Vizita Inter Miami Iha Uma-Mutin ! Trump Husu “Se Mak Jorgador Diak Liu, Messi ka Pele”?

SAPNewsTL, Internasionál : Durante serimónia vizita husi Klube Inter Miami ba Presidente Estados Unidos América (EUA) iha White House, Prezidente Donald J. Trump husu pergunta ida kona-ba “GOAT” iha futebol mundial, nia konkorda Lionel Messi mak jogador ne’ebe diak liu iha istória futebol.

“Se mak jogadór di’ak liu iha istória, Pelé ka Lionel Messi?” ema ne’ebe partisipa serimónia ne’e dehan: “Messi!” Trump hatan fali, “Ha’u mós konkorda. Ha’u hanoin nia mak ida ne’ebé di’ak liu.” Dehan Trump iha White House, 05/03/2026. Live The White House.

Momentu ne’e akontese bainhira Klube Inter Miami halo vizita Uma Mutin, hafoin klube ne’e manán troféu Major League Soccer Cup.

Lionel Messi entrega bola futebol rosa ida ba Prezidente Donald Trump iha serimónia ne’ebe hala’o iha White House

Inter Miami derrota Vancouver Whitecaps FC iha fulan Dezembru hodi hetan títulu liga futebol iha EUA.

Trump dehan “Leo, ita mai no ita manán, no ida ne’e buat ida ne’ebé difísil tebes atu halo. Presaun ne’ebé tau ba ita mos boot liu tanba ema barak espera ita atu manán.”

Messi tama iha serimónia hamutuk ho Trump. Nia rasik la ko’alia iha eventu ne’e. Durante serimónia, diskusaun mós ba asuntu polítika sira, inklui konflitu ho Iran, situasaun iha Venezuela, anúnsiu posível kona-ba Cuba no mos tarifasaun komérsiu.

Maibé bainhira koalia diretamente ba Messi — ne’ebé konhesidu la gosta ko’alia kona-ba polítika, Trump foka liu ba asuntu desportu.

“Ita (Messi) bele ba klub iha mundu tomak, maibé ita hili atu ba Miami. Ha’u kompriende, tanba tempu iha ne’ebá di’ak loos. Ita mós ba joga iha Doral?” Trump dehan, “Obrigadu tanba ita lori ami hotu iha viajen ida ne’e, tanba ita talentozu tebes no mós ema di’ak.”

Entre estrela sira Inter Miami CF ne’ebé marka prezensa iha eventu ne’e mak Luis Suárez, Tadeo Allende no Rodrigo De Paul. Komisionáriu Major League Soccer, Don Garber, mos tuur hamutuk ho Andrew Giuliani, xefe task force Casa Branca nian ba 2026 FIFA World Cup.

Inter Miami sai nu’udar ekipa MLS dahuluk ne’ebé konvida ba Casa Branca durante mandatu rua Trump nian.

Messi, ne’ebé manán troféu Ballon d’Or dala ualu, lidera Argentina national football team manán troféu mundial iha tinan 2022. Jogadór idade tinan 38 ne’e sei joga tan iha troféu mundial 2026 realiza iha United States, Canada no Mexico.

Kompetisaun Troféu Mundial tinan ne’e iha preokupasaun tanba konflitu ho Iran (líder supremu Ayathola Ali Khamenei mate) no konflitu iha México hafoin lider kartel Nemesio Oseguera mate iha operasaun militar ida.

Iran mos kualifikasu hodi paritisipa kopa mundial 2026 huai total 48 ekipa.

Durante serimónia, Trump mós komenta kona-ba konflitu ho Iran. Hafoin atake militar husi EUA no Israel semana kotuk, xefe federasaun futebol Iran nian, Mehdi Taj, dehan katak Iran difísil atu foku ba kopa nundial ho esperança.

Trump dehan, “ha’u la importa se Iran partisipa ka lae. Ha’u hanoin Iran agora nasaun ida ne’ebé sofre no derrota boot.”

Saida mak sei akontese, se Iran deside sai husi troféu mundial 2026. Durante tinan 75 liu ba, la iha ekipa ne’ebé kualifika ba Kopa Mundial no deside sai.

Entretantu, FIFA World Cup 2026 sei hahú iha 11 Juñu, ho partida abertura entre Mexico national football team no South Africa national football team iha Mexico City.

Durante serimónia, Trump mos rekorda bainhira nia haree legenda Brazil Pelé joga ba New York Cosmos. Nia haree ba Messi no dehan: “Ita bele di’ak liu Pelé.” Depois nia husu ba ema sira iha sala: “Sira hanoin se mak di’ak liu?”

Proprietáriu Inter Miami, Jorge Mas, dehan katak ekipa nia muda kultura futebol iha Estados Unidos ba nafatin.

Messi nia vizita ba Casa Branca ne’e nu’udar primeira vez. Iha Janeiru 2025, governu Joe Biden konvida nia atu simu medalha Presidential Medal of Freedom, maibé Messi la bele marka prezensa tanba konflitu agenda.

Fontes : The White House & AP
Foto : Media Internasional