VPM, MKAS-MDRHC Apresenta Osamentu Adisional Liu Millaun $ 70 Ba Programa 1.300
Imajem : Primeiru Ministru Kay Rala Xanana Gusmão & Vise Primeiru Ministru Mariano Assanami Sabino iha Salaun Ministério Finanças Aitarak-Laran, 22/08/2025.Foto : Média GVPM II
Prepara Programa 1.300 ! VPM, MKAS-MDRHC Apresenta Osamentu Adisional Li
SAPNewsTL, Dili : Vise-Primeiru-Ministru, MKAS-MDRHC, Eng. Mariano Assanami Sabino informa tetu orsamentu ne’ebé simu bá Ministériu MDRHC ne’e ki’ik-liu, tanba ne’e maka aprezenta orsamentu adisionál ho montante millaun $70-resin bá programa prioridade Abitasaun Komunitária hamutuk 1.300 ba munsípiu 13.
Marciana da Conceição – SAPNewsTL
“Kona-ba tetu orçamentu ne’ebe simu ona seidauk fixu tanba Komité Revizaun Orsamentu (KRO) sei tetu no halo avalisaun ba orsamentu adisional ne’ebe parte Ministériu apresenta tuir programa sira ba tinan 2026”. Dehan MDRHC Mariano Assanami Sabino iha Aitarak-Laran, 22/08/2025. Sita média GVPM
Komité Revizaun Orsamentu entrega ona Tetu Orsamentu 2026 bá Vise-Primeiru Ministru, Ministro Koordenador bá Assuntu Sosiais, Ministériu Dezenvolvimentu Rurál no Habitasaun Komunitária (V-PM-MCAS-MDRHC) ho Instituisaun tutelada sira liu husi reuniaun ne’ebé hala’o iha Auditóriu Ministériu Finansas (MF) Aitarak-Laran.
Tetu Orsamentu bá Gabinete Vise-Primeiru Ministru hamutuk $596,322 ne’ebé fahe bá Saláriu no Vensimentu $304,227, Bens no Servisu Korrentes $292,095 no ba Gabinete Ministro Koordenador bá Assuntu Sosiais, hamutuk $391,576 fahe bá Saláriu no Vensimentu $166,576, Bens no Servisu Korrentes $225,000.
Tetu Orsamentu ba Ministério MDRHC hamutuk $8,056,673, fahe bá Saláriu no Vensimentu $1,703,948, Bens no Servisu Korrentes $1,352,725 ho Transferênsia Públikas $5,000,000.
Instituisaun Tutelada sira mak hanesan, Gabinete de Apoio á Sociedade Civil (GASC) ho totál $17,216,170 ne’ebé fahe bá Saláriu no Vensimentu $259,113, Bens no Servisu Korrentes $157,057 ho Transferênsia Públika hamutuk $16,800,000.
Instituto Nacional de Combate ao HIV-SIDA, IP ho montante $731,177 ne’ebé fahe bá Saláriu no Vensimentu $230,353, Bens no Servisu Korrentes $500,824.
Instituto Para a Defesa dos Direitos da Criansa,IP ho montante $616,485 fahe bá Saláriu no Vensimentu $294,052, Bens no Servisu Korrentes $322,433.
Unidade de Missão para o Combate ao Stunting ho montante $107,557 fahe bá Saláriu no Vensimentu $69,562 ho Bens no Servisu Korrentes $37,995.
Gabinete Ministru Koordenadór bá Assuntu Sosiais maka atu koordena polítika sira iha área sosiál sira hanesan saúde, edukasaun, juventude, desportu, igualdade, no solidariedade sosiál, no sira seluk tan hodi asegura implementasaun no avaliasaun polítika públika ne’ebé ho objetivu atu hadi’a servisu ne’ebé presta bá sidadaun sira.
Enkuantu, Ministério Dezenvolvimento Rúral e Habitação Comunitária hanesan Ministériu foun ne’ebé estabelese iha IX Governu Konstitusionál haktuir Dekretu Leí Organika Nú 67/2023 14 Setembru, iha papel importante atu koordena no ezekuta politíka MDRHC hadi’a povu nia moris.
Reuniaun KRO prezide hosi Primeiru-Ministru (PM), Kay Rala Xanana Gusmão ho prezensa hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministra Finansas, Santina José Rodrigues Viegas Cardoso, Ministru Obras Públikas, Samuel Marçal, Ministru Planeamentu no Investimentu Estratéjiku, Gastão Francisco de Sousa no Vise- Ministra Finansas, Felícia Claudinanda Cruz Carvalho.
Durante tetu orçamentu iha KRO, ministériu no Sekretariu Estadu sira maioria husu orçamentu adisional tuir planu prioridade kada ministériu nian.