Terramoto Iha Colombia Rezulta Ema 111 Mate & Estraga Infraestrutura Barak
Imajem : Vítima terramoto iha Colombia, 10/08/2026.
Sapnews Pro, Colombia : Rai-nakdoko ho magnitude 7,4 iha parte oeste Colombia rezulta ema hamutuk 111 mate, 87 kanek no infraestrutura barak hetan estragu.
Tuir informasaun ne’ebe SAP News Agency asesu liu hosi U.S. Geological Survey (USGS) no instituisaun sismolojia Colombia haktuir katak epísentru terremotu ne’e akontese iha San José del Palmar, komunidade rural ida iha provínsia Chocó ho distánsia kilometru 400 resin oeste husi kapitál Bogotá.
“Imi la mesak,” dehan Prezidente Colombia, Abelardo de la Espriella, liuhusi mensajen vídeo. Nia dehan katak nia nu’udar prezidente preokupa ho povu no sei halo buat hotu tuir nia kapasidade atu ajuda povu iha tempu difísil sira. Colombia, 11/08/2026. Sita CBSNews
Tuir dadus vítima sira ne’ebe maioria rejista iha provínsia Chocó, ema na’in 40 mate iha rejiaun Risaralda, sidade Pereira no ema 27 mate iha rejiaun Valle del Cauca iha Colombia.
Governadora Chocó, Nubia Carolina Córdoba-Curi, liuhusi mídia sosial, hatete katak ema na’in 12 mate iha nia provínsia. Ema na’in haat mate iha cidade Manizales, rejiaun Caldas.
Terremotu ne’e halo ema barak evakua to’o iha Bogotá. Testemuña sira hatete katak sira sente rai nakdoko iha kapitál no to’o iha área tasi-ibun Barranquilla, inklui Equador, iha parte sul. Tuir USGS, ema kuaze 10,5 millaun sente rai nia nakdoko ne’ebé forte no fo ameasa ba vida umanidade.
“Terremotu ne’e forte tebes,” dehan Valeria Polo, feto ida ho idade 29 tinan ne’ebé serbisu nu’udar kriadora kontent iha Bogotá, ba ajénsia notísia Agence France-Presse (AFP).
Infraestrutura sira hanesan uma, igreza, edifisiu públiku no privadu barak iha sidade Cali, Manizales, Pereira no Quibdó hetan estragus boot tanba terramota refere ho magnitude boot to’o 7,4.
Morador sira hamutuk ho ekipa resgate buka tuir vitima no sobrevivente sira iha edifísiu sira ne’ebé monu. Ofisiál sira hatete katak “munisípiu 20 resin maka sofre no edifísiu atus ba atus hetan estragus”.
Jorge Moncayo ho idade tinan 64 informa, “Ha’u nia uma tomak nakdoko. Ha’u nunka haree terremotu ida maka’as hanesan ne’e,” nia dehan.
Prezidente Câmara Municipal Pereira, Mauricio Salazar, hatete ba rádio lokal katak pelumenus ema 18 mate iha sidade ne’e no ema barak ne’ebe sei iha rai okos tanba kauza hosi “edifísiu boot barak ne’ebé monu”.
Prezidente Câmara Municipal Manizales, Jorge Eduardo Rojas, hatete iha mídia sosial katak edifísiu 17 monu no edifísiu 19 seluk hetan estragus parsiál.
Tuir ajénsia aviasaun Colombia informa katak sira halo ona suspensaun ba vó iha aeroportu Pereira, Manizales, Armenia, Cartago no Buenaventura, .
Iha Armenia, ema balu evakua husi sira-nia uma tanba preokupasaun kona-ba seguransa estrutura edifísiu sira. Iha Bogotá, autoridade sira hatete katak seidauk iha relatóriu kona-ba estragus estrutura edifísiu.
Sekretáriu Estadu Estadus Unidus, Marco Rubio, liuhusi mensajen iha mídia sosial, dehan administrasaun Trump kontinua monitoriza situasaun terremotu no “prontu atu fó apoiu ba povu Colombia”.
Organizasaun umanitária sira iha Estadus Unidus, inklui organizasaun sira iha South Florida, hahú mobiliza ajuda ba Colombia.
“Iha estragus barak, no ami hein informasaun kona-ba nesesidade sira. Prioridade primeiru mak resgate no rekuperasaun,” dehan Fabio Andrade, komisionáriu cidade Weston no ema Colombia-Amerikanu, ba CBS Miami.
Terremotu Segunda-feira ne’e konsidera nu’udar terremotu forte liu ne’ebé akontese iha Colombia desde tempu rejistu sismiku hahú iha inísiu tinan 1920.
Atividade sismika iha Colombia mos akontese depois terremotu rua ho magnitude 7,2 no 7,5 ne’ebé akontese tuir malu iha Venezuela, nasaun vizinhu, iha finál fulan Juñu. Terremotu sira ne’e hamosu estragus boot no halo ema liu 5.000 mate.
