Timor Oan 106 Ohin Semo Ba Korea Sul, Governu Agradese Ba Koragem no Abnegasaun

SAPNewsTL,Dili : Vice II Primeiro Ministru Jose Maria dos Reis liu husi SEFOPE hala’o serimónia dispedida ba traballador Timor Leste hamutuk atus ida resin neen (106), traballador hirak ne’e ohin aranka ona ba Korea do Sul, iha ne’ebe sei iha servisu area peskas no fabrikas

Tuir Vise Primeiru Ministru José Maria dos Reis katak  servisu hamutuk ho Korea do Sul hahú primeiru  konstituisional ne’ebé mak  iha kooperasaun ne’ebé di’ak tebes ba estadu Korea do Sul.

“Ita hotu hatene katak desde ita nia restaurasaun independensia Korea do Sul hamutuk ho ita iha kooperaaaun ida atu dezenvolve ita nia rai iha prosesu luta ba libertasaun povu nian”. Dehan Vise  Primeiru Ministru José Maria dos Reis iha Timor Lodge, 15/09/2022

Vise Primeiru Ministru ne’e agradese ba determinasaun joven sira nian ne’ebe mak atu kontinua prosessu luta ba libertasaun ida ne’e hodi determina no korajem tomak hodi foti desizaun importante tebes ba Korea do sul hodi hadia vida Familia nian

“Agradese tebes ba determinasaun, abnegasaun no korajen husi traballador sira ne’ebé mak simu oportunidade  ne’e, kooperasaun bilateral ne’ebe mak ita halo iha Korea do Sul no evidénsia bo’ot ida atu valoriza traballador sira iha prosesu ba dezenvolvimentu nasional.” Tenik Vise Primeiru Ministru

Nia  salienta, presiza konvida familia sira mai hamutuk iha ne’e atu halo aseitasaun ida ho governu atu bele hato’o mensajen ba trabalhador sira ne’ebé iha Korea do Sul.

“Familia sira nia prezensa importante atu bele fo aseitasaun ida atu nune’e sira bele hatene katak ida ne’e la’os governu mak obriga sira maibé governu kria kondisaun ida ba ita nia traballador sira hodi servisu tanab ne’e sira ne’e presiza iha aseitasaun husi familia”. Nia informa

Entertantu, Vise Ministru ne’e fundamenta tan dadus traballador sira ne’ebé ba Korea do Sul hamutuk atus ida ne’en (106) husi Departamentu rua mak hanesan Peskas no Fábrika, enkuantu Peskas hamutuk ualu nulu resin hitu (87) no Fábrika hamutuk sanulu resin sia (19).

Iha fatin hanesan Trabalhador Manuel Pinto sente kontente tanba bele hetan oportunidade ne’ebé nia hetan hodi ba servisu

“Sente kontenti tebes ho oportunidade ne’ebé mak ha’u hetan maske iha prosesu nia laran maibé nafatin esforsu hodi nune’e bele hetan osan oituan atu sustenta ba familia uma laran no nasaun Timor Leste”. Nia subliña

Enkuantu, iha serimonia despedidade ne’e hetan partisipa husi Vise Primeiru Ministru Jose Reis, SEFOPE Alarico do Rosario, Familia Traballador inklui Traballador sira, traballador 106 ne’e aranka ona ba Korea do Sul ohin dader

Jornalista: Conzita Mota & Aquelina Magalhães

Editor: Ekipa Editorial