![Skore Provizoriu 2-2, La Simu Desizaun Arbitrajen Nagarjo Ho FIEL Adia Jogu Skore Provizoriu 2-2, La Simu Desizaun Arbitrajen Nagarjo Ho FIEL Adia Jogu](https://sapnewstl.com/wp-content/uploads/2023/03/IMG-20230316-WA0013.jpg)
Skore Provizoriu 2-2, La Simu Desizaun Arbitrajen Nagarjo Ho FIEL Adia Jogu
Imajen: Jogador Kapitaun FIEL FC Ho Nagarjo FC Koalia Ho Arbitrajen Sira Iha Estadium Munisipal Dili, kinta 16/03/2023.
SAPNewsTL, Dili: Klube Nagarjo FC ho Fitun Estudante Lorosa’e (FIEL) FC tenki adia sira nia jogu ho skore provizoriu 2-2 iha jornada datoluk divizaun daruak Liga Timorense epoka 2023 tanba la simu desizaun arbitrajen iha minutu 78 tanba arbitrajen nia desizaun la fo satisfaz ba ekipa rua ne’e.
Jogu Nagarjo FC kontra FIEL FC hala’o iha Estadium Munisipal Dili kinta (16/03/2023).
Tuir Observasaun SAPNewsTL, jogu husi ekipa lao diak tebes tanba Nagarjo FC ho ambisaun hakarak manan jogu tanba lakon ona dala rua no FIEL FC ne’ebe lakon dala ida no manan ida mos hakarak manan jogu para atu aumenta sira nia pontu iha divizaun daruak Liga Timorense epoka 2023 ne’ebe skore provizoriu 2-2, golu husi Nagarjo FC marka husi jogador Nelson Freitas iha minutu 38 ho 47 no golu husi FIEL FC marka husi jogador Angenuco Viegas iha minutu 63 no 64.
To’o minutu 78 jogu tenki para tanba arbitrajen foti desizaun fo suta penalidade ba ekipa FIEL FC tanba arbitrajen konsidera bola kona jogador Nagarjo nia liman iha area penalidade maibe desizaun refere halo ekipa Nagarjo la satisfaz ne’ebe hamosu emosaun hirus prezidente Nagarjo FC nian hodi soe kadeira husi tribun ba kampu no jogador Nagarjo FC haksesuk malu arbitrajen iha Estadium Munisipal Dili.
Depois jogador Nagarjo FC sira haksesuk malu arbitrajen prinsipal iha jogu refere ne’e arbitrajen la konsisten ho nia desizaun husu fali asistente arbitrajen daruak no arbitrajen rezerva atu anula fali nia desizaun nune’e jogador sira husi FIEL FC hato’o kestaun fali tanba desizaun arbitrajen prinsipal hatudu ona suta penalidade, lakoi dada naruk problema ne’e parte koordenador jogu nian bolu treinador ho kapitaun husi ekipa rua hamutuk ho arbitrajen sira rezolve iha edifisiu orgaun liga nian.
Depois parte koordenador jogu bolu treinador no kapitaun ekipa rua hamutuk arbitrajen sira koordenador jogu Martinho Ribeiro hatete, ohin sira bolu ona kapitaun ho treinador hamutuk arbitrajen sira kolia ona jogu adia depois sira sei bolu ekipa rua rezolve problema mak anunsiu fali jogu lao bainhira fali
“Ohin ami bolu ona kapitaun ho treinador hamutuk arbitrajen sira katak jogu ita adia maibe ami sei bolu klube rua ne’e mai rezolve problema ne’e depois ami anunsiu fali jogu ne’e hala’o bainhira”, tenik Martinho
Martinho hatutan, kona ba suta penalidade seidauk iha desizaun tan ne’e sira sei bolu klube rua para atu rezolve ida ne’e, jogu ohin para iha minutu 78 hela 12 para determina minutu 90 ne’e no jogu ne’e adia tanba iha regulamentu jogu nian hatete bainhira iha disturbiu ruma bele hapara jogu, lolos sira atu kontinua maibe tempu labele ona para kontinua tanba rai kalan ona.
Reportajen: Augusto dos Santos