Trump Ameasa Halo Atake Forte Hasoru Iran, Se La Husu Deskulpa

Imajem : Presidente Estados Unidos América, Donald J. Trump. Foto : The White House

Sapnews Pro : Prezidente Estados Unidos América (EUA) Donald Trump deklara EUA & Israel sei kontinua halo atake militar ne’ebe forte ba Iran, se Iran la konkorda atu para konflitu ne’e.

Tuir publikasaun husi rede sosial média, Presidente Trump dehan Iran sei hetan atake ne’ebé forte tebes, no aumenta lista alvu ba área no grupu sira ne’ebé uluk la tama iha planu atu ataka. Nia justifika medida hirak ne’e ho razaun katak Iran hatudu “komportamentu aat” iha rejiaun Oriente Médio.

Trump mos hateten katak, se situasaun la muda, Estados Unidos no Israel bele halo operasaun militar ne’ebé boot liu tan.

Hafoin semana ida, konflitu militar entre United States of América no Israel kontra Iran, situasaun iha Oriente Médio kontinua manas no provoka funu kontinua iha rejiaun. Eskalasaun konflitu ne’e halo preokupasaun boot ba komunidade internasional tanba bele afeta estabilidade rejional no ekonomia global.

Governu Iran, liuhusi nia lideransa sira husu deskulpa ba nasaun vizinhu balu iha Oriente Médio no afirma katak sira la iha intensaun atu halo atake ba rai sira ne’e, exetu sira ne’ebe la halo atake uluk.

Líder sira iha Iran afirma katak sira prontu atu defende soberania rai nian no sei la rende ba presáun militar. Sira mos dehan katak Iran sei responde se hetan atake tan husi adversáriu sira.

Iha sorin seluk, Prezidente Iran, Masoud Pezeshkian husu deskulpa ba nasaun vizinhu sira iha rejiaun Golfo tanba sofre asaun militar Iran nian.

Deklarasaun ne’e fo sai iha momentu ne’ebé funu entre Israel no Iran tama ona semana daruak, ho atake militar sira kontinua troka entre parte rua ne’e. Tensaun ne’e mos aumenta hafoin atake Iran nian to’o alvu sivíl balu iha rejiaun Golfo.

Pezeshkian dehan katak nia rasik “husu deskulpa ba nasaun vizinhu sira ne’ebé afetadu husi asaun Iran, no Terrão la iha intensaun atu halo konflitu ho rai sira iha rejiaun ne’e”. Deklara Prezidente Iran, Masoud Pezeshkian.

Prezidente Iran mos husu ba nasaun sira iha Golfo atu la partisipa iha operasaun militar husi United States no Israel kontra Iran. Nia hateten katak Iran prontu atu suspende atake ba rai vizinhu sira, maibé sei responde se atake mai husi nasaun hirak ne’e.

Konflitu ne’e kontinua provoka preokupasaun iha komunidade internasional, ho analista sira alerta katak eskalasaun bele lori impaktu boot ba estabilidade rejional no ekonomia global.

Enkuantu, komunidade internasional mós preokupa funu iha médiu oriente no husu halo dialogu hodi rezolve konflitu politiku ne’e iha tempu badak.

Tuir dadus ne’ebe SAP News Plus asesu hosi relatóriu Central Command USA desde atake militar iha loron 28 Fevereiru, EUA & Israel halo ona destrusaun ba ró militar iraun nian hamutuk 43 no halakon ema 1.332 nia vida inklui Líder Supremu Ayathola Ali Khamenei ho lider sira seluk.

Entretantu, Militar Estados Unidos da América hamutuk nain neen (6) maka lakon ona vida no sidadaun Israelita liu ona nain sanulu mak lakon vida.

Fontes : Reuters, The White House, AP & Média Internasional