Zeovonia Mantein Lidera AJTL, Jornalista Defensor Direitu Umanu La’os Portavoz Polítiku

SAPNewsTL, Díli – Assosiasaun Jornalista Timor-Leste (AJTL) hala’o kongresu ba dala lima (5), hodi hala’o diskusaun nakloke no eleisaun ba estrutura foun. Iha kongressu loron daruak Zeovonia Vieira re-eleitu hodi lidera AJTL ba mandatu durante periodu tinan 2024-2028

Assosiasaun Jornalista Timor-Leste (AJTL), realiza kongressu ba dala lima (5) hodi hili estrutura foun, ne’ebe sei kontinua ho eleisaun ba mandatu tinan haat (4), periodu 2024 to’o 2028.

Prezidente AJTL Zeovonia Vieira hateten, AJTL organiza diskusaun nakloke hodi ko’alia kona-ba asuntu respeita sala redasaun no respeitu públiku nia direita asesu ba informasaun, tanba iha era agora luta ba direitus umanus sai hanesan prinsipiu fundamental ba jornalista sira.

“Loron dahuluk estrutura organiza diskusaun nakloke hodi ko’alia kona-ba asuntu importante sira, tanba ita hatene katak iha era agora luta ba direitus umanus hanesan prinsipiu fundamental ne’ebe AJTL kaer iha tinan rua nulu resin-lima (25) nia laran”.Tenik Prezidente AJTL Zeovonia Vieira ba jornalista sira iha Salaun CNE Kaikoli, 24/08/2024

Prezidente AJTL ne’e salienta, diskusaun nakloke refere hala’o hodi koalia kona-ba Asosiasaun Jornalista Timor-Leste ne’ebe tau importansia ba liberdade imprensa no espresaun, no fó solidariedade ba jornalista sira iha nasional no rezional hodi luta hasoru intimidasaun.

“Ohin halo diskusaun nakloke hodi konvida orador ne’ebe foku ba fundador hodi koalia kona-ba tanba sa asosiasaun Jornalista tau importansia ba liberdade imprensa no espresaun ? fó solidariedade sai importante entre jornalista sira iha nasional no rezional hodi luta hasoru intimidasaun ka ameasa ne’ebe sira hasoru”.

Prezidente AJTL afirma assosiasaun ne’e sei kontinua luta ba lialos, defende direitus humanus, direitu jornalista sira, promove liberdade imprensa no expressaun iha Timor-Leste.

“AJTL sente importante los hodi halo refleksaun bainhira jornalista ida hetan ameasa ka torturasaun husi instituisaun importante sira, maske laos husi menbru AJTL , maibe ita tenke hamrik hamutuk hodi luta ba sira nia direitu atu moris seguru, AJTL luta ba Jornalista sira nia seguransa oinsa kontinua aplika liberdade imprensa hahu husi sala redasaun”.

“Iha situasaun agora influensia politika no mos ekonómia iha sala redasaun ne’ebe aas teb-tebes, liu husi diskusaun ida ne’e oinsa bele hametin liu ita nia solidariedade no hanoin tuir prinsipiu jornalista nian, bainhira jornalista ida sente la seguru ne’e ita hotu afetadu”.

“Ita kontinua haburas AJTL nia misaun ne’ebe foka liu kona-ba oinsa kontinua promove liberdade imprensa no espresaun iha Timor-Leste iha era dijitalizasaun, AJTL nafatin simu jornalista foun ne’ebe hakarak rezistu hodi sai membru AJTL nian, no importante tebes ba sira oinsa bele promove no hasa’e sira nia kualudade hanesan jornalista, atu kontinua dezenvolve mídia iha Timor sai di’ak liutan, nune’e bainhira ita ba iha nivel internasional ema bele hateten jornalista mídia iha Timor nia kapasidade la diferente ho mídia internasional”.

Zeovonia Vieira dehan, AJTL sei halo aproximasaun instituisaun relevante sira no partidu polítiku sira hodi respeita sala redasaun, respeita servisu jornalista nian no respeita lei komunikasaun sosial.

“Ita tenke kontinua uza aprosimasaun dialogu ba instituisaun sira ne’ebe iha poder no partidu politiku sira atu respeita jornalista sira nia servisu, bainhira jornalista ida sala labele ho dalan ameasa, tanba iha dalan tuir prosesu lei komunikasaun sosial, tanba ne’e AJTL kontinua aprosima ema hotu tenke respeita papel jornalista, tanba jornalista sai hanesan fonte entre sidadaun ho estadu hodi buka solusaun ne’ebe diak hodi responde preokupasaun públiku nian ne’ebe karik estadu seidauk responde ho diak”.

Entretantu, iha kongresu loron daruak kongresista sira kontinua fo konfiansa ba Zeovonia Vieira ho estrutura hodi lidera AJTL ba periodu 2024-2028 ho votus 109 afavor, nulu 3 no kontra 4.

Iha intervensaun, Sekretaria Estadu Komunikasaun Sosial (SEKOMS) Espedito Dias Ximenes parabeniza estrutura foun hodi kontinua promove liberdade imprensa no expresaun iha Timor-Leste, defende media atu livre husi poder polítiku no poder ekonomia tanba sala redasaun nunka bele hetan intervensaun.

“Parabens ba Zeovonia Vieira ho estrutura foun sira, espera kontinua sai defensor ba direitus humanus no la sai portavoz ba lider polítiku, jornalisa nunka sai portavoz polítika, media tenki livre husi intervensaun polítiku no ekonómiku”. Hateten SEKOMS Espedito Dias Ximenes

AJTL hari’i iha tinan 1999, to’o ohin loron Membru AJTL hamutuk atus lima resin (500) resin ne’ebe kompostu husi fotografer, kolonis, blogger, desainer, radiu komunidade, journalist no estudante komunikasaun sosial.

Kongresu dalimak ne’ebe la’o durante loron (24-25/08/2024) ne’e hetan partisipasaun maksimu hosi fundador sira, konsellu imprensa, SEKOMS, jornalista sira, parseiru sira no membru AJTL.

Jornalista : Marciana da Conceição