Valor Ekselente Iha UNITAL ! Claudina Fo Agradese Ba Familia & FDHC, “Agrikultor Nia Oan Bele”.
Imajem : Graduada UNITA Claudina de Araujo Magno iha CCD, 26/01/2026
SAPNewsTL, Díli – Claudina de Araujo Magno husi Departamentu Siénsia Nutrisaun, Fakuldade Siénsia Saúde, Universidade Oriental Timor Lorosa’e (UNITAL), sente orgullu tanba remata ona nia estudu ho predikadu excelente, média final 3.53. Gradua ne’e fo agradese ba Familia & FDHC hodi deklara “Agrikultor Nia Oan Bele“.
Antonina Lopes – SAP News Pro
Graduada Claudina hateten nia orgulhu tebés tanba konsege remata estudu no atinji mehi ne’ebé nia luta. Nia fo agradese ba Maromak, aman no inan sira ne’ebé suporta nia ho esforsu boot, no FDCH ne’ebé fó oportunidade liu hosi bolsa estudu hodi bele kontinua nia estudu iha UNITAL.
“Ha’u Senti orgulhu tanba bele atinji ona mehi ne’ebe durante ha’u luta, agradese ba aman Maromak tanba buat hotu grasa maromak nian, agradese ba Pai no Mae ne’ebe fa’an modo hodi suporta ha’u, no agradese ba Fundus Dezenvolvementu do capital Humanu (FDCH) ne’ebe aak oferese bolsu estudu hodi hala’o ha’u-nia estudu iha UNITAL”. Dehan graduada Claudina de Arauju Magno ba SAPNews iha CCD,Dili, Segunda-Feira, 26/01/2026
Claudina hatutan segredu husi susesu mak pasiénsia, maske hasoru problema iha prosesu estudu, nia sempre lori pasiénsia hodi enfrenta buat hotu no apoiu husi família to’o nia bele realiza mehi sai realidade.
“Pasiénsia sai prinsípiu xave iha ha’u-nia prosesu akademiku, maski hasoru problema oioin durante estudu, ha’u nafatin uza pasiénsia hodi enfrenta dezafiu sira, apoiu husi família simples ne’ebé nafatin suporta ha’u ho esforsu, familia nia moris agrikultor sai motivasaun ida ne’ebé ajuda ha’u to’o atinji mehi ne’ebé ha’u luta, agrikultor nia oan bele”. Nia informa
graduada ne’e mos husu ba jovem sira iha rai-laran no rai-liur atu labele rende iha prosesu estudu no planu moris nian.
“Husu ba maluk joven sira hotu katak pasiensia mak dalan ne’ebe diak hodi manan buat hotu, prosesu hotu sempre liu-husi obstakulu, nune’e hanesan estudante labele rende ba mehi ho planu ne’ebe mak ita-bo’ot sira iha.” Nia salienta
Claudina ne’e afirma sei uza konñesimentu no esperiénsia ne’ebé nia hetan hodi servi ba nia família, sosiedade, no kontribui ba dezenvolvimentu setor saúde iha Timor-Leste.
Tuir dadus ne’ebe SAPNews, Universidade Oriental Timor Lorosa’e (UNITAL) nia serimónia solene graduasaun ba dala XVI ne’e ho tema “From dreams to a title: be a champion of change and development”, ho totál graduadu atus lima limanulu resin ida (551).
Graduadu hirak ne’e kompostu hosi Faculdade de Ciência da Educação (FCE) ho totál finalista (135) kompostu husi departamento Matemátika (10), Português (45), Inglés (40), Sosiologia (15), História (7), Biologia (20).
Faculdade Ciência da Saúde (FCS) ho total finalista hamutuk (243) ne’e kompostu husi Departamento Enfermagem (51), Saúde Públika (9), Analises Klinika Laboratoriais (157), Nutrisaun (26).
Fakuldade Siénsia Sosiál e Polítika (F-CISPOL) ho totál finalista hamutuk (35) kompostu husi Departamentu tolu mak hanesan Administrasaun Públika (18), Komunikasaun Sosiál (11), Relasaun Internasionál (6).