Tomás Husu Jovens Halo Reflesaun Ba Loron Konsulta Popular
Imajem : Ministro Administração Estatal Tomas Cabral iha Lecidere, 30/08/2025
SAP News TL, Díli : Komemorasaun loron konsulta popular ba dala XXVI, Ministru Administrasaun Estatál (MAE) Tomas do Rosário Cabral husu joventude sira halo reflesaun.
Marcela da Costa – SAPNewsTL
“Ohin, 30 de Agustu 2025 ne’ebe ita selebra loron konsulta popular ba dala XXVI, tinan ida ne’e mós ita sei selebra ita-nia ukun rasik an ba 50 anos, nune’e ba juventude sira loron ohin ne’e sai hanesan memoria ida atu ita halo reflesaun, tempu uluk depois de prosessu votasaun joven, ferik no katuas sira, ida-idak buka oinsa atu salva nia moris”. Dehan MAE Tomás do Rogário Cabral, iha nia diskursu, iha Jardim Largo Lecidere, Sabadu (30/08/2025)
Ministru ne’e haktuir nia parte agradese parte hotu-hotu liu-liu ba FALINTIL (Forsa Armada da Libertasaun Nasional Timor-Leste) sira ne’ebe firme nafatin iha momentu loron referendum tinan 1999.
“Referendum tinan 1999 laos fasil atu deside buat ne’ebe mak ita hakarak, violensia barak, nune’e lori governu nia naran fo obrigadu ba sidadaun sira ne’ebe mak marka prejensa iha ne’e no territóriu laran, tinan XXVI ona ita komemora loron referendum, obrigadu ba ema hotu ne’ebe mak fó ona nia kontribuisaun”.
Governu Timor-Leste liu-husi Ministériu Administrasaun Estatál organiza marsa husi Sede Suku Bidau Santana nia oin to’o jardin Largo Lecidere ne’e ho objetivu hodi fó onra no reflesaun ba loron istoriku 30 Agosto.
Hafoin marsa, Dom Virgilio Cardeal do Carmo da Silva SDB, prezide orasaun reflesaun hamutuk ho membru governu sira, estudante, Madre, Padre no konvidadu sira hodi hasa’e agradesimentu ba Maromak ba sakrifísiu ba matenek ne’ebe Maromak haraik ba heroi sira hodi kontribui ba Timor-Leste nia ukun rasik an.
Entretantu atividade marsa reflesaun ne’e partisipa husi Vice-Primeiru Ministru, Ministru Cordenador dos Assuntos Soçiais, Mariano ASSANAMI Sabino, Ministru Administrasaun Estatál, Tomás Cabral, Ministru Interior, Fransisco da Costa Guterres, Ministra Edukasaun Dulce de Jesus, Ministra Saúde Elia Amaral, no marsa ne’e akompaña Draumband husi eskola Sekundariu Cristal.