𝗘𝗨𝗧𝗟 𝗞𝗼𝗻𝘀𝗶𝗱𝗲𝗿𝗮 “𝗣𝗡𝗧𝗟 𝗟𝗮𝗶𝗵𝗮 𝗞𝗮𝗽𝗮𝘀𝗶𝗱𝗮𝗱𝗲, 𝗜𝗻𝘃𝗲𝘀𝘁𝗲 𝗢𝘀𝗮𝗻 𝗦𝗮𝘂𝗴𝗮𝘁𝗶 𝗗𝗲𝗶𝘁”.

SAP News, Dili : Porta voz Estudante Universitário Timor-Leste (EUTL) Natalício Nunes konsidera PNTL laiha kapasidade, tan ne’e presiza aloka osan hodi fo formasaun ba membru PNTL.

𝐌𝐚𝐫𝐜𝐢𝐚𝐧𝐚 𝐝𝐚 𝐂𝐨𝐧𝐜𝐞𝐢𝐜̧𝐚̃𝐨 – Mídia Sapnews

Porta voz EUTL Natalício Nunes hateten “PNTL la autoriza ida ne’e no dehan katak iha risku, se PNTL hatene ona katak risku, entaun tenke dezeña no uza tátika saida para bele ses husi risku ne’e no PNTL iha kapasidade para atua risku neébé produs husi ema individu ida”.

PNTL labele konsidera risku ida ne’e no ikus mai uza risku ne’e atu impede ka limita fali direitu sidadaun nian ne’ebé halo atu kontribui ba dezenvolvimentu nasaun ida ne’e, ida ne’e tuir lolos labele.

“Tanba ne’e ita hateten katak osan sira ne’ebé durante ne’e investe ba instituisaun PNTL ne’e saugati deit, tanba la fo formasaun ne’ebe diak. Sira laiha formasaun tatika militar nian atu fo seguransa ba sidadaun nia direitu ne’ebé garante iha konstituisaun no lei sira, ikus mai sira uza deit toder atu impede”. Hateten Porta voz EUTL Natalício Nunes iha kampus sentral UNTL, 01/10/2025

Natalício hatutan, ba oin osan sira ne’ebé agora kansela ona, husi prado no pensaun vitalisia ne’ebe maka promulga ona husi Prezidente República, “ita husu aloka fali ba PNTL hodi bele fo formasaun ba PNTL sira, tanba oras ne’e PNTL sira seidauk iha kapasidade minimu atu fo seguransa”.

“Ita hare’e dalaruma pawai sira ne’ebé laiha lisensa no fo koñesimentu ba PNTL, maibe PNTL la interven ida ne’e, maibe ida ne’ebe maka EUTL halo, fo koñesimentu no iha koordenasaun diak sira la aseita ida ne’e”. Nia dehan

Entaun atu dehan katak “PNTL laiha kapasidade atu fo seguransa no PNTL la komprende lei no la konprende ita-nia konstituisaun. PNTL la komprende regra ka lei organiku PNTL nian rasik”.

Husu para ba oin bele iha formasaun, “orienta unidade formasaun juridiku ba sira atu bele komprende liu-liu iha atuasaun iha ita-nia atividade sira hanesan ne’e”.

Ligadu ho lori Bandeira Palestina no West Papua, Porta voz ne’e dehan “Ohin, PNTL moos koalia ida ne’e, maibe ba ami EUTL bandeira hanesan Papua nian, sira agora luta hela ba direitu autodeterminasaun ka ukun aan, hanesan mós uluk iha luta libertasaun Patria Papua mós fó nia kontribuisaun liu hosi solidariedade internasionál”.

Entaun ohin liu hosi atividade sira ne’e povu no estudante bele uza ida ne’e para bele demostra sira nia hanoin, fo solidariedade ba Papua no husu ba Estadu Unidu atu bele liberta Papua ne’ebé maka daudaun ne’e hanehan husi nasaun viziñu Indonezia.

Bandeira ne’ebe maka ohin sira hiit iha ne’e, ne’e laiha problema tanba konstituisaun garante no ida ne’e direitu ida ne’ebé estudante no povu tenke halo no ne’e normal, “karik ita kria instabilidade iha ita nia rai laran ne’e mak labele”.

Maibe saida maka ohin kolega sira halo ne’e normal iha estadu direitu no demokrátiku no konstituisaun garante, ida ne’e la implika ba dezenvolvimentu nasaun inklui instituisaun PNTL ne’ebé oras ne’e iha kapasidade ne’ebé la sufisiente no minimu tebtebes atu bele komprende sasan sira ne’e.

𝐍𝐨𝐭𝐢́𝐜𝐢𝐚 𝐑𝐞𝐥𝐞𝐯𝐚𝐧𝐭𝐞 : 𝗘𝗨𝗧𝗟 𝗞𝗼𝗻𝘀𝗲𝗴𝗲 𝗛𝗮𝗹𝗼 𝗞𝗼𝗺𝗯𝗼𝗶𝘂 & 𝗞𝗼𝗻𝘀𝗶𝗲𝗻𝘁𝗶𝘇𝗮 𝗣𝗼𝘃𝘂 𝗞𝗼𝗻𝘁𝗿𝗮 𝗜𝗻𝗷𝘂𝘀𝘁𝗶𝗰̧𝗮

𝐒𝐀𝐏 𝐍𝐞𝐰𝐬 𝐓𝐋, 𝐃𝐢́𝐥𝐢 : Portavós Estudante Universitáriu Timor-Leste (EUTL) Natalício Nunes deklara, objetivu mobiliza Estudante Universitariu Timor-Leste realiza marsa popular
hodi konsientiza mentalidade povu kontra injustisa sosial no polítika ne’ebe fó benifisiu ba individu balun iha Timor-Leste.

Tuir Portavós EUTL dehan, atividade komboiu ne’e halo parte husi estratéjia EUTL atu aumenta partisipasaun sidadáun, hodi kontra
injustisa ne’ebé eziste iha povu nia leet.

“Ita presiza konsientiza komunidade atu la bele haluha direitu fundamentál no justiça ba ema hotu. Komboiu ne’e mak sinal forte katak juventude sei kontinua luta ba kontra injustisa sosiál iha ita nia rai” Dehan Portavós EUTL Natalício Nunes, ba jornalista sira hafoin remata marsa popular, Quarta-Feira, (01/10/2025)

Nia fundamenta, EUTL sei kontinua halo atividade hanesan ida ne’e iha fulan sira oin, nune’e konsolidá base movimentu juventude nian no reforsa demokrasia iha Timor-Leste.

𝗣𝗡𝗧𝗟 𝗔𝘂𝘁𝗼𝗿𝗶𝘇𝗮 𝗘𝗨𝗧𝗟 𝗥𝗲𝗮𝗹𝗶𝘇𝗮 𝗠𝗮𝗿𝘀𝗮 𝗣𝗼𝗽𝘂𝗹𝗮𝗿 𝗛𝗮𝗳𝗼𝗶𝗻 𝗜𝗻𝘁𝗲𝗿𝘃𝗲𝗻𝘀𝗮𝘂𝗻

𝐒𝐀𝐏𝐍𝐞𝐰𝐬𝐓𝐋, Díli : Garante estabilidade no evita violénsia Polisia Nasional Timor-Leste (PNTL), perturba marsa popular Estudante Universitariu Timor-Leste (EUTL), hafoin hetan hikas autorizasaun husi PNTL liu husi negosiasaun entre Portavós EUTL ho PNTL

Diretór Nasionál Informasaun Interna (DNII), Servisu Nasional Intelijensia (SNI), Gastão Piedade hateten, Komandu Polisia Nasional Timor-Leste (PNTL) halo intervensaun hodi perturba marsa popular EUTL, tanba PNTL identifika estudante balun kontra soberania Repúblika Demokrátika Timor Leste (RDTL).

“Ami la’os perturba maibé responsabilidade seguransa PNTL mak bele asegura, atu halo avaliasaun ba violensia nafatin PNTL mak avalia, entaun kestaun seguransa PNTL halo intervensaun tanba PNTL identifika estudante balun aproveita marsa popular EUTL hodi dada bandeira Papua no bandeira Palestina, iha atividade marsa EUTL nian”.Dehan Diretor DNII Gastão Piedade ba estudante sira iha resintu Kuartel Jeral PNTL nian oin, Quarta-Feira, (01/10/2025)

Nia esplika papel PNTL la’os halo impedimentu maibé PNTL asegura violensia no evita konflitu tuir dalan. Bainhira Estudante Universitariu Timor-Leste hala’o marsa popular, nia dehan karta akordu ne’ebe EUTL submete ba PNTL hodi husu kunhesimentu, karta refere PNTL simu horseik lokraik tuku lima (5) oras Timor-Leste.

Iha fatin hanesan, Portavós Estudante Universitariu Timor-Leste (EUTL), Natalício Nunes komfirma, EUTL laos atu halo violensia maibé hakarak selebra vitoria, kontra injustisa sosiál ne’ebe buras iha Timor-Leste.

“Ami husu PNTL atu asegura la’os halo impedimentu tanba ami iha masa barak, ami-nia marsa sira laos ho objetivu atu halo violensia no hamosu konflitu maibé ami hakarak ba fó onra ba Saudozu Eis Prezidenti Republika Nicolau Lobato iha rotunda Comoro no ami selebra vitoria povu maubere”.

Aleinde ne’e, Tuir komunikadu imprensa Estudante Universitariu Timor-Leste sita katak, objetivu organiza marsa popular ne’e, hodi selebra vitoria kontra politika Parlamentu Nasionál, kona-ba halakon Lei Pensaun Mensal Vitalísia, hapara kultura sosa kareta no revoga lei 100 metrus dok husi instituisaun publiku molok halo manifestasaun.

Entretantu, tuir observasaun Mídia SAPNews observa iha Kuartel PNTL Kaikoli nia oin katak, Polisia Nasional Timor-Leste hetan apoiu husi Unidade Batilaun Orden Publika (BOP) fó seguransa masimu ba atividade marsa refere desde tuku tolu to’o tuku neen lokraik.