-tolu (23 Milliaun), osan privativu ba sosa karreta prado ba deputadu neenulu resin-lima (65) hamutuk miliaun 2 resin.
Debate ba Orsamentu Jeral Estadu (OJE) 2025 sei hahú iha loron 6 Fulan Novembru 2024, OJE 2025 governu prevê hamutuk billiaun 2.6.
Jornalista : Marciana da Conceição