Trump : “Kompaña Petrolífera EUA Sei Investe & Hadia Infraestrutura Estragus Iha Venezuela”

Sapnews Pro – Hafoin Forsa Delta Estados Unidos América halo kapturasaun ba Prezidente Nicolas Maduro. Prezidente Estadus Unidus, Donald Trump deklara kompañia petrolífera norte-amerikanu sei loke dalan ba sira hodi tama no halo investimentu iha Venezuela.

“Ami sei permiti atu empreza petrolífera Estadus Unidus nian ne’ebé boot liu iha mundu ne’e bele tama, hadi’a infraestrutura sira ne’ebé hetan estragus, hadia infraestrutura petrolíferu nian no halo osan ba nasaun”, hatete Presidente EUA Donald Trump, iha Florida iha loron-sábadu,03/01/2026), Sita ajénsia notísia AFP.

Maske nune’e, Trump subliña katak embargu ba petróleu Venezuela nian iha nafatin efeitu hodi halo atividade petrolíferu. Desde 2017, Washington fó ona sansaun ekonómiku no setór petrolíferu ba estadu Venezuela.

Bazeia ba dadus Organizasaun País Esportadór sira Petróleu nian (OPEP) katak produsaun atuál petróleu Venezuela nian menus hosi barríl millaun ida kada loron, maioria fa’an iha merkadu negra ho folin ne’ebé ki’ik.

Trump akuza governu Caracas uza reseita petrolíferu hodi finansia atividade kriminozu oioin.

“Caracas uza osan petróleu nian hodi finansia narko-terorizmu, tráfiku umanu, omisídiu no sekuestru,” Trump akuza.

Iha inísiu hosi nia mandatu daruak iha 2025, Trump revoga lisensa operasionál sira hosi empreza estranjeiru oioin hosi petróleu no gás iha Venezuela, exetu ba Chevron.

Entretantu, Washington mós hametin nia blokeiu ba ró-ahi sira ne’ebé hetan sansaun atu ba no sai hosi Venezuela.

Tuir dadus iha 2023, Ajénsia Internasionál Enerjia nian (IEA), Venezuela kontein maizumenus pursentu 17 hosi rezerva petróleu brutu nian iha mundu. Tuir Sky News, númeru ne’e boot liu iha mundu. Maibé, produsaun iha rai-laran tun maka’as tanba tinan hirak nia laran mosu mal-administrasaun no korrupsaun.

Petróleu brutu Venezuela nian koñesidu tanba nia kualidade ne’ebé ki’ik no refina ba produtu sira hanesan diesel no alkatraun.

Analista enerjétiku hosi Grupu Schork, Stephen Schork iha fulan liubá hateten “Estadus Unidus tuir loloos la’o di’ak lahó petróleu venezuela nian”, hatete Stephen Schork ba AFP.

Ibrahim & Kamala Kondena Asaun Trump Iha Venezuelau “Kontra Lei Internasional”

SAP News TL : Relativamente ho kapturasaun hasoru Presidente Venezuela Nicolas Maduro iha Caracas, Primeiru Ministru Malásia Anwar Ibrahim konsidera asaun ne’e viola lei internasional no ne’e uza forsa ilegal hasoru estadu soberanu ida.

“Ha’u akompaña no preokupa akontesimentu sira iha Venezuela. Presidente Venezuela ho nia feen hetan kapturasaun iha operasaun militár Estadus Unidus nian. Asaun sira hanesan ne’e konstitui violasaun klaru ida ba lei internasionál no ne’e uza forsa ilegál ida hasoru estadu soberanu ida”. Hakerek Primeiru Ministru Malásia Anwar Ibrahim iha Kuala Lumpur, 04/01/2026

Primeiru Ministru Malásia ne’e dehan Prezidente Venezuela Maduro ho nia feen tenke hetan liberdade. Ne’e halakon restrisaun fundamentál sira ba utilizasaun podér entre estadu sira no hafraku enkuadramentu legál ne’ebé maka sustenta orden internasionál.

“Ne’e ba povu Venezuela atu determina sira-nia futuru rasik. Istória hatudu ona, mudansa derepente sira iha lideransa ne’ebé lori liuhosi forsa esterna sei lori prejuízu barak liu iha nasaun ida ne’ebé luta daudaun ho susar ekonómiku ne’ebé prolongadu no tensaun sosiál ne’ebé kle’an”. Nia sublinha

Ibrahim konsidera respeitu ba lei internasionál no soberania maka importante liu atu hametin relasaun pasífika entre estadu sira iha mundu.

“Diálogu sai nafatin dalan ne’ebé kredível liu ba rezultadu ida ne’ebé proteje ema sivíl sira no permite ema Venezuela sira atu hetan sira-nia aspirasaun lejítimu sira lahó estragu seluk”. Hakotu Anwar Ibrahim

Iha sorin seluk, Kamala Harris konsidera Donald Trump nia orientasaun ba asaun sira iha Venezuela la halo Amérika sai seguru, no forte.

Kaptura Presidente “Maduro maka ditadór ida ne’ebé brutál no ilejítimu, asaun ida-ne’e la tuir lei no la matenek”. Nia Kritika

Povu Amerikanu Lakohi & Kolen Ona Atu Ema Bosok Sira.

“Ida-ne’e la’ós kona-ba droga ka demokrasia, ne’e kona-ba mina-rai. Donald Trump nia hakarak atu sai ema ne’ebe forte liu iha rejionál”.

Kamala hateten Prezidente Trump tau tropa sira iha risku, gasta biliaun ba biliaun hodi destabiliza rejiaun ida, no oferese sira la ho autoridade legál, laiha planu no laiha benefísiu iha rai-laran.

“Amérika presiza lideransa ne’ebé nia prioridade sira maka aplika estadu direitu, hametin aliansa no importante liu tau povu Amerikanu iha númeru dahuluk”. Nia hakotu

Venezuela : Deskonfia Tráfico Droga ! Forsa Delta América Kaptura Maduro & Cilia

Sapnews Pro, Venezuela : Durante operasaun iha tuku 02:01, 03/01/2026, Forsa Delta Norte-Amerikanu kaptura Prezidente Venezuela Nicolas Maduro ho nia espoza Cilia Flores iha Caracas, hafoin kaptura lori ona ba Nova Yorke, Amerika hodi halo investigasaun tuir lei EUA nian.

Prezidente Norte-Amerikanu, Donald Trump, liu hosi konferensia imprensa informa katak militar América halo kapturasaun ba Nicolas Maduro & Cilia Flores, hafoin transporta ba Nova Iorke.

“Estadus Unidus Amérika susesu hala’o ona atake ho eskala boot ida hasoru Presidente Venezuela Nicolas Maduro hamutuk ho nia feen. Operasaun ne’e halo tuir deit aplikasaun Lei Estadus Unidus”.

Governu norte-amerikanu akuza Nicolás Maduro katak deskonfia lidera organizasaun internasionál tráfiku droga nian (Narkótika). Enkuantu, Maduro nega alegasaun ne’e no konsidera inkonstitusionál.

Trump la fó sai detalle sira seluk kona-ba oinsá maka Maduro hetan kapturasaun ka lori nia ba ne’ebé no ninia kontinuasaun kona ba acontesimentu refere.

Vise-Prezidente Venezuela Delcy Rodríguez, hatete nia Governu la hatene kona-ba paradeiru hosi Maduro no Primeira-Dama Cilia Flores. Governu Venezuela ezije prova kona-ba kapturasaun no buka hatene sira-nia paradeiru.

“Maduro hetan kaptura hosi Forsa Delta Ezérsitu Estadus Unidus nian. Informasaun ne’e hetan husi ofisiál norte-amerikanu ida. Forsa Delta maka unidade kontra-terorizmu militár EUA nian”.Sita CBS News

Molok militar norte-amerikanu halo kapturasaun ba Nicolas Maduro, Trump haruka militár ataka Venezuela liuliu iha fatin instalasaun militár sira.

Iha kapitál Venezuela, sidade Caracas, abitantes sira rona esplozaun no haree suar ne’ebé nakfera ba lalehan.

Hafoin esplozaun refere, Governu Venezuela fó sai deklarasaun ofisiál ida hodi kondena atake ne’ebe norte-amerikanu halo hasoru sira.

Vanessa Silva, jornalista ida ne’ebé hela iha Caracas, haree esplozaun sira hosi nia janela. Nia hatete katak esplozaun ne’e maka’as tebes.

Vanessa hatete Caracas agora hakmatek, maibé ema hotu-hotu nafatin haruka mensajen ba malu ho laran-taridu atu asegura katak ema hotu di’ak hela.

Líder opozisaun Venezuela nian hatete sira prontu atu kaer knaar. Líder opozisaun venezuelana, Maria Corina Machado, selebra destituisaun Maduro nian, hodi afirma iha komunikadu: “Venezuela-oan sira, to’o ona tempu ba liberdade!”

Machado, ne’ebé manan ona Prémiu Nobel Dame nian iha tinan liubá, husu atu Edmundo Gonzalez hetan rekoñesimentu hanesan Prezidente lejítimu Venezuela nian hodi kontrola forsa armada sira.

Gonzalez hasoru Maduro iha eleisaun ikus nasaun nian iha 2024, maibé governu rekoñese Maduro hanesan vensedór, iha rezultadu ida ne’ebé hetan krítika maka’as hosi observadór Estadus Unidus no internasionál sira tanba alega sira katak Maduro halo manipulasaun ba votus.

“Ohin, ami prontu atu afirma ami-nia mandatu no kaer ukun. Mai ita mantein vijilante, ativu, no organizadu to’o tranzisaun demokrátiku ne’e hotu,” dehan Machado.

Gonzalez hatete iha X: “Ita prontu ba operasaun boot rekonstrusaun ita-nia nasaun nian.” Maibé Trump hatete iha nia konferénsia imprensa katak sei sai “todan tebes” ba Machado atu ajuda lidera nasaun, hodi hatete katak nia laiha apoiu sufisiente.

“Nia feto ida ne’ebé di’ak tebes, maibé nia laiha respeitu”, Sr. Trump hatete ba jornalista sira.