Veteranu “Tohumau” Husu Jovens Badinas Estuda & Matenek, Dezenvolve Nasaun
Imajem : Veterano Marcelino Sarmento ho kodigo “Tohumau” iha resintu Palasiu Prezidensial Aitarak-laran,Segunda (20/05/2024). Foto : António Tilman
SAPNewsTL, Díli – Atu Refleta hikas istória heroi no heroina sira nia kontribuisaun ba ukun rasik a’an, Veterano Marcelino Sarmento ho kodigo “Tohumau” dezafia Governu atu halibur Veteranu sira iha area rurais hodi komemora restaurasaun independénsia 20 de Maio.
Marcelino Sarmento ho kodigo “Tohumau” hateten, Governu no parte relavantne hotu presija tau atensaun ba selebresaun aniversariu 20 de Maio, labele hala’o deit iha Kapital ho Munisipio maibé tenki hala’o mos ba iha area Izolado sira hodi halibur povo ho veteranu sira ne’ebé sei hela iha area rurais.
“Nu’udar veteranu ida ha’u senti orgullo no kontente tebe-tebes bele partisipa iha seremonia loron 20 de maio ba dala rua nulu resin rua (22) ne’ebe bele selebra hamutuk ho povu no veterano hotu hotu hodi hanoin hikas fila fali herois no luta nain sira ne’ebe mak luta ba ukun aan iha rai doben ida ne”e”. Dehan Veteranu Marcelino Sarmeto ba Média SAPNews Timor-Leste iha resintu Palasiu Prezidensial Aitarak-laran,Segunda (20/05/2024)
Nia salienta, hanesan veteranu ida iha rai doben ida ne’e hakarak haktuir nasaun Timor Leste hetan independénsia mai husi kontribuisaun ema hotu ne’ebe dedika nia aan hasoru inimigu sira,
hodi hetan vitoria ba ukun rasik a’an, Tenik nia.
“Estadu Timor-Leste hambrik metin tamba povu iha ho nune’e eventu importante sira hanesan 20 de Maio, Governu tenki orienta no hala’o servisu ne’ebe diak liu tan ba tinan oin mai, bele halibur nafatin veteranu no veterana, povu kiik aileba no labarik sira hotu ne’ebe mak hela iha area rurais la asesu ba estrada no merkadu”.
Enkuantu, Veteranu ne’e husu ba Joventude no estudante sira hotu atu estuda no badinas hodi luta ba nasaun ne’e nia dezenvolvimentu tanba nasaun Timór-Leste sei sai furak liu tan liu husi joventude inovativu, kriativu no intelejensia.
“Foinsa’e sira tenki estuda makaas no badinas luta ba nasaun nia dezenvolvimentu liu husi kreatividade, inovasaun no intelijénsia”. Nia hameno
Jornalista : Antonio Tilman & Dircia Baptista