Vítima Iha Pasadu ! Juliana Deklara La Entrega Naktuka Ba Indonésia

SAPNewsTL, Díli : Relasiona ho problema rai Naktuka ne’ebé seidauk iha serteza, Vítima Juliana deklara la entrega rai Naktuka ba Indonésia tanba iha sertifikadu rai ho evidênsia ne’ebé kompletu.

Iha enkontru ho Sekretariu Jeral Partidu FRETILIN Dr. Mari Bin Amude Alkatiri Juliana hateten nia parte sente la satisfas ho desizaun ne’ebé Primeiru Ministru (PM) Kayrala Xanana Gusmão katak komunidade Naktuka presiza servisu hamutuk ho komunidade Oepoli.

“Ami nia prezensa mai iha ne’e tanba la satisfas ho desizaun Sua Exelénsia Primeiru Ministru ne’ebe hato’o katak ami komunidade Naktuka presiza atu servisu hamutuk ho komunidade sira iha Oepoli”. Dehan komunidade Naktuka Juliana iha Komite Sentral FRETILIN, Comoro Díli, (28/03/2025).

Juliana hateten, tinan 1999 ema sira ne’ebé pro ba Indonézia hodi destroi Nasaun Timor-Leste ikus mai Timor hetan independénsia no soberanu total sira mai servisu hamutuk iha Independesia ida ne’e, nia parte la satisfas ho desizaun refere.

“Iha tinan 1999, ita nia ema sira ne’ebe pro ba Indonézia sira mak destroi ita nia nasaun Timor-Leste, ikus mai ita hetan independénsia no soberanu ne’ebe total, se sira mai fali atu kontinua servisu iha soberanu total entaun ha’u mate tiha maka sira bele mai tanba buat barak mak akontese ba ami no ami sente la satisfas ho ida ne’e”.

Komunidade ne’e sente la konfortavel wainhira servisu hamutuk ho komunidade sira iha Indonézia tanba nia sei trauma ho akontesimentu iha tempu funu laran.

“Ha’u sente la konfortavel tebes wainhira servisu hamutuk ho komunidade sira iha Indonézia tanba ha’u rasik sai vitima ne’ebe maka hetan abuzu seksual eis “Tim-Tim” sira, se wainhira sira mai servisu fila fali iha rai Naktuka ne’e sei hamosu konflitu seluk ida tan tanba hau sei trauma hela ho akontesimentu ida ne’e”.

Juliana lori sertifikadu rai ne’ebé fornese hosi governasaun provinsia Timor-Timur, nune’e nia husu ba na’i ulun sira hodi tetu didiak tanba nia konsidera evidensia ne’e forte tebes.

“Tanba sa maka ha’u sente lakoi atu entrega rai Naktuka ne’e ba Indonézia, tanba ha’u iha evidensia ne’ebe forte, ha’u iha sertifikadu rai ne’ebe maka fornese hosi governasaun provinsia Timor-Timur iha momentu ne’eba”.

Juliana hatutan “Sertifikadu ne’e simboliza katak ha’u maka iha direitu no sai nain ba rai iha ne’eba, ha’u tenke lori mai iha Díli tanba dalaruma ha’u la lori sertifikadu ida ne’e ema hotu-hotu politiza ami nia prezensa”.

“Ami nia prezensa atu defende de’it lia-loos katak Naktuka ne’e ami nian laos ema seluk nian, ha’u sempre defende no lakoi ema Indonézia liu-liu ita nia eis Pro integrasaun, refuziadu atu mai servisu hamutuk ho ha’u tanba iha altura 1999, ha’u hanesan vítima ba ema milisia sira halo abuzu seksual, violensia seksual, kolu ha’u nia ropa no estraga ha’u hanesan animal”.

Nia deklara, karik na’i ulun sira hakarak entrega rai Naktuka ba parte Indonézia no servisu iha destakasaun foun, nia sente laran moras. Karik Indonézia servisu duni iha rai Naktuka sei haruka nia kaben hodi halo asaun krime hodi Nai ulun sira mak rezolve.

“Se karik na’i ulun sira hakarak entrega rai Naktuka ba iha parte Indonézia no sira bele servisu iha destakasaun foun sira ne’e, ha’u sente laran moras tebes. karik sira husi Indonézia servisu duni iha rai Naktuka, ha’u sei haruka ha’u nia kaben bele halo asaun ka krime ruma nune’e imi nai ulun maka rezolve ba”.

Sekretáriu Jeral Partidu FRETILIN Mari Bin Amude Alkatiri hateten, komunidade Naktuka mai hodi ko’alia ho autoridade relasiona ho sira nia preokupasaun iha Naktuka, maibe laiha rezultadu, nune’e komunidade hirak ne’e foti desizaun hodi hasoru nia.

“Sira mai to’o iha ne’e atu koalia ho autoridade tanba preokupasaun sira nian iha Naktuka, preokupasaun sira nian, hau nian, ita nian hotu maibe la konsege, autoridade sira la simu, parlamentu rasik no bankada FRETILIN mos la simu”.

“Sira husu atu ko’alia ho ha’u hanesan eis Primeiru Ministru no hotu-hotu hatene katak hau maka primeiru Prezidente RAEOA no fundador RDTL, ha’u sempre prontu simu, uluk ha’u ba iha ne’eba sira halo semináriu ida ha’u partisipa no deklara ha’u nia pozisaun”. Dehan Sekretáriu Jeral Partidu FRETILIN Mari Bin Amude Alkatiri

Sekretáriu Jeral Partidu FRETILIN hateten, problema ne’ebe komunidade Naktuka hasoru laos atu husu ba Governu Sentral hodi rezolve tanba nia konsidera ne’e direitu povu nia ne’ebe tenke ezije.

“Ne’e la’os atu husu maibe ezije, ita husu malu ne’e ita nia kusta maka ita husu malu, maibe ne’e direitu, direitu ne’e ita luta hodi ezije, tanba ne’e ha’u hanesan fundador no lider opozisaun lao laos atu fó sala ba ema ida, maibe la’o para haree no ha’u prontu atu ajuda rejolve problema”.

Lider polítiku ne’e akresenta, sei la buka Primeiru Ministru tanba konsidera situasaun polítika ne’e la’os fasil, nia fó sinal hodi prontu ajuda maibe se maka agora lidera tenke hatene povu sira nia preokupasaun.

“Se hakarak maibe karik lakoi, saida mak loos ne’e loos no saida mak sala ne’e sala, labele hirus dehan ida ne’e sala no ida ne’e loos ne’e mak ha’u husu”.

“Ha’u la buka tanba imi hatene lolos situasaun polítika ida ne’e laos fasil, ha’u fó sinal ona katak ha’u prontu ajuda tanba se mak iha leten tenke hatene povu nia preokupasaun ne’e saida, se hanoin katak sinal ne’ebe ha’u fó ne’e pozitivu entaun bele simu no ha’u prontu atu ajuda”.

Mari Alkatiri hatutan “Ha’u ajuda fó hanoin no hafanun ema saida maka direitu no saida maka ita idak-idak nia kusta, saida mak direitu povu nian no saida maka direitu idak-idak nian, saida maka soberania no saida maka halo negosiasaun hodi fahe malu buat ruma ne’e oin seluk”.Nia deklara

Iha fatin hanesan, Organizasaun Rede ba Rai Frederico Vieira hateten, Rede ba Rai nia parte hamutuk ho komunidade koko halo ona halo karta audiénsia ho parte governu sira hanesan Primeiru Ministru Kayrala Xanana Gusmão, Prezidente Repúbliku José Ramos Horta, Prezidente Parlamentu Nasionál inklui deputadu sira maibe laiha resposta.

“Iha tempu kleur ona maluk sira hosi Naktuka, Citrana, Beneufe no lian Nain sira hakarak tebes mai iha kapital Díli atu hasoru governu no estadu, ami koko liu hosi karta hodi fó ba Primeiru Ministru Kayrala Xanana Gusmão iha dia 18 Marsu maibe karta ne’e ladauk responde atu halo audensia ho Xanana, liu loron haat, lima ona mos seidauk iha resposta ruma hosi governu”.

Frederico hatutan “ami mos halo karta ba Prezidente Repúbliku atu halo audiénsia ho nia atu ko’alia kona-ba asuntu Naktuka nian maibe ida ne’e mos laiha resposta, iha Prezidente Parlamentu Nasionál mos ami haruka karta atu hasoru Prezidente no Deputadu sira maibe la responde ami nia karta, entaun loron haat ona hanesan ne’e ami seidauk hasoru ema importante sira ne’ebe maka kaer ukun iha Nasaun ne’e”.

Frederico mos akresenta, komunidade sira hosi naktuka mai laos atu husu ajuda iha setor ekonomia maibe sira preokupa no sente la seguru hela iha sira nia rai rasik.

“Sira mai laos ezije atu husu ajuda hodi fó tulun ruma ba asuntu ekonomia ne’e laiha, maibe sira rasik preokupa tanba hela iha sira nia rai Naktuka maibe sente la seguru”.

Enkuantu, sira konsege duni halo audiénsia ho bankada FRETILIN hodi ko’alia ho deputadu nain haat inklui mos deputadu ida hosi bankada KHUNTO, sira rona no sente orgullu tanba FRETILIN sempre ko’alia kona-ba soberania no direitu fundamental ba ema Oe-Cusse liu-liu Naktuka.

“Horseik loraik ami ba hasoru bankada FRETELIN iha Parlamentu Nasionál simu ami ho diak hodi ko’alia ho distintu deputadu haat (4) ida hosi KHUNTO, maibe ami rona katak FRETILIN maka sempre foti asuntu kona-ba Naktuka iha plenaria Parlamentu Nasionál, ne’e hanesan orgullu boot ba sira tanba FRETILIN sempre koalia kona-ba soberania, direitu fundamental ba ema Naktuka no Oe-Cusse oan sira”. Nia subliña.

Tanba ladauk hasoru ema importante iha parte Governu sira deside hodi hasoru Eis Primeiru Ministru Dr. Mari Alkatiri nu’udar fundador RDTL hamutuk ho lider sira seluk.

“Tanba ami la hasoru ema importante sira iha Governu, entaun ami iha hanoin ida hodi koko hasoru Eis Primeiru Ministru Mari Alkatiri nu’udar fundador RDTL, tanba Mari mak uluk hamutuk ho sira seluk hari’i nasaun ida ne’e”.Nia hakotu.

Fo hanoin fali katak asuntu Naktuka sei iha faze negosiasaun entre estradu Repúblila Indonésia no Repúblika Demokrátika Timor-Leste (RDTL).

Jornalista : Marciana da Conceição