Simu Rezultadu Ezame Nasionál ! ESG Lasama Luro Passa 100%
SAPNewsTL, Lautem : Iha Munisipiu Lautem, Postu Administrativu Luro, Escola Secundária Geral Fernando Lasama de Luro passa hotu iha ezame nasional, Adjuntu Diretor Lidónio do Nascimento Espírito Santo fo parabens ba estudante finalista sira.
Iha intrevista jornalista Mídia SAPNewsTL ho Diretor Adjuntu Escola Secundária Geral Fernando Lasama de Luro Lidónio do Nascimento Espírito Santo hateten nia parte fo parabens ba estudante sira ne’ebe ohin konsege passa ona nune’e nia husu atu kontinua estudu iha universidade hodi bele hetan kuñesimentu klean iha siensia.
“Há’u fo parabens estudante finalista tinan lektivu 2023 nian ne’ebe passa ona iha tinan ida ne’e, husu mos ba estudante tomak iha teritoriu Timor laran tomak katak labele haluha ita bo’ot sira mak sai hanesan jerasaun foun, imi mos tenke sakrifisiu ruma liu husi edukasaun para ke imi gaña kuñesementu gaña siensia ho nune’e marka ita bo’ot sira nia istoria ba ita nia rai Tmor ne’e ”. Dehan Diretor Adjunto Lidónio do Nascimento Espírito Santo Escola Secundária Geral Fernando Lasama de Luro iha nia knaar fatin hafoin simu rezultadu nasional iha ESG Fernando Lasama Luro, 14/12/2023
Adjuntu Diretor Lidónio mos agradese ba inan aman sira ne’ebe suporta nia oan ba eskola no ba mestre sira ne’ebe sakrifika sira nia an tomak hodi eduka, hanorin estudante sira nune’e sira bele remata ona sira nia estudu iha Secundária.
“Parte eskola nian agradese ba inan aman no estudante no mos agradese ba kolega mestri sira ne’ebe mak sakrifika sira nia an iha vontade bo’ot hodi hanorin no eduka ita nia estudante sira ohin sira konsege finaliza ona sira nia estudu iha Sekundária”. Tenik Lidónio
Lidónio mos husu ba inan aman sira atu kontinua enkoraja, motiva no suporta oan sira nia estudu ba iha nivel universidade.
“Inan aman sira, osan sei la determinante hodi ita nia oan finaliza sira nian estudu maibe ita nia edukasaun oinsa para ita eduka ita nia oan sira hodi nune’e ita bele envolve sira nafatin iha ambiente edukasaun ho nune’e sira bele finaliza sira nia estudu iha ensinu superior ”. Nia hameno
iha sorin seluk, estudante mellor klassifikadu feto Aquita Pinto afirma nia sente kontente tanba bele hetan valor di’ak iha nia eskola nune’e nia agradese ba mestre sira ne’ebe dedika an hanorin no eduka sira nune’e konsege remata ona sira nia estudu iha nivel sekundaria.
“Há’u la espera atu sai mellor klassifikadu iha Escola Secundária Geral Fernando Lasama de Luro maibe há’u kontente tanba bele hetan valor di’ak tanba ne’e há’u agradese ba há’u nia inan/aman ne’ebe suporta ona há’u nia estudu no ba mestre sira ne’ebe eduka, hanorin há’u nune’e ohin ami finaliza ona ami nia estudu”. Nia afirma
Nune’e mos estudante mellor klasifikadu mane Octavio Abilio Manuel sente orgullu tanba bele simu valor di’ak iha Escola Secundária Geral Fernando Lasama de Luro.
“Há’u sente orgullu no kontente tanba bele simu rezultadu ne’ebe di’ak, há’u agradese ba há’u nia inan aman familia tomak ne’ebe apoiu há’u no agradese ba mestre sira nia sakrifisiu ne’ebe oferese nia tempu tomak hanorin ami eduka ami nune’e ohin ami remata ona sekundaria”.
Entretantu, Escola Secundária Geral Fernando Lasama de Luro ba estudante 120 ano nian tinan lektivu 2023 hamutuk atus ida ranulu (120) maibe tanba ida mak lakonsege tuir ezame nasional nune’e hamutuk atus ida sanulu resin sia (119).
Entre sira programa siénsia teknolojia (CT) hamutuk limanulu resin sia kompostu husi feto tolunulu resin ualu (38) no mane hamutuk ruanulu resin ida (21) nomos ba programa Ciencia Sociais e Humanidade (CSH) hamutuk neennulu (60) ne’ebe kompostu husi feto hamutuk ruanulu resin lima (25) no mane hamutuk tolunulu resin lima (35) sira ne’e hotu passa hotu iha tinan ida ne’e.
Enkuantu, estudante Escola Secundaria Geral Fernando Lasama Luro ho mellor klasifikadu ema nain rua ba feto ida no mane ida ho valor neen nulu (60) husi programa Ciencia Tecnologia iha ne’ebé valor kiik liu mak haatnulu resin ida iha programa Ciencia Sociais e Humanidade
Jornalista: Luis Pailofo