Vizita Sebastião Nia Aman ! Naimori Husu Jovens Banati & Brani Defende Lialos
Imajem : Konselleiru KHUNTO José dos Santos Naimori Bukar hala’o vizita ba Saudozu Sebastião Gomes nia aman iha Suku Waimori, Ossu, 23/08/2025
SAPNewsTL, Viqueque : Presidente Partidu Kmanek Haburas Unidade Nasional Timor Oan (P-KHUNTO) Armanda Berta ho Konselleiru Máximu Jose dos Santos Naimori vizita aman Saudozu Sebastiao Gomes iha residensia wemori, postu administrativu Ossu.
Konselleiru Masimu Partidu KHUNTO Naimori Bucar hateten, saudozu Sebastiao Gomes hanesan joven ida ne’ebe brani hodi oferese vida ba rai ida ne’e.
“Ha’u atu hateten deit familia ida ne’e kontribui ba ukun an, Saudozu Sebastião hanesan joven ida ne’ebe maduru teb-tebes, joven ida ne’ebe mak luta hodi defende rai ne’e no ita mos sura ho nia dedikasaun ba ita-nia ukun rasik an”. Dehan Konselleiru Máximu Partidu KHUNTO José dos Santos Naimori iha Wenori, 23/08/2025.
Konselleiru KHUNTO ne’e hatutan, vizita saudozu Sebastião Gomes nia aman atu fo onra ba nia tanba aman ida ne’ebe hetan oan diak ida hodi oferese ba nasaun.
“Ha’u mai vizita Saudozu Sebastião Gomes nia aman nu’udar Timor oan maske dala wain ema haluhan ona, ita fo onra ba nia, nia luta hodi defende rai ida ne’e, komite 12 de Novembro iha tanba Saudozu Sebastião Gomes nia luta ho nia aten brani hodi dedika nia an ba rai ida ne’e”.
Naimori husu ba joven sira atu banati tuir Saudozu Sebastião Gomes nia ain fatin, brani defende lialos no brani halo buat diak ruma ba ita-nia rain no povu.
“Saudozu barani hodi defende ita nia rai, tamba ne’e husu ba joven sira ohin loron tenki brani, defende nia rai ne’e ba futuru”. Nia hameno
Iha fatin hanesan, Afonso Gomes sente orgullu tanba lider Partidu KHUNTO ho nia espoza bele hala’o vizita ba nia residênsia.
“Ha’u sente orgullu tanba durante tinan barak estadu nunka mai vizita ami, hanesan aifunan karik atu namlaek daudauk ona maibé ohin lokraik teki-teki karreta ida mosu mai ha’u hanoin husi estadu nian, maibé ita-nia oan “Naimori” ho nia espoza mak hakat to’o mai iha ha’u nia uma hodi mai husu ha’u nia kondisaun”.
“Nia mai fo korajen atu ha’u labele hanoin barak maibé oinsa ha’u bele daskansa barak, han no hemu bee barak hodi hala’o ha’u nia atividade lor-loron, obrigadu barak ba vizita ida ne’e,agradese tanba bele rekunhese ha’u-nia ona ninia brani no dedikasaun”.
Enkuantu, Sebastião Gomes hakotu iis iha loron 28 fulan Outubro tinan 1991 tanba hetan oho hosi militar Indonésia wainhira Sebastião defende povu Timor-Leste ninia direitu ba autodeterminasaun.