Sidadaun Indonésia Hala’o Atividade Peska Ilegal Iha Tasi Sea ! Presiza Intervensaun “Rápidu”
Imajem : Ema estranjeiru hala’o atividade peska ilegal iha Timor Sea. 10/04/2026. Foto : Alang Victo Waidau
SAP News TL : Ohin, timoroan Alang Victo Waidau hetan sidadaun Indonesiu ne’ebe kontinua hala’o atividade peska ilegal lorloron iha área fronteira Timor Sea no Austrália.
Tuir informasaun ne’ebe Sapnews Pro asesu liu hosi Alang Victo Waidau informa katak durante halo survey rikusoin iha tasi-okos, sira hetan peskador hosi rai-liur ne’ebe halo atividade peska ilegal iha Timor Sea.
“Ohin dader, loron 10 fulan Abril 2026, ami hasoru tan peskador ilegal husi Kupang Nusa Tenggara Timur (NTT) Indonesia, Ró nia Naran KM Anugerah 80 ne’ebe mai nauk rikusoin ka ikan iha tasi Timor parte sul”.
“Loron tolu tuituir malu ema barak kontinua mai peska ilegal, kalan ne’e ita haree ema iha tasi laran ne’e hanesan sidade boot ida, sira maioria mai hosi Indonesia liliu Kupang, Atambua, Flores no seluk tan”. Informa Alang Victo Waidau ba SAP News Plus liu hosi via telefónika iha loron 10/04/2026
Alang husu parte relevante sira presiza tau atensaun ho lalais hodi hapara atividade peska ilegal iha Tasi-Mane.
“Ema kontinua nauk, ikan mohu ba daudaun tanba ne’e parte relevante sira presiza halo asaun rápidu, lae mak ita sei hela ho rai mamuk”.
Iha loron 8 fulan Abril liu ba mós sira hetan peskador ilegal husi Kupang NTT ne’ebe kaer ikan iha Tasi Timor.
“Wainhira haree ema nauk ikan iha ita-nia rain halo ita fuan moras maibe la iha kbit hodi halo atuasaun ba sira, ema sira ne’e mai ho ro kiik diak hela maibe ita-nia força naval ho polisia maritima nia ro boot ne’e mai la fila no para iha ne’eba to’o aat”. Nia informa
Hafoin notísia ne’e públika, Sapnews.com seidauk halo komfirmasaun ho parte Forsa Naval ligadu ho atividade peska ilegal ne’ebe halo husi sodara estranjeiru sira.
