Tinan Naruk Federasaun Lada’uk Intende Lei Desportu, CDTL Realiza Workshop Ba Federasaun 35
Imajen Palestra Presidente CDTL Macário F. Sanches
SAPNewsTL, DILI-Komfederasaun Desportu Timor-Leste (CDTL) realiza workshop jestaun organizasaun ho tema hasa’e abilidade organizasaun desportivu ba federasaun desportivu iha Timor-Leste, objetivu husi Programa ne’e hodi haklaen kunhesimentu membru sira nian hodi desenvolve desportu iha nasaun ne’e liliu lori sir abele hatene lei baze desportu nian
“Ohin ami halo workshop ida ne’e ho objetivu atu eleva tan rekursu baziku balun tan nesesita ba dezenvolvimentu desportu iha Timor-Leste liu-liu oinsa federasaun desportivu sira iha kapasidade atu jere organizasaun rasik hodi lori atleta sira hetan prestasaun kada organizasaun”, Prezidente CDTL Macário F. Sanches ba jornalista sira iha edifisiu Fundasaun Oriente Bidau Lecidere, Díli kuarta (05/10).
Prezidente ne’e akresenta, ohin foka liu ba oinsa federasaun sira iha kunesimentu klean ba lei baze desportu ba utilidade publiku tan ne’e federasaun sira tenke jere organizasaun rasik tanba jestaun desportivu forte maka bele dezenvolve modalidade desportivu sira
Entretantu, tuir avaliasaun ne’ebe CDTL halo ona ba federasaun sira detekta katak jeralmente federasaun sira seidauk hatene didiak lei baze desportu no diploma ministerial ne’e, CDTL inisiativa hadia kedas iha tinan ne’e to’o tinan haat bele hadia federasaun, federasaun sei servisu hamutuk ho SEJD hodi dezenvolve federasaun sira hodi lori Timor-Leste ba prestasaun diak iha futuru
Iha sorin seluk, Diretor Nasional Juventude no Desportu (SEJD) David Tomas de Deus hatete, workshop ne’e importante tebes ba federasaun sira tanba CDTL halo monitorizasau no avaliasaun ba federasaun 35 maibe federesaun sira ne’e seidauk komprende didiak hodi jere organizasaun tuir lei baze desportivu no diploma ministerial utilidade públiku nian.
Imajen Intervista Diretor Jeral SEJD David Tomas de Deus
“Ami apresia ba CDTL nia esforsu ne’ebe halo monitorizasaun no avaliasaun katak federasaun 35 seidauk komprende didiak jere organizasaun tuir lei baze desportivu ba diploma ministerial utilidade públiku nian tan ne’e lei kria iha 2010 to’o agora ita seidauk iha federasaun ida priense rekezitu hodi hetan utilidade públiku husi SEJD”. Nia sublinha
David hatutan, obrigatóriu federasaun sira tenki kumpre para hetan utilidade públiku husi federasaun hanesan osamentu formasaun ba treinador, arbitrajen no atleta sira kada federesaun no sira seluk tan hodi nune’e dezenvolve modalidade iha federasaun hodi prestasaun ba Timor-Leste, federasaun tenki iha estrutura, rejistu iha Ministeriu Justisa, iha atleta, arbitrajen, treinador no iha asosiasaun sira kada munisipiu.
Iha fatin hanesan Sekretariu Jeral interinu Federesaun Boxe Amadora Timor-Leste (FBATL) Domingos M. Tety afirma, workshop kona-ba hasa’e abilidade organizasaun desportivu ne’e importante ba federasaun maibe tenki hetan rekonesimentu husi Ministériu Justisa
“Workshop kona-ba hasa’e abilidade organizasaun desportivu ne’e importante ba federasaun sira ne’ebe ita halo jestaun iha organizasaun tenki iha rekonesimentu husi Ministériu Justisa ne’ebe ami husi FBATL hatama ona rekezitu ba lei baze desportivu no diploma ministerial utilidade públiku ba CDTL no SEJD tanba ami partisipa workshop kona-ba lei baze desportivu iha 2010 tan ho rekezitu sira ne’e ami sai membru organizasaun boxing internasional”, tenik Domingos
Reportajen : Augusto dos Santos
Editor : Ekipa Editorial