Tinan 15, Alunu Kuru Bee Husi Uma ! KEJUSS & Komunidade Dada Bee-Moos Ba Eskola

SAPNewsTL, Baukau – Professor iha Eskola Ensinu Baziku Filial(EBF) Selegua ‘obriga’ estudante lori bee mós husi uma ba eskola hodi utiliza ba prosesu merenda Eskolar, nune’e KEJUSS hamutuk ho komunidade dada bee-moos ba sira iha aldeia Selegua Suku Sagadate Postu Administrativu Laga.

Professora Eskola Filiál EBF Selegua,Terezinha Gusmão hateten, durante tinan 15 ona problema barak eskola ne’e hasoru, bainhira implementa merenda eskolar estudante tenki lori bee mós mai husi uma mak tein, tanba bee laiha.

“Kuandu implementa merenda eskolar estudante tenki iha obrigasaun lori duni bee moos husi uma eskola mak tein, tanba problema bee laiha, maibe ho tulun hodi KEJUSS no komunidade sira hamutuk ho autoriedade lokal dada ona bee-moos ba EBF ne’e”. Tenik Terezinha Gusmão ba Jornalista Media Tour iha Selegua, 10/08/2024

Problema seluk ne’ebé eskola ne’e enfrenta mak estudante hasoru difikuldade menus fasilidade supra no infraestrutura sira.

“Ami husu ba Governu liu-liu ba Ministériu Edukasaun bele ajuda ami-nia eskola no bele hadia sala de aula ba estudante tan sala ne’ebé estudante sira uza hamutuk sala tolu, tanba ne’e la sufisiente ba estudante hodi hala’o prosesu aprendisajem ho di’ak, menuz meza kadeira, halo mós bibleoteka inklui prepara haris fatin ba sira,” Dehan Terezinha ba Jornalista Media Tour iha Selegua

Nia informa estudante ne’ebé hala’o aprendisajem iha eskola ne’e menus tebes fasilidade hodi ajuda estudante atu hala’o prosesu aprendisajem iha eskola refere inklui bee mós hodi fasilita merenda eskolar sira mós problema, entaun estudante iha obrigasaun tenki lori bee husi uma ba eskola mak tein.

Iha sorin seluk, Xefi Aldeia Selegua Aleixo Belo Pereira hatutan problema ne’ebé eskola EBF Selegua hasoru ne’e realidade.

“Akontese duni iha difikuldade barak mak estudante no professores sira enfrenta, falta sala de aula, toilet, maibé ami nafatin hamutuk estudante inan-aman sira hola inisiativa no voluntariu halo dapur ba estudante sira hodi uza ba merenda eskolar”. Hateten Aleixo Belo Pereira

Nia informa eskola EBF Selegua hasoru problema bee-moos maibe ho presenza KEJUSS konsege hamoris bee-matan.

“Bee-moos eskola EBF hetan ona, tanba grupu KEJUSS mosu mak ho inisiativa voluntariu organiza komunidade, estudante, no inan-aman ke’e debu konserva bee-matan sira mosu fali mak ami hatama osan dada bee moos ba eskola, maibé tempu bai loron beé bele maran hodi afeta ba estudante, entaun sira tenki lori duni bee husi uma ba eskola,” informa nia.

Atu garante kualidade edukasaun governu tenki apoiu fasilidade hanesan meza, kadeira no hari’i biblioteka no instala bee-moos ba edifisiu eskola.

“Husu ba governu liu-liu ministeriu edukasaun bele tau matan netik ba ita-nia oan estudante sira, problema menus professores tanba eskola refere iha profesores kontratadu na’in rua no voluntariu na’in ida, professor kontratadu na’in rua durante oitavu Governu simu salariu mais nonu Governu sira la iha salariu”.

Jornalista : Ermelinda Soares