Tan Mehi João Ba Korea, Ohin Fila Ho Lian Laek, SEFOPE Trizte Entrega Mate Isin
SAPNEWSTL, Dili : Sekretaria Estado Formasaun Profisional no Empregu (SEFOPE) liu husi Diresaun Nasional Empregu Extetior (DNEE) realiza seremonia entrega matebian trabalador João Asenção Lukas hanesan trabalhador Timor oan ida ne’ebe ba servisu iha Korea do Sul ba familia matebian ne’ebe mate iha Fulan kotuk.
Tuir Diresaun Nasional Empregu Extetior (DNEE) Filomino Soares hato’o sentidu kondolensia ba matebian João Asenção Lukas nia inan/aman ne’ebe mak durante ne’e esforsu an tomak hodi hakarak dudu matebian, maibé ikus mai hatudu fali buat ne’ebé mak agora dadaun simu maibé ida ne’e planu Maromak nian.
ʺHa’u hakarak fó hatene ba ita hotu katak (SEFOPE), hakarak hato’o agradese boot ba embaixada Timor nian iha Koreia do Sul ho diplomata sira hotu liuliu Adidu traballador ne’ebe mak organiza ona ita nia alin matebian kuidadu nia mate isin to’o mai Timor-Leste. SEFOPE senti trizti tebes lakon ita nia alin ida ne’ebé soe hela familia inan aman, maun alin sira hodi bá buka moris iha ema nia rain hodi fila mai desenvolve ita nia rain rasik״. Tenik Diresaun Nasional Empregu Extetior (DNEE) Filomino Soares
Entretantu, Matebian João Asenção Lukas, moris iha Municipio Ermera Postu Administrativu Letefoho, iha Loron 31 Fulan Maio 1994, nia hahú kursu Lian Koreia iha Tinan 2018/2019 matebian pasa exame hodi rejista ba sistema iha loron 1 fulan Fevereiru iha Tinan 2020, depois nia hetan kontratu husi kompania empregado Koreia do súl iha Tinan 2021 iha area Fábrika no kotratu ba Tinan 3.
Familia matebean Filomena Fernandes hateten matebian servisu ho karakter ne’ebe di’ak tebes, ema ne’e respeitu nain, honestu ba servisu e kumpri regras stopik hodi servisu iha Koreia do Súl.
ʺMaibé iha loron domingo 19 fulan Maio Tinan 2022, simu telefoni husi Adido Trabaladores iha Koreia do Súl katak matebian hetan moras (TBC), katak matebian la hamutuk ho ita iha mundu ida ne’e no nia fila ona ba aman Maromak nia kadunan santo״. Nia hakotu
Jornalista : Aquelina da Conceição Magalhães
Editor : Marginha Patricia Hornay