TL Rejista Médiku Hamutuk 1.400, Doutor 212, Mestradu 1.464 & Universidade 18
Imajem : Isar Bandeira Nasional iha Palásiu Governu Díli, 28/11/2025
SAPNewsTL, Díli: Presidente Republika (PR), Jose Ramos Horta dehan estadu demokrátiku forma hosi resistênsia, kanek no luta naruk. Liu tiha tinan 50, Timor-Leste iha ona médiku hamutuk 1.400, PhD 212, Mestradu 1.464 no iha universidade 18.
Marcela Mery – SAP News TL
Iha diskursu sefe estadu hateten husi tinan barak ódiu no violénsia nian, no husi ahu-ruin 1999 nian, forma Timor-Leste sai estadu demokratiku ne’ebe rejeita ódiu no vingansa ne’ebe mak sei dadur ita iha pasadu
“Estadu demokrátiku ida, rezultadu hosi eskolla konxiente ida hodi la rende ba vingansa, hodi kura kanek sira, tau matan ba sobrevivente sira, fó onra ba vítima sira no sira ne’ebé reziste, hili ba rekonsiliasaun nasionál no harii fila-fali
ponte sira, tantu umanu no jeográfiku, ho ita-nia viziñu Indonézia, Ita rejeita ódiu no vingansa, sentimentu sira ne’ebé maka sei dadur ita iha pasadu”. Dehan Presidente Republika (PR), Jose Ramos Horta, iha ambitu komemorasaun tinan 50 proklamasaun unilateral independénsia, iha Palasiu Governu. Sesta(28/11/2025).
Ramos Horta haktuir liu husi Primeiru-Ministru Xanana Gusmão nia lidera kontínua halo revizaun no hadia relasaun diak ho nasaun visinhu sira.
“Dame, estabilidade no auzénsia konflitu armadu iha ita-nia fronteira sira nu’udar rezultadu diretu hosi polítika rekonsiliasaun ida-ne’e, orientadu husi líder vizionáriu sira, hanesan Xanana Gusmão no líder sira seluk”.
PR konta, tinan 50 ba kotuk Timor-Leste la iha doutor ne’ebe hetan formasaun lokal, to’o iha tinan 2002 Timor-oan iha deit 19 maibe ohin loron Timor independénsia mediku hamutuk 1,400 mediku barak mak hetan formasaun husi nasaun Kubanu.
“Iha tinan 1974, Timor-Leste laiha doutór ne’ebé hetan formasaun lokál. Iha tinan 2002, ita iha médiku timoroan na’in 19. Ohin loron, ita iha médiku 1,400 resin, dois tersus hetan formasaun iha tinan 20 ikus ne’e, proporsaun boot ida iha Kuba no barak seluk tan iha ita-nia eskola médiku dahuluk, ne’ebé hari’i ho apoiu husi profesór kubanu sira”.
Presidente Republika salienta, Iha tinan 1974, Timor-Leste seidauk iha universidade, no família uitoan mak bele selu atu estuda iha rai-li’ur maibe ohin loron, universidade no instituisaun ensinu superiór 18, ho estudante 60,000 resin, no instituisaun hotu-hotu hetan avaliasaun regulár hosi komité akadémiku internasionál.
“Kona-ba ensinu superiór, iha tinan 1974 laiha PhD sira iha rai-laran; ohin loron ita iha PhD hamutuk 212, graduadu husi universidade koñesidu sira iha Austrália, Brazíl, Xina, Koreia Súl, EUA, Filipina, Indonézia, Japaun, Nova, Zelándia, Portugal, Reinu Unidu, Singapura, Tailándia, Vietname no nasaun sira seluk tan”.
“Mestradu hamutuk 1.464, no Timor-oan liu rihun tolu maka estuda ona iha Universidade prestijiadu Gadjah Mada, iha Indonézia”.
Enkuantu, iha ambitu komemorasaun tinan 50 proklamasaun unilateral independénsia, partisipa husi orgaun soberanu sira hanesan Presidente Republika Jose Ramos, Presidente Parlamentu Nasionál Maria Fernanda Lay, Vise-Primeiru-Ministru Marino Assanami Sabino, Presidente Tribunal Rekursu Afonso Carmona, eix-titular no Governante sira.