Janeiru 2025, Uma-Kain 319 Sai Vitima Ba Governu Nia Despezu Administrativu

SAPNewsTL, Dili : Sekretariu Estadu Asuntu Toponomia no Organizasaun Urbana (SEATOU) Germano Santa Dias Brites hala’o despezu administrativa ba uma komunidade hamutuk 31 iha Suku Bebonuk.

Komunidade Rumana Martins preokupa tebes tanba governu la fo osan ruma hodi fasilita sira fila ba munisipiu.

“Ami triste tanba Na’i Ulun sira trata ami hanesan balada, ami hili tiha sira ba leten, fila trata ami hanesan balada no la hanoin ami, ami iha lei nia okos maibe lei mos iha atu haree ami, sira haruka ami hodi husik fatin maibe la fo buat ruma ba ami, maske antes ne’e mai halo dialogu, hasai foto no foti dadus”. Tenik komunidade Rumana Martins ba SAPNews iha Suku Bebonuk, 05/12/2024

Rumana hatutan, uma ne’ebe nia konstrui mai hosi rezultadu pineira rai-henek, mahon ne’e uza hodi buka moris no oan sira hela ba eskola maibe obrigadu tenki husik tanba respeitu ba desizaun governu nian.

“Ami hari’i uma ne’e hahu iha tinan 2007 liu hosi rezultadu pineira rai-henek no faan sasan, ami hahu hela iha kos, hafoin ami buka osan to’o halo uma iha rai pedasuk ne’e. ami uza uma ne’e hodi hela, buka moris no oan sira ba eskola, maibe governu mai haruka hodi hamamuk fatin ne’ebe ami hela, ami prontu no koopera ho estadu”.Nia sublinha

Nia deklara, familia sira prontu hodi husik hela fatin no fila fali ba Hatulia, Munisipiu Ermera, maibe husu governu hodi fasilita transporte ba sira.

“Ami familia ida hamutuk 30 kompostu hosi uma-kain tolu, ami prontu atu husik hela fatin no fila ba munisipiu maibe ami husu atu fasilita ami nia transporte hodi tula sasan no oan sira ba rai moris fatin, Ha’u husu ba Maun Xanana (Primeiru Ministru) no Maun Ramos Horta (Prezidente Republika) atu bele hanoin netik ami povu kiik”. Rumana dehan

Iha sorin seluk, Xefe Suku Bebonuk Alfredo da Costa informa komunidade Bebonuk hamutuk Uma-Kain 31 mak afetadu ba eviksaun tanba ne’e nia parte informa ona ba sira hodi arruma sasan no fila ba munisipiu.

“Ha’u nia komunidade afetadu hamutuk 31 mak hela Iha fatin risku ka mota ninin tanba ne’e ha’u fo hatene ona sira hodi husik fatin no fila ba munisipiu”.

“SEATOU fasilita ona transporte ba komunidade sira balun, oras ne’e sira arruma hela sasan hodi tula ba Atsabe, Hatulia. Komunidade balun sei fila ba Viqueque, Lospalos no seluk tan”. Nia informa

Ligadu ho trata povu hanesan balada, Xefe Suku Alfredo deklara seidauk trata komunidade hanesan animal maibe fo hatene sira hodi koopera ho estadu tanba sira hela iha fatin risku.

“Estadu seidauk trata nia povu hanesan animal, dalam ida tan ami fo hatene ba sira hodi prepara sasan hodi husik fatin, karik sira presiza deklarasaun ruma hosi suku tanba muda hela fatin, ha’u prontu hodi halo deklarasaun hodi fasilita sira”. Alfredo sublinha

Antes ne’e SEATOU Germano Santa Dias Brites hateten, governu fo hatene ona liu hosi halo dialogu ho komunidade hodi koopera no hamamuk fatin, nune’e bele hela dook hosi risku.

“Laos ohin deit mak ita foin mai, dezde tinan kotuk ita halo ona diálogu hamutuk ho komunidade sira, husu atu koopera hodi muda no hela do’ok hosi mota-ninin tanba fatin ne’e risku ba akontese inundasaun iha tempu udan”.

“Se mak lakohi koopera no ulun to’os lakohi muda sai, ne’e sira nia problema, problema ba ekipa mak atu salva sira hosi fatin risku ne’e, se mota tuun mai sobu, mota sei la husu atu halo diskusaun ba demokrasia iha mota laran, demokrasia diskute iha nia fatin, importante ba Ekipa mak atu salva imi nia vida. “Tenik Germano

Iha loron 01 Janeiru 2025, akontese inundasaun fó impaktu maka’as tebes ba bee tama uma laran no rai-halai hodi rejulta ai-rin uma tohar no monu-tun kauza hosi udan boot

“Ita husu sira tenki koopera ho ekipa konjunta SEATOU hodi hamamuk hela fatin no muda hosi fatin refere tanba sorte iha ne’e mota estraga de’it sasan”.

“Governu mós prepara karreta tula sira ba sira-nia nia fatin, se husi Munisípiu kareta tula hela sira ba”.

“Kompañia hadia moru protesaun para deit iha leten, tanba sira hela iha mota-ibun ne’e la kohi sai husi fatin, tanba ne’e mak ohin ekipa mai halo servisu, Ita husu obrigatoriamente, sira sai husi fatin ne’e, ohin ne’e ba oin, fatin sira tenki hamamuk, ita atu hadi’a fatin ne’e”.

Tuir dadus ne’ebe SAPNews asesu katak komunidade afetadu ba eviksaun no risku dezastre natural ne’ebe identifikadu hodi husik hela fatin iha area Fomentu II Suku Comoro hamutuk atus rua ualunulu resin-ualu (288) no Suku Bebonuk hamutuk 31.

Tuir observasaun SAPNews iha terrenu nota katak despezu administrativa ne’e sobu uma mutin barak no uma andar hirak ne’ebé komunidade sira konstrui ho sira nia kasar-ween, sakrifisiu no dedikasaun tomak.

Komunidade sira hahu arruma ona sira nia sasan no tula ba karreta hodi lori fila ba hela iha munisipiu no fatin sira ne’ebe sira prepara ona.

Ekipa despezu administrativa ne’e lidera hosi Secretário de Estado dos Assuntos Toponímia e Organização Urbana (SEATOU), Germano Santa Brites Dias, akompaña hosi Diretora Geral Toponímia no Organizasaun Urbana (DG-TOU), Maria Odete Barros Florindo hamutuk ho Autoridade Munisípal Díli (AMD), Autoridade Protesaun Civil (APC), Ministerio Obras Públikas (MOP), IGEADI no hetan apoiu seguransa hosi Polisia Nasional Timor Leste (PNTL).

Jornalista : Ekipa Kobertura