Vizita Papa Francisco ! Fó Teste Ba Kbi’it F-FDTL & PNTL
Imajem : FALINTIL Forsa Defeza de Timor-Leste (F-FDTL)
SAPNewsTL, Dili – Asegura paz no estabilidade ba vizita Sua Santidade Papa Francisco, Xefe Estadu Maiór-Jeneral F-FDTL Falur Rate Laek konsidera ne’e nu’udar teste ida ba kbi’it instituisaun F-FDTL no PNTL.
Forsa Defeza – F-FDTL no Forsa Seguransa – PNTL hari’i ho konstante konfiansa no amizade hodi proteje no defende povu. Koordenasaun di’ak no respeitu ba malu iha instituisaun rua ne’e nia laran integradu.
Xefe Estadu Maiór-Jeneral F-FDTL Falur Rate Laek dehan, FALINTIL Forsa Defeza Timor-Leste (F-FDTL) no Polísia Nasionál Timor-Leste (PNTL) kaer lisaun importante hodi asegura vizita Sekretáriu Jeral ONU António Guterres ba selebrasaun loron konsulta popular no vizita Papa Francisco mai Timor-Leste.
“Forsa rua iha misaun importante atu asegura vizita importante sira ne’ebé sei akontese iha tenpu badak, hanesan vizita Sekretáriu Jerál ONU nian, vizita Sua Santidade Papa Francisco no Alta Entidade sira seluk ne’ebé vizita Timor-Leste iha selebrasaun importante loron nasionál sira hanesan Konsulta Populár no Loron INTERFET nian”. Xefe Estadu Maiór-Jeneral F-FDTL Falur Rate Laek iha Fatuhada, 20/08/2024
Falur Rate Laek hatutan, vizita importante ne’e nia seguransa fo teste ba instituisaun F-FDTL no PNTL hodi garante paz, estabilidade no trankuilidade.
“Vizita sira ne’e ho importánsia bo’ot ba ita-nia rain, no teste ida ba ita nia instituisaun rua nia kbi’it atu garante trankuilidade, ha’u apela ba setór hotu-hotu sosiedade nian, inklui organizasaun arte marsiál no rituál sira, organizasaun naun-governamentál sira no personalidade hotu-hotu atu kontribui ba susesu hasa’e Timor-Leste nia naran di’ak iha komunidade internasionál nia oin”.Nia husu
Imajem : Xefe Estadu Maijor Jeneral Domingos Falur Rate Laek iha Quartel Jeral Fatuhada,20/08/2024. Foto : Marciana da Conceição
Falur Rate Laek akresenta, Timoroan hotu iha responsabilidade hodi hametin paz, rekonsiliasaun no rekonstrusaun nasaun.
“Timoroan hotu hetan bolu atu destaka erói sira nia ezemplu ba jerasaun foun sira, atu hanoin hikas importánsia loron ohin nian no mobiliza nasaun nia forsa hotu-hotu hodi konsolida dame, rekonsiliasaun nasionál no rekonstrusaun nasaun nian”.
Jerasaun hotu-hotu presiza hamoris importánsia husi faktu istóriku sira hodi haforsa ispíritu patriotizmu, valor liberdade no solidariedade iha nasaun laran.
“Mantein no hamoris importánsia husi faktu istóriku sira-ne’e no transmite ba jerasaun sira iha futuru, reforsa sentidu patriotizmu no valór sira liberdade nian, dame no solidariedade”.
F-FDTL sei prezente nafatin hodi estabelese orden, mantein kalma, apoia populasaun no defende integridade territoriál.
“Ita presiza kria ambiente ida ho responsabilidade individuál no sosiál bazeia ba valór sira hanesan onestidade, rekoñesimentu ba méritu, lia-lo’os, F-FDTL sei defende integridade territorial no apoia povu iha tempu hotu”.
Enkuantu, Sekretáriu Jeral ONU António Guterres sei to’o loron 28-30 ulan Agustu no Papa Francisco sei to’o Timor-Leste iha loron 9-11 fulan setembru tinan 2024.
Jornalista : Marciana da Conceição & Conzita Mota
