Vizita Sekretariadu SAPNews ! Otelio : Serví Públiku Ho Lialos
Imajem : Prezidente Konsellu Imprensa Otelio Ote hamutuk Konseleira no Ezekutivu SAPNews iha Stúdiu SAPNews Fatuhada, 06/03/2025. Foto : Daniel da Silva
SAPNewsTL, Díli — Hafoin hala’o vizita ba Sekretáriadu Mídia SAPNewsTL, Prezidenti Conselhu Imprensa Timor-Leste (CI) Otelio Ote deklara, vizita ba orgaun komunikasaun sosiál nu’udar kompeténsia husi Konsellu Imprensa hodi hametin liberdade imprensa, liberdade assesu informasaun no haburas demokrasia iha rai laran.
Prezidenti Conselho de Imprensa Timor-Leste Otelio Ote hateten, Objetivu husi vizita ba meios komunikasaun sosial nu’udar kontinuasaun vizita iha tinan kotuk nian hodi haree kondisoens, dezafiu, progresu no dezenvolvimentu iha instituisaun média.
“Ho vizita ida ne’e ami bele hatene direita oinsa média nia kondisaun, progresu ne’ebe akontese iha média, oinsa dezafiu kada loron no oportunidade saida mak atu bele prepara no hetan iha futuru, hodi hametin no haburas demokrasia iha rai laran”. Dehan Prezidente CI Otelio Ote ba SAPNews iha Sekretáriadu SAPNews Fatuhada, Quinta (06/03/2025)
Lider orgaun reguladora média nasionál ne’e aprofunda, rezultadu vizita ne’e ekipa Conselhu Imprensa halo produsaun ba relatoriu hafoin entrega ba kompozisaun Conselhu Imprensa foun ne’ebe sei lidera CI durante tinan 2025-2029.
“Ami sei halo relatoriu badak ida hodi entrega ba kompozisaun Konsellu Imprensa foun ka plenaria foun, nune’e sira bele halo ba programa sira ne’ebe tinan hat (4) tuir mai, tanba ita hatene kompozisaun Konsellu Imprensa foun sei hahu iha 2025-2029, entaun vizita ida ne’e importante tebe-tebes hanesan kontinuasaun husi vizita tinan kotuk nian ba média sira”.
Nia hatutan, kompetensia ida husi Konsellu Imprensa atu ativu halo komunikasaun institusional ho media, instituisaun estadu, sosiedade sivil no mos orgaun estadu sira hodi hametin liberdade imprensa, liberdade assesu informasaun no promove demokrasia.
Ligadu ho insulta malu entre jornalista no média nasionál sira kona-ba produsaun notisia, Prezidenti Conselhu Imprensa afirma, Instituisaun média hotu-hotu hari’i ho vizaun no misaun rasik, entaun karik iha jornalista ou média balun ne’ebe hala’o kna’ar ho lolos tuir vizaun no misaun, karik iha insulta balun labele pániku.
“Ita lalika preokupa ho média sira seluk, tanba média seluk hakarak kompete ida ne’e problema sira nian, ita labele ses husi vizaun no misaun ne’ebe ita iha, tanba bainhira ita ses husi vizaun no misaun ita nia politika husi konteudu jornalistiku ses husi ita nia pozisaun, mantein kredibilidade informasaun ba públiku”.
Imajem : Prezidente Konsellu Imprensa Otelio Ote hala’o enkontru hamutuk ho Konseleira no Ezekutivu SAPNews iha Sekretariadu Fatuhada,06/03/2025
Prezidente Otelio Ote reafirma, kompetisaun média iha Timor-Leste no mundial hanesan kestaun normal ida, importante mak investe kapasidade ba ekipa ida-idak iha média tuir deit vizaun no misaun ne’ebe instituisaun hili bainhira hari’i média.
“Primeiru tanba imi liu ona tinan tolu (3) hanesan etapa primeiru hari’i nune’e tuir mai, ita tama ona ba etapa ida bolu hametin, entaun buat ne’ebe imi bele halo mak identifikasaun ba ita nia forsa no potensia iha instituisaun média ka sala redasaun, oinsa rekursu umanu, oinsa ita nia produsaun notisia kada loron oinsa ita nia kontribuisaun ba publiku atu hetan informasaun, labele tau kestaun ba asuntu kompetisaun entre média sira”‘.
Nia haktuir, instituisaun média foku ba objetivu iha ona planu estratéjiku ba Dezenvolvimentu média ka lae, iha planu negosiu ga seidauk, jestaun redasaun durante ne’e la’o oinsa, Potensia ba negosiu la’o oinsa, atu nune’e iha tinan 2025 média bele garante sustentabilidade.
“Tamba desde ita hari’i ho espiritu nasionalismu, ita hari’i ho komprimisiu voluntariu, maibé tempu la’o nivel problema sosial ataka nesesidade mos iha, automatikamente ita tenki hasoru malu ho probelma sira hanesan espiritu nasionálismu, nesesidade ou kualidade jornalismu, potensia ida ne’ebe ita bele intensifika mak reverifikasaun ba estrutura haree fali vizaun no misaun hare planu negosiu no avansa ba oin”.
Conselhu Imprensa nia esperansa ba SAPNews tenki prontidão ba serbisu fiar ba komprimisiu honestidade, garante kapasidade hodi dezenvolve produtu jornalistiku no matein kredibilidade.
“Esperansa ba SAPNews primeiru jornalista sira tenki konsiten obedese ba komprimisiu ho hanoin atu servi publiku lori lia los, labele hari média hanesan fatin ida atu hetan pozisaun. Segundu ekipa tenki kaer metin votus ka kareira kuda iha pensamentu katak ha’u hakarak sai jornalista duni nune’e bele ultrapasa dezafiu sira”.
Entretantu hafoin vizita Prezidenti Conselhu Imprensa Timor-Leste Otelio Ote hato’o mesanjen ba média nain no jornalista SAPNews sira katak, kumpri lei orgaun komunikasaun sosial, garante konfidensialidade, kontinua eziste no loke oportunidade asesu informasaun inklusivu.
“Ha’u nia mensajen kontinua eziste asegura produsaun notisia kada loron, loke oportunidade asesu informasaun inklusivu, la haree ba ema nia rasa, kondisaun sosial no klase ekonomia no hakruk ba kode etika jornalista, tama iha kauza, nune’e produtu ne’ebe ita boot sira halo produsaun bele hetan rekoinesementu husi publiku no kredibilidade iha publiku”. Nia sublinha.
Iha fatin hanesan, Konseleira Mídia Sapnews Judite Dias Ximenes fo agradese ba konsellu imprensa tanba bele halo vizita ida ba sekretariadu SAPNews hodi partilla hanoin no perspetiva balun, oinsa bele garante liberdade imprensa no expressaun iha Timor-Leste.
“Ami hakarak agradese ba konsellu imprensa tanba bele vizita ami hodi fahe hanoin no ideia pertinente sira ba dezenvolvimentu mídia iha Timor, oinsa bele asegura nafatin liberdade imprensa no expressaun iha rai-laran tuir kode étika jornalismu no lei komunikasaun sosial”. Dehan Judite Dias
Prezidente SAPNews Clementino Bragança Machado sente orgullu no fo apresiasaun ba konsellu imprensa tanba sempre kontrola no apoia jornalista husi mídia nasionál sira liu hosi formasaun no treinamentu sira, espera bele kontinua apoia midia sira ho kapasitasaun.
“Ha’u apresia tebes tanba desde ke SAPNews eziste sempre hetan atensaun no formasaun oioin hosi konsellu imprensa, ba ami konsidera ne’e importantes tebes no espera bele kontinua programa formasaun ba jornalista sira, nune’e bele garante kualidade no produtividade jornalista sira nian ba futuru”. Nia hatete
Enkuantu, antes ne’e Prezidente Konsellu Imprensa hala’o ona vizita ba mídia nasional no rádiu komunidade sira nia fatin ida-idak iha Timor-Leste.
Jornalista : Guilhermino Ramos da Cruz