Transforma Dili Moos & Organizadu ! SEATOU Kontinua Sensibiliza & Hasai Okupante Espasu Públiku
![](https://sapnewstl.com/wp-content/uploads/2024/07/IMG-20240720-WA00292.jpg)
Imajem : SEATOU Germano Dias Brites hala’o palestra iha SLXGRR Lesidere, 19/07/2024.
SAPNewsTL, Dili : Durante semináriu públiku ne’ebe hala’o iha Sala Leitura Xanana Gusmão Reading Room (SLXGRR), SEATOU Germano Dias Brites haktuir SEATOU forma ekipa konjunta hodi halo operasaun no hadia sidade Dili tanba komunidade sira soe lixu barak arbiru no okupa espasu públiku.
“Hafoin simu mandatu iha nonu governu, SEATOU haree katak Dili nakonu ho lixu tanba ne’e ekipa la’o dadaun hodi hamoos no hadia dalan leet sira no estrada públiku hirak ne’ebe foer no la seguru, ita fo avizu, halo povu kompriende katak ita rasik hatene hodi hadia ita nia uma laran”. Tenik SEATOU Germano Dias Brites liu husi palestra iha SLXGRR Lesidere, 19/07/2024
SEATOU hatutan, Governu la’o no halo operasan no fo atensaun ba komunidade sira hodi hamutuk hadia sidade Dili ne’ebe moos, seguru no livre husi foer tuir polítika no programa governu dasia nian.
“Programa Governu liu husi planu estratejia Sekretaria Estadu Assuntu Organizasaun Urbanu (SEATOU) hakarak sidade ne’ebe moos, promove poder lokal, promove dezenvolvimentu lokal, urbanizasaun no desentralizasaun, entaun SEATOU nian tun ba halo promosaun toponomia, ijiene, ordem públiku no organizasaun urbana”. Germano Dias Brites hateten
![](https://sapnewstl.com/wp-content/uploads/2024/07/IMG-20240720-WA00302.jpg)
Imajem : Partisipante Semináriu Públiku iha SLXGRR Lesidere Dili
Governante ne’e akresenta, SEATOU nia servisu hodi garante kapitál ne’ebe moos, sidade ne’ebe organizadu no komunidade ne’ebe sivilizadu hodi inspira sidadaun nasionál tantu internasional.
“SEATOU nia servisu ida maka organiza komunidade okupadu espasu públiku, kontrola sira no fahe informasaun, hodi soe foer iha nia fatin, labele soe iha mota laran, tanba mota mai lori ba tasi, no estraga tasi sai foer, inklui ema sira ne’ebe produz tahu, kuandu la kontrola maka sai iis no estraga ambiente, entaun wainhira sira mai hato’o, ita hapara sira, ita ba fo hatene no hadia, entaun servisu ne’e todan uituan”. Germano sublinha
SEATOU mos haree kona ba ordenamentu territóriu, oinsa dezenvolve sidade Dili sai kapitál ne’ebe ordenadu, organizadu, kontroladu no hatudu imajem diak nasaun nian ba mundu.
Germano mos husu ba sidadaun hotu atu hatene kontrola ambiente, proteze no kuidadu sidade Dili, nune’e bele fo seguru no komfortavel ba sidadaun hot-hotu.
Semináriu públiku ne’e ho tema Planu Estratéjiku Husi Sekretariu Estadu Assuntu Toponomia no Organizasaun Urbanu Hodi Hadia Sidade Ne’ebe Moos, semináru refere hetan partisipa maksimu husi universitáriu sira no juventude sira.
Fo hanoin fali katak, antes ne’e SEATOU hamutuk ho ekipa konjunta halo ona eviksaun ba komunidade sira iha Merkadu Comoro, Aitarak-Laran, Bidau Santana, Bidau Toko-Baru, Terminal Bekora, inklui halo ona sosializasaun ba komunidade okupante espasu públiku sira iha Fomentu I, Tasi-Tolu, Aitarak-Laran inklui okupante espasu públiku sira seluk hodi hamamuk fatin.
Jornalista : Eleonora Fátima dos Santos